Izakhamuzi zikhala ngokufika kwezinga elisha
Kusuka zingama-26 kuNdasa kwaqala ukuvalwa kwezwe eNingizimu Afrika ngenxa yomkhuhlane uKhuvethe (Covid 19) akusaphilwa impilo eyejwayelekile ezweni. UMengameli wezwe uCyril Ramaphosa wamemezela ukuthi ukuvalwa kwezwe kuzohlukana ngamazinga lokho abazokusebenzisa ukuqapha uKhuvethe, nokubhebhetheka kwalo. Lokhu okuzoqapha nokusabalala kwabantu. Selokhu athulela isizwe ngezinguquko abazenzayo benguHulumeni mayelana nalolu bhubhane, wamemezela ukuthi mhla-1 kuNhlaba iNingizimu Afrika izingena ezingeni lesi-3 lokuvalwa kwezwe.
Njalo uma kungenwa ezingeni elisha sokuvalwa kwezwe izakhamuzi ziyaziswa ukuthi ikuphi lokhu okuvulelekile obekukade kuvalelekile. Phakathi kokunye okwakushiwo ukuthi kuzovuleleka njengoba sekungena lesi zinga lesi-3 kwakungukudayiswa kotshwala, kanjalo nokuvuleleka ukuthengisa kokudla ezitolo esithengisa ngokudla okusheshayo, ukudayiswa kwatshwala kanye nokudla lokho kuvumeleke uma uzothenga bese uhamba ungadleli kuleyo ndawo ekuthengiswa kuyo. Nanoma kade kubukeka kubhekwe ngabovu lokho kuvulelela kodwa eNhlokodolobha yaKwaZuluNatal eMgungundlovu akusizona zonke izitolo ezithengisa lezi zinto zombili ezivulile ngoMsombuluko. Ziningi izizathu ezingenza ukuthi lezo zindawo ezithengisayo zingavulwa, kungaba ukungahlangabezani nemigomo ebekiwe ukulandela imitheshwana yokhuvethe (Covid-19 regulations).
Umthamo wabantu abahamba ngezinyawo edolobheni wenyukile, kanjalo nezimoto ezihamba emgaqweni ekuseni nabantambama isibalo senyukile mawuqhathanisa nezinye izigaba ekuphumwa kuzona zokuvalwa kwezwe. IBAYEDE ikhulume nezakhamuzi ukuthola ukuthi bazizwa kanjani ngezinga esisha eMgungundlovu. UNks uNontethelelo Shezi uthe; “engingakuthandi ukubona abantu abamnyama begcwele kakhulu ezindaweni ezithengisa ngotshwala, lokhu okusibeka sonke engcupheni ngoba uma sebephuzile kuzoba nzima ukuthi bakhumbule ngezindaba zosocial distancing, futhi abazibeki bona kuphela engcupheni kepha nezingane ezingenacala. Uma ngiqhathanisa ngezinga esedlule bekuhlonishwa kodwa manje abantu bambondelene kakhulu bekungcono kulesi zinga esiphuma kusona abantu bebesahlonipha.”
UMnu uNhlanhla Maphumulo uthe; “Angithokozile ngendlela isimo okuyiso, ukuguqula kwezigaba ngibona sengathi abantu basuke bazitshele ukuthi sesikhululekile, ikakhulukazi kubantu bakithi, lokhu okwenza ukuthi njalo makushintsha izigaba isibalo salabo abathelelekayo sande, engingazi ukuthi ingenxa yokujabula kuze kweqe noma ingoba ngempela lezi zinto ezisuke zivuleleka bezidinga ngempela.”
UMnu uZakhele Mkhize, ubeme emugqeni omude wesitolo esithengisa utshwala uthe; “Mina okungilethe kulesi sitolo ingoba nginebhizinisi lokuthengisa ngotshwala, ngakho ngizothenga khona ngizokwazi ukuthi ngithengise ngoba iyona ndlela engiphila ngayo. njengoba kade savala ezitolo zethu, indlala ibisisibulele futhi kwathi kuvalwa izwe vele utshwala sasesingenabo ngoba abantu babuthenga ubuthaphuthaphu khona bezoba nabo.” Ephendula ngodaba lokuthi njengoba edayisa uyahlangabezana yini neMitheshwana yeCovid-19 uthe; “Ukukhuluma iqiniso nje laba bantu abadayisa emgwaqweni bayahlangabezana yini bona nemyalelo ye covid 19? Engikubone kumqoka ukuthi okungenani ngivumele ukuthi kungene loyo ofake isimfonyo, bese ngibe nesibulalimagciwane emnyango khona abathengi bezokwazi ukuthi bafuthe.”
UNkk uTholakele Chonco obebambe umugqa ngaphandle kwesitolo esithengisa ngokudla okusheshayo uthe; “Mina ngilethwe ukuthi kade ngagcina ukuzizwisa ngemali yami, uma kungathiwa sengithole iCovid-19 ngeburger nje ayi impela kuyobe besekudaliwe, ngizizwa engathi besengiyisigqila ngingasakwazi ukujabulela izithukuthuku zami lezi engizivukelayo mihla namalanga ngiyosebenza.”
UThokozani Mlaba (21) ebeka umuzwa wakhe ngokungena kulesi zinga uthe; “Okubuhlungu ukuthi thina abantu abamnyama ebesikhala ngokuthi asinamali sifuna izijumbana kuHulumeni kodwa ithina esesigcwele ezindaweni zokuthengisa utshwala. Okwesibili ukuthi asiziboni ezinye izizwe zigcwele edolobheni kunalokho kugcwele aboHlanga angazi noma ingoba silambile noma ingoba singahloniphi imthetho noma sithokozizwa ngukuvunyelwa ukuthengisa utshwala.”