IKwaZulu-Natal ilungisa olwe-EPWP
Ngenxa yoKhuvethe (Covid 19) sekube nezinguquko eziningi ngendlela uHulumeni osebenza ngakhona. Okokuqala ngqa emlandweni kudingwa udaba lwezezimali kusetshenziswa ubuchwepheshe nezinkundla zokuxhumana eSishayamthetho saKwaZulu-Natal. Kusuka ngoLwesibili amalungu eSishayamthetho athamele inkulumompikiswano besebenzisa ubuchwepheshe. Le nkulumompikiswano ilandela isabelomali esathulwa emva kokuvulwa kweSishayamthetho sesi-6 eRoyal Showground eMgungundlovu ngoNdasa bese kwalandela nesabelomali. Kuleli sonto iminyango namalungu amakomiti abedingida indlela leMnyango eyabe ngakhona imali.
UMnyango Wezezimali
Lo Mnyango onomthelela cishe kuyo yonke iminyango zonke izinkinga zeminyango eyahlukahlukene amalungu ekomiti abedinga izimpendulo kuMphathiswa walo Mnyango uRavi Pillay. UMhlonishwa uSifiso Sonjica we-African National Congress (ANC) ubuze ukuthi le misebenzi engenabanini (vacant post) iyogcwaliswa nini ngoba iyo eyenza iminyango ingenzi kahle ngoba eminye yayo ibucayi. “Siyafisa ukwazi ukuthi lawo mapulazi angama-44 okwathiwa azolekelelwa sekukuphi, futhi oluphi uhlelo oluzosetshenziswa,” kusho yena. Uqhube ngezinkinga ezihlasele Ezemvelo Wildlife ukuthi bazolungiselwa nini ingqalasizanda.
UMhlonishwa uFrancois Rodgers weDemocratic Alliance (DA) uthe; “Ngokufika kwalesi sifo (Khuvethe) siyabona ukuthi liselikhulu igebe phakathi kwalabo abadla izambane likapondo kanye nabaphofu. Ukuthathwa kwemali engangezigidi ezingama-R60 ngenxa yeCovid-19 akukuhle.” Uqhube ngokuthi uma kuzovalwa izindawo zokugembula izinyanga eziyisi-6 uHulumeni uzolahlekelwa imali okungenani engangezigidi ezingama-R300.
UMhlonishwa uCeliwe Madlopha we-ANC uthe ukuthola koMnyango Wezobuciko Namasiko isigidigidi imnyaka emibili kulandelana lokho akuzophazamisa ukuhanjiswa kwentuthuko emphakathini. KuMnyango Wezemidlalo uthe ufisa ukwazi ukuthi lo Mnyango uzoyigcwalisa kanjani le misebenzi ebucayi engenabantu. Nokuthi uluphi uhlelo abanalo ekuhlanzeni kanye nokulungisa izakhiwo nezindawo njengoba bengebo labasebenzi be-Expanded Public Works Programme (EPWP).
UMhlonishwa uShameen Thakur-Rajbansi weMinority Front uthe ukungasetshenziswa kwemali ebekelwe imsebenzi ethize ngenxa yokuvalwa kwezwe kuyaqondakala, kodwa imali yeEPWP ingasetshenziswa ukuthi kuthengwe izivikeli. Waqhuba ngokuthi imali kumele idedelwe ukuthi ixhase izinhlangano okungasizona zikaHulumeni kanjalo nalabo abadla imbuya ngothi njengoba sekungenwa ezingeni lesi-3 lokuvalwa kwezwe.
UMhlonishwa uMaggie Govender we-ANC uthe ubhubhane lophoqelela iMnyango ukuthi ibuyekeze imsebenzi esemqoka, wathi beyinhlangano babanxusa ukuthi bathathe izinqumo eziphusile masebenza lokhu. Uphinde wanxusa uMnyango wezempilo ukuthi ungasebenzisi imali eningi ngokulwa noKhuvethe ngoba izifo ezinjengoTB kanye nengculaza zisakhona futhi zisayidinga imali.
UMhlonishwa uVelenkosini Hlabisa we-Inkatha Freedom Party uthe emva kweminyaka engama-26 edemokhrasi kodwa kusanegebe elikhulu phakathi kwabantu abadla elikapondo kanye nalabo abadla imbuya ngothi. Wathi isabelomali sonyaka wezi-2020/21 akasiboni sizolivala lelo gebe.
UMphathiswa woMnyango Wezezimali uMhlonishwa uRavi Pillay ephendula uthe udaba lwe-EPWP imali engama-95% yokusetshenziswa (expenditure) seyenziwe, benguMnyango bayalusebenza ngoba bayazi ukuthi ilona oludala amathuba omsebenzi. Udaba lokulungisa abacwaningimabhuku luyasetshenzwanalo. UMhlonishwa uphinde waqinisekisa ukuthi noma ngabe kuzoba khona ibudget cut kodwa ama-90% walesabelomali esasithuliwe asikazoshintsha. Uphinde waqinisekisa ukuthi iminyango eyahlukene iyayisebenzisa uhlelo i-EPWP ukubulala amagcewane, ezibhedlela kanye nasezikoleni. Uqhube ngokuthi ngokomthetho kuyabavuma ukuthi baqoke izinkampani ezizokwenza umsebenzi ngokushesha uma kudingeka, lokho kodwa kwenzeka ngokulandela umthetho, ngoba kuyaziwa ukuthi uma kuzokhishwa ngokohlelo lwamathenda kuba umdanti.
UMhlonishwa uPillay uphinde wathinta udaba lwezingubo olwaluthinta uMnyango Wezokuthuthukiswa Kwabantu ukuthi ngesikhathi luvuka uNdunankulu uSihle Zikalala wajuba uMnyango wezezimali ukuthi wenze uphenyo bese wenze umbiko. “Ngiyayiqinisekisa indlu ukuthi loluyaphenyo oluphezulu, umbiko sizowunikeza uNdunankulu mhla zili-15 kuNhlaba. Ngithi angikuchaze ukuthi cishe emnyakeni elishumi eyedlule sekwenziwe lemibiko cishe engama-400, lemibiko ithatha okungenani isikhathi esinganezinyanga ezili-12 kuya kwezili-18 ngoba zibucayi.”
IHhovisi likaNdunankulu
Ihhovisi lika Ndunankulu kusabelomali esedlule besithole izigidi ezingama-R714 ngesabelomali sowezi-2020/21 sithole izigidi ezingama-R800. ISILO sengezelwe ngezigidi ezi-R4, isuka ezigidini ezingama-R66 kusabelomali esedlule lokhu kubeka ezigidini ezingama-R70. UNdunankulu uthe izigidigidi eziyisi-R6 ziya esikhwameni sokulwisana nokhuvethe.
USihlalo wekomiti uMhlonishwa uCeliwe Madlopha uthe leli komiti aliholaya bazogxila ekuqapheni ukuthi leli hhovisi alisebenzisi imali kakhulu futhi alisebenzisi imali elatshelwe yona kancane. Uqhube ngokuthi ukuhluleka kokuzenzela imali kweZulu Royal Trust kuholele ekutheni uMnyango Wezokubusa Ngokubambisana Nezindaba ZoMdabu, uMnyango Wezobuciko Namasiko, kanjalo neHhovisi likaNdunankulu benze umsebenzi owodwa okungowokuxhasa lesi sikhwama.
UMhlonishwa uMakhosi Khoza uthe; “Beyi-ANC bathanda ukuxwayisa abasebenzi bakaHulumeni ukuthi ozotholakala enza okuphambene nomthetho uzobhekana nengalo yomthetho. Sinxusa iHhovisi likaNdunankulu ukuthi longe imali yabakhokhi bentela.”
UMhlonishwa uMuziwenkosi Gwala we-IFP uthe; “Siyakuthokozela ukuthi iHhovisi lisazokunakekela ISILO. Njenge IFP siyakholwa ukuthi anenzi okwanele ukweseka ISILO. Siyaphoxeka ukuzwa ukuthi kunabantu abathi ISILO sisebenzisa imali budlabha, bese wena Ndunankulu uthula ngoba ISILO akasiyena usopolitiki akwazi ukuzivikela, uNdunankulu njengenhloko kaHulumeni nguye ekumele avikele ISILO ngoba kudicilileka phansi isithunzi sakhe. Ukuhluleka ukuhlukanisa phakathi kweRoyal Household Trust, ne-Ingonyama Trust uma kukhona okungahambi kahle kugcina kusolwa ISILO ngokungenasidingo. Sicela imali obekuhlelwe ukuthi izosetshenziswa ukusingatha uMkhosi woMhlanga noMkhosi weLembe njengoba kunamathuba amakhulu ukuthi lemcimbi ingabi bikho ukuthi le mali eyenziwe ISILO sikwazi ukuyithola khona ezokwazi ukulwa nobhubhane ukhuvethe aphinde alekelele abampofu ngalesi sikhathi esinzima.”
UMhlonishwa uZwakele Mncwango uthe bakuqaphelile ukwatshelwa kweHhovisi imali ethe xaxa bayakholwa ukuthi bazobona ukubusa nokulawula okungcono. Uqhube ngokuthi; “Asisigxeki iSILO ngoba akusona esizithathela imali. Izigidi ezingama-R71 sifuna ukwazi ukuthi mingaki iminyango enikeza imali ISILO.” Uqhube ngokuthi kumele uNdunankulu uma ekhipha izibalo angagcini ngezifunda kepha aze angene ngisho kumawadi uqobo.
UNdunankulu uSihle Zikalala esephendula uthe udaba lokuthi iTrust kumele izakhele yona imali bayakuvuma lokho, khona ingezoncika ekutheni ixhaswe ngemali uHulumeni. Uphinde wabonga ngokuphakamisa ukuhlaselwa kweSILO, lokho okugcina sekungukulwa kwepolitiki okungathi shu, wathi ngumsebenzi wamalungu eSishayamthetho ukuvikela isithunzi seSILO, futhi lokho kujwayele ukuqhamuka neqembu iDA. Odabeni lokuthi kuzomele kusetshenziswe imali le ebisibekwe eceleni ngenxa yemicimbi ekungabonakali ukuthi isazoba khona lokho bakuthatha njengokuphonsa esivivaneni ngombono. “Odabeni lokucakaza izibalo zoKhuvethe kuze kufike ema Wadini lokho sikubona kuzoletha ukwesaba noqhekeko kubantu emphakathini, lokho asikuboni kuzofika nesixazululo ngoba kuyenziwa eWestern Cape kodwa asiboni kuzowusizaphi umphakathi ngoba abantu badinga ukwelashwa, lokhu esingakuboni kusiza abantu ngoba iWestern Cape isalokhu inezibalo eziphezulu, futhi isebenzisa lolohlelo,” kusho uNdunankulu. Uphethe benguHulumeni basazoqhubeka bavikele iRoyal House Hold, kanjalo nobuholi bomdabu.