Imithetho ingacutshungulwa ngokushesha
Ukhuvethe luveze ngokusobala ukuthi kunezinto ezithathwa njengezinkinga ezweni, ezingaxazululeka ngezinyanga ezimbalwa uma yonke imihlathi ingagaya ngendlela efanayo. Cishe zonke izinto ezenziwa nguHulumeni zigunyazwa futhi zilawulwe wumthetho. Noma izinto zingasenzeki kuyacashwa ngomthetho izinto zigcine zilibele.
Uma kunezinguquko ezenziwayo emithethweni kuyenzeka kuphele iminyaka, eminye imithetho igcine ingaphumelelanga, kulokhu kuphikiswana ngendlela okuzokwenziwa ngayo. Kunemithetho osekuphele iminyaka ingena iphuma ePhalamende, kwesinye isikhathi kuze kushintshe oNgqongqoshe kodwa imithetho ingaguquki. Kulezi zinyanga ezimbili kube nemithetho emisha eshicilelwe, kwachibiyelwa eminingi ngaphandle kokuthi amalunga ePhalamende agibele izindiza aye kohlangana ePhalamende eKapa. Kubonakala njengesinye sezimangaliso esizifunda ngalesi sikhathi sokhuvethe ukuthi izinto ziyalungiseka ngesikhathi esifushane zisebenze futhi uma abantu bezimisele futhi nesimo siphoqa.
Kunezinto ezaqala ukuxoxwa kusalwelwa inkululeko, abanye baya ekudingisweni, abanye balahlekelwa yimpilo yabo, kwabuywa kwavunyelwana ngokunye, kwavotwa, kwajatshulwa kwavunyelwana ngokuthi seyitholakele inkululeko. Noma sekuvunyelwene kuhlalwa ePhalamende elilodwa kusenemithetho engaguquki edingidwa eyayikhona nangesikhathi ubandlululo lusadla lubi. Sekuphele iminyaka kuhlukanwa kuhlanganwa ePhalamende kukhona izindaba ezingaphumeleli noma sekuxoxwe kangakanani. Udaba lokwabiwa komhlaba ngolunye lwalezo zindaba, nezinye eziningi ezihambisana nokulinganiswa kwamalungelo phakathi kwezinhlanga kuleli lizwe. Kuphikiswana kucutshungulwe amagama omunye akhombe omunye esweni, omunye naye avikele elakhe iso, kugcine kungavunyelwananga, umthethosivivinywa uphindele emuva kulabo abazolungisa izindawo ezihlatshwe ePhalamende. Emva kwalokho umthethosivivinywa ulinda elinye ithuba eliyovuleka okungenzeka lingaveli kuze kuphele unyaka kudingidwa ezinye izindaba. Ukhuvethe luzumise lwaphoqa ukuba imithetho yokusebenza ibhekwe kabusha kuchibiyelwe izindawo ezithize ezilawula ukusebenza kwamabhizinisi nokuphila kwabantu. Lezi zichibiyelo yizo ezigunyaza ukuba isephulamthetho sibekwe icala, futhi sivalelwe ejele uma kudingeka. Ngalesi sikhathi sokulwa nokhuvethe uMengameli ukhuluma nesizwe, bese eshiyela koNgqongqoshe beMinyango kaHulumeni ethintekayo enkulumweni kaMengameli ukuba baxhumane nezakhamuzi basho nezindlela izinto ezizokwenzeka ngayo. Uma bebeka izindlela okuzosetshenzwa ngazo kumele zisekelwe wumthetho ukuze ziphoqe ukuba lowo ophambana nezinqumo ajeziswe.
Okuhle wukuthi iNingizimu Afrika, njengamazwe amaningi athuthukile, inawo umthetho obhekela inhlekelele noma isibhicongo sanoma yiluphi uhlobo, owashicilelwa ngonyaka wezi-2002 obizwa ngeNational Disaster Management Act. Lo mthetho uphethe ingqikithi nezindlela okumele uHulumeni abhekane ngazo nanoma iyiphi inhlekelele ehlasela leli lizwe. Lo mthetho yiwo ogunyaza ukuba kwenziwe noma yiziphi izichibiyelo emithethweni eyahlukene elawula ukusebenza ezweni, okungasiza ukuba kulawuleke inhlekelele kuvinjwe umonakalo omkhulu. ISigaba 25 salo Mthetho sibalula ukuthi kumele noma yiluphi uhlaka lombuso oluthintekayo ekulawuleni inhlekelele okusuke kubhekwene nayo, lwenze izinhlelo ezizosiza ekunqotshweni kwaleyo nto isizwe esibhekene nayo.
Njengoba izwe libhekene nokhuvethe sibona izinhlaka ezehlukene zikaHulumeni zimemezela izinhlelo ezizolawula ukubhebhetheka kwegciwane. Eziningi zalezinhlelo zibhekene ngqo nokusebenza kwamabhizinisi. Ziwumise nse umnotho, zaze zamisa namabhizinisi ngokwehlukana kwawo. Okubuhlungu kakhulu ukuthi lenhlekelele ebizwa ngeCOVID-19 iqhamuke ngenkathi izwe lificwe ukwehla kwamandla omnotho okwedlulele, lehliselwe esigabeni sikavobo yilabo abahlaziya ukwethembeka kwamazwe ngokwezinzinga lomnotho, ukhuvethe lwase kuba yinhlekelele phezu kwenhlekelele. Le nhlekelele ifike ngesikhathi izinkampani zidiliza abasebenzi, isibalo sabantu abangasebenzi sikumaphesenti angama-29,1. Imvalelwakhaya okungolunye lwezinhlelo uHulumeni aqhamuke nalo zokulwa nale nhlekelele oluvale ukusebenza kwamabhizinisi lwaphoqa amanye amabhizinisi asebenze ngendlela ethile, lugunyazwa yiwo lo mthetho wenhlekelele owashaywa ngonyaka wezi-2002.
Ingxenyana encane itonyulwe kulo Mthetho weNhlekelele kwacashunwa ISigaba 27 1 no-2 kwaba yikhasi elilodwa lasayinwa nguDokotela uNkosazane Zuma uMaDlamini, kwaba yiwona mthetho obalula lesi sikhathi njengaleso senhlekelele yokhuvethe.
Ukuqinisekisa ukuthi wonke amabhizinisi angaphansi kwemboni efanayo asebenza ngendlela efanayo kube nesidingo ukuthi kushicilelwe phansi izinkomba ezichaza izindlela okuzosetshenzwa ngazo ukuze kuqinisekiswe ukuphepha. Lokhu okushicilelwe ngalesi sikhathi senhlekelele kuguqula ukusebenza kweminye yemithetho ejwayelekile yaleyo mboni eyashaywa yiPhalamende.
Kulesikhathi izwe libona ngokucacile ukuthi uNgqongqoshe ngamunye ubhekene namuphi umsebenzi.
Kumele athi uma esekhuluma aveze ukuthi uMnyango awengamele uza nasiphi isixazululo kule nhlekelele.
Isixazululo esikhulu esivimba ukubhebhetheka kwegciwane wukuba abantu bahlale emizini yabo kuze kwedlule lelifu elimnyama. Inkinga yalesixazululo, naso siletha inhlekelele yokuma komnotho bebe bephila abantu bedla futhi benezidingo. Esesibili isinqumo esisamthetho esingejwayelekile yileso sokushiya isikhala esanele phakathi kwakho nomunye umuntu. Lokhu-ke kuthinta wonke amabhizinisi aphila ngokuhlangana nabantu. Amabhange, izitolo ezehlukahlukene sezengeze umuntu ozoqapha isibalo sabantu abangaphakathi omunye angenise abangaphandle uma sekunesikhala. Kusetshenziswa izindlela ezehlukene ukuqaphela lokhu ngoba abanye bagcina izinto esitsheni, eziyisibalo sabantu abadingeka ngaphakathi. Uma kusaphele lezinto esitsheni akavunyelwa olandelayo ukungena. Osomabhizinisi abake baphula eminye yalemithetho esebenzayo njengamanje bayahlawuliswa, bajesiswe okungaba wukuvalelwa ejele, noma ephucwe ilayisense yokuhweba kulolo hlobo lwebhizinisi.
Le mithetho eyakhiwe yazungeza iCOVID-19 miningi. Uma ngibala embalwa: ukucela imvume uma umuntu ephuma ekhaya noma esifundazweni sakhe, ukufaka isifonyo uma umuntu ephakathi kwabantu, ukusetshenziswa kwezinto zokuhlanza izandla ezindaweni zomphakathi; ukukhuthaza ukugeza izandla ngensipho nokunye. Uma umnikazi bhizinisi engakwenzi okunye kwalezi zinto ngeke avunyelwe ukungenisa abathengi.
Nasiphi isikhungo esisetshenziswa ngabantu siyavalwa uma singenazo izimfanelo. Yicala elikhulu leli. Kudingeke ukuba kuguqulwe izinhlelo zokufunda ezikoleni zamabanga aphansi nasezikhungweni zemfundo ephakeme. Kususwe izimali ebezihlelelwe okuthile zafakwa ezinhlelweni ezehlukene, phakathi kwazo okukhona nemali yokutakula amabhizinisi akhahlamezekile. Kuyobonakala sekuqoqwa. Kuguqulwe izinhlelo zokuhamba, kwamiswa amabhanoyi nezitimela, okuyinto emisa izinhlelo ezikade zanqunywa, ezinye sezakhokhelwa nokukhokhelwa. Imboni yezokuthutha abantu kudingeke ukuba yehlise isibalo sabantu abagibela emotweni ngesikhathi esisodwa.
Kunezimoto ezakhiwe ukuba zithwale abantu abayishumi nane. Ngokulawula komthetho ohambisana nenhlekelele yokhuvethe le moto ayivunyelwe ukuthwala abantu eyakhelwe ukubathwala. Sibhala nje kusenzima ukuvula ukuhamba kwezitimela ezihambisa umphakathi ngoba kungase kungabi yinto elula ukulawula abagibeli.
Konke lokhu kukhombisile ukuthi uma izwe lizimisele ukubhekana nesimo, kuyenzeka ngaphandle kokuphikisana nokuchitha isikhathi kubhalwa kucishwa.
Kungakuhle kube nesifundo esifundwa ngabantu kanye nabaholi sokuthi kusetshenzwe ngokuzimisela noma ngabe seludlulile ukhuvethe. Impi yomnotho inganqotshwa uma sizimisele, njengoba sisayibambile eyezifo.