Ivoti likhombe umbiko enkantolo
Ngalesi sikhathi iningi lezakhamuzi, abasebenzi nosopolitiki ngaphansi koMkhandlu iZululand bebe magange ngesinqumo esizothathwa kwazise izolo beziphela izinsuku obekumele uMkhandlu uziphendulele. Emhlanganweni woMkhandlu obungomhla zi-2 kuNhlangulana bekufikelwe nje into eyodwa, isinqumo ngokuthi ngabe kumele yini umbiko iForensic Investigation Report Into Allegations Of Maladministartion, Fraud and Corruption At Zululand District Municipality, nezincomo zawo wamukelwe njengoba unjalo noma ucelwe inselelelo enkantolo. Kuthe ngoba udaba lusezithebeni uSomlomo weluleka ukuthi isinqumo sizothathwa ngokuthi kuphakanyiswe izandla hayi ukuba kuvotwe ngokuyimfihlo. Kunede kwavunyelwana ngalokho waqala umsebenzi obekuziwe ngawo. Isiphakamiso esithi uMkhandlu kawedlulisele ngokushesha lolu daba eNkantolo ePhakeme senziwe yikhansela uSA Mncwango wasekwa yikhansela uSS Siyaya. Ngokuthola kwamanye amalungu e-Inkatha Freedom Party ( IFP) nahlukene phakathi isenzo sokuba kuphakanyiswe izandla bekungumgoga. Elinye lamakhansela elikhulume neBayede lithe: “Ayikho lento, iqembu lisiphoqe ukuthi sicabange njengalo odabeni olusithinta ngqo. Siye lapha kovota nje bekuqale kwanomhlangano lapho ububona nje ukuthi siyachathwa”,kusho umthombo. Ngokwezinombolo amakhansela ayi19 avotele isiphakamiso , obekuyi -18 e-IFP nelilodwa le-Economic Freedom Fighters (EFF) . kwathi abebephikisana nesiphakamiso baba -17 , okuyi African National Congress ( ANC) kanye nayi6 eDemocratic Alliance. Khona lapho lomthombo uthe sibethusile nokho isenzo sowe -EFF ngoba bebethi kuzobhanjwa umkhonto enxebeni njengoba izinombo zisho. “Uyabona lo we-EFF yindlala nje. Thina besithi noma ngabe siphakamise izandla izinombolo zizosho okunye, kodwa ke imali iyadlaliswa lapha”, kusho umthombo.
Lo mbiko owaziwa ngokuthi, uhlanganiswe yinkampani yabameli abazinze eThekwini, iMdledle Incoporated. Abameli laba baqokwe nguMnyango Wokubusa Ngokubambisana Nezindaba Zomdabu oholwa nguMhlonishwa uHlomuka kulandelwa iSigaba 106 (1) (b) soMthetho Wezinhlelo Zikamasipala uNombolo 32 wezi-2000 [Municipal Systems Act (Act 32 of 2000). Umbiko lona uphothulwe ngenyanga eyedlule khona lapho wedluliselwa kwabathintekayo kuMasipala nobekulindeleke ukuthi bazikholise bese benza lokho okube yizincomo noma baqhamuke nesinye isixazululo. Ngesonto eledlule ElaboHlanga lithembise ukwenaba ngombiko nokho abezinhlangothi ezithentekayo bakhale ngokuthi njengoba seliya enkantolo nje kungakuhle silinde.