Amehlo athe njo kuKhomishini Yezokuncintisana ngamabhange nezimakethe zemali
Kuyathokozisa ukubona iKhomishini Yezokuncintisana (Competition Commission) yaseNingizimu Afrika yenza uphenyo ngezinsolo zokuthi amabhange anesandla ekuguquleni isimo serandi ezimakethe zemali. Uma kungaba yiqiniso lokhu kungaba yinto embi emabhange okuthenjelwe kuwo kuleli lizwe. Nokho esikuqaphelayo wukuthi njengoba zikhulunywa zivuthwa lezi zindaba kunezimpawu zokusimama kwerandi okuyinto ethokozisayo, esingenasiqiniseko noma ixhumene yini nalezi zinsolo. Sizoqhubeka sibeke indlebe sibone okushiwoyo ngalezi zinsolo.
Kuvamisile ukuthi kwenzeke izimanga ngempelasonto eziletha umehluko omkhulu ezimakethe zemali uma sekuqala isonto. Ngesonto eledlule bekulokhu kunomdlalo wokwehla kwenyuka ezimakethe, okufuze umdlalo weYoYo, kwabayaziyo.
Bekuthi sisathokozela ukusimama kwerandi ziguquke izinto ngosuku olulandelayo. Siqale isonto sivule izindlebe namehlo silindele ukuzwa ukuthi intengo kaphethroli nodizili izokwenyuka ngamalini. Sekuwumlandoke ngoba ngoLwesibili ebusuku yenyukile intengo kaphethroli. Besingenasiqiniseko ngezinsuku ezedlule ngokwenyuka kwentengo kadizili, kodwa nawo wenyuke ngamasenti angamashumi amabili nambili elitheni elilodwa.
NgoMsombuluko lulu-1 kuNhlangulana 2020
Kuvule izimakethe ngoMsombuluko licindezelekile irandi, laze lalahlekelwa ngamasenti ayishumi. Ekuseni idola lase-USA lalilingana namarandi ali-17,54 okukhombisa ukwehla kancane kwerandi kulokho elaliyikho ngoLwesihlanu.
Kuyinto engathokozisi ukubona isimo siguquka imizuzwana sekusondele isikhathi okuhlolwa ngaso amandla emali. Ziguquke izinto sekusele isikhathi esilinganiselwa kumahora amabili lagubuzeleka irandi lalahlekelwa ngamasenti angamashumi amabili. Kuvukwe uPondo waseBritain ulingana namarandi angama-21,73.
Likhombise ukuzabalaza okukhulu irandi langavuma ukulahlekelwa kakhulu, lagcina lilahlekelwe yisenti elilodwa vo kulokho elaliyikho kuvalwa ngoLwesihlanu. Nakhona lapha isimo siguquke emahoreni amabili asele kuvule izimakethe ngoMsombuluko. Kuvulwe iYuro lilingana namarandi ali-19,47.
NgoLwesibili zi-2 kuNhlangulana 2020
Kuvule izimakethe ngoLwesibili idola lase-USA lilingana namarandi ali-17,36. Kuyathokozisa ukubona lesi simo irandi lizuza amasenti ali-18 esimweni ebelikuso ngayizolo.
Lizabalaze kwalilungela irandi lasimama ngamasenti amabili kuvulwa ngoLwesibili. Luqale usuku uPondo waseBritain ulingana namarandi angama-21,75 okukhombisa uzinzo emandleni erandi.
Livuke nomfutho irandi lasimama ngamasenti angaphezu kweshumi kuvukwa ngoLwesibili. IYuro kuvule izimakethe lilingana namarandi ali-19,36.
NgoLwesithathu zi-3 kuNhlangulana 2020
Irandi lithole amandla labuyela esimweni elalikuso ezinsukwini eziyishumi ezedlule. Kuvukwe idola lase-USA lilingana namarandi ali-17,10 okukhoma ukuthi lisimame ngamasenti ayishumi nesithupha esimweni sangoLwesibili.
Upondo waseBritain wehlulekile ukubambelela lapho bewukhona ngayizolo, kwavukwa ekuseni ulahlekelwe ngamasenti angamashumi amabili nambili. Kuvukwe ulingana namarandi angama-21,53 ngoLwesithathu.
Sivuke ngoLwesithathu iYuro lehlile lalingana namarandi ali-19,17, okusishiye simamatheka kancane.
NgoLwesine zizi-4 kuNhlangulana 2020
Lithe seliya koshona ilanga langoLwesithathu zabonakala izimpawu zokusimama kwerandi okuthokozisayo. Kuvule izimakethe zemali ngoLwesine idola lase-USA lilingana namarandi ali-16,94. Leli zinga elikulo irandi uma liqhathaniswa nedola lase-USA saligcina emasontweni ayishumi nambili edlule.
Izindaba zokusimama kwerandi ezithokozisayo zibonakale lapho sibheka isimo phakathi kwalo noPondo waseBritain. NgoLwesine ekuseni uPondo waseBritain bewulahlekelwe ngamasenti angama-27 okuyinto engenzeki njalo. Upondo waseBritain kuvukwe ulingana namarandi angama-21,25.
Irandi lisimeme ngenkathi libhekene neYuro ngoba kuvukwe ekuseni iYuro lilingana namarandi ali-19,00. Ngaphambi kokuvula kwezimakethe ekuseni ngoLwesine iYuro likhombise ukwehlelwa ngamandla laze lalingana namarandi ali-18,95 kodwa zabuye zaguquka izinto lasimama ngamasenti ayisihlanu.
Intengo yegolide yiyo esakhombisa uzinzo ngoba isalokhu ingaphezulu kwamadola ase-USA ayi-1 700. NgoLwesine intengo yegolide kuvukwe iyi1 703 yamadola ase-USA.
Intengo kawoyela yiyona engathokozisi ngoba iyaqhubeka nokwenyuka. NgoLwesithathu umphongolo kawoyela bewungamadola ase-USA angama-40,04, kwavukwa ngoLwesine ingama-39,22, okusishiya sithanda ukuphatheka kabi ngoba uma kuqhubeka kanje singase siphinde sibone ukwenyuka kwentengo kaphethroli nodizili ngenyanga ezayo.