Ukhukho lumuka nomoya ngesimo somnotho nemisebenzi
Esimweni izwe elikuso kumele ngabe sonke sime ngezinyawo sibhekane nesibhicongo sobubha obubhekene nezakhamuzi zaleli lizwe. Ukhuvethe lufike kungekho lutho olutheni obelusezithebeni lwenziwa uHulumeni ukutakula isizwe esimweni somnotho.
Uma kubhekenwe nempi akufanele kuphunyulwe inganqotshiwe. Singacasha ngokhuvethe sithi yilo olufike nokulahleka kwemisebenzi, kodwa iqiniso lithi sekuphele isikhathi eside umnotho wehla inyanga nenyanga aboHlanga beqhatha usizi, beba ngomahlalela. Ezinye izinkampani bezivele zisezinhlelweni zokudiliza, ukufika kokhuvethe kwaletha isizathu okucashekayo ngaso.
Sekuwumlando ukuthi ngoNdasa nonyaka bekubanjwe umoya kulindelwe isimemezelo seMoodys. INingizimu Afrika yehliselwa ezingeni likavobo zingama-27 kuNdasa, okuyizinga eliphansi kakhulu lokuhlonipheka uma siqhathaniswa namanye amazwe.
Ngesikhathi esifanayo kuhlasele ukhuvethe kwema ukusebenza, kwamiswa amabhizinisi abantu bahlala emakhaya. Lokhu kwenezele ingcindezi emnothweni wezwe. Uma kume izimboni kungangeni mali kodwa izindleko zingemile, maningi amabhizinisi angezukwazi ukuvula uma sekufanele avule.
Amanye azohluleka ukugcina isibalo sezisebenzi. UMnyango Wezezimali uzwakalise ukwesaba izwe elizobhekana nakho ngokuqashwa kwabantu ngenxa yokhuvethe. Yiwo oshicilela inqubomgomo yezomnotho futhi waba imali esetshenziswa yiminyango kaHulumeni. Kuzokhumbuleka ukuthi lo nyaka siwuqale kukubi ngoba abantu abangaqashiwe bebebalelwa kuma29,1% okuyisibalo esiphezulu kakhulu. Izingqapheli ziqagela ukuthi kuzolahleka imisebenzi ebalelwa phakathi kwezi-690 000 nesi-1 790 000.
Kuzothatha isikhathi ukuba amabhizinisi abuyele esimweni esihle sokuhweba emva kokuvulwa kokusebenza. Kunamabhizinisi nezimboni ezisavaliwe kanti akukho okungenisa imali ezoholela izisebenzi ezihlezi emakhaya. Abahlaziya isimo semisebenzi babona kuzophela imisebenzi eminingi okungafinyelela kuzigidi ezinhlanu.
Isimo sabantu abantula imisebenzi sizokwedlula kuma-30% futhi singaze sifinyelele kuma 50%.
AbeNedbank baqagela ukuthi nonyaka kuzolahleka imisebenzi eyisi-1 600 000. Lokhu bese kuvele ngoMbasa umbiko uveza ukuthi izinga lokulahleka kwemisebenzi lenyuke ngokushesha lisuka kuma-10% liya kuma-14% esikhathini esiyisonto elilodwa kuNhlaba.
Ngowezi-2018 kwaba nesithangami semisebenzi okwakudingidwa kuso amasu okusungula imisebenzi.
UMengameli wezwe uke wakhuluma ngaso ngoLwezi nyakenye kodwa akukho osekwenzekile isizwe esingethembela kukho maduze nje.
Kuyimanje iNingizimu Afrika icwile ezikweletini ezilinganiselwa kuma61,6% eGross Domestic Product (GDP). Njengoba izwe libhekene nezindleko zokhuvethe kuze kwadingeka liphinde liboleke sakhula isikweletu. UMnyango Wezimali uthi izinkomba zithi emva kokhuvethe isikweletu seNingizimu Afrika sizokube silingana nama-85,6% eGDP. Kusho ukuthi uHulumeni uthembele kuma-15% omkhiqizo ukubhekana nezidingo zesizwe. Lokhu kwenze kucace ukuthi lincane ithemba lokuthi uHulumeni kukhona angakwenza ngokusheha ukuguqula isimo semisebenzi kuleli. Kusobala ukuthi yikho lokhu okwenza kuzwakale amahlebezi athi ikomiti eliholwa nguMnu Godongwane eMnyangweni Wezezimali lihlongoza ukuthatha esikhwameni sezimpesheni nakwaPIC ukuze libhekane nokuvula izimboni ezizoletha amathuba emisebenzi.
Kuthiwa okwehlula amadoda kuyabikwa. Uma amanzi esengene endlini kumele kubhukule wonke umuntu osezingeni lobuholi.
Mhlawumbe lomkhankaso kumele ungagcini kuHulumeni omkhulu kodwa nakomasipala nasezingeni laMakhosi.
Noma ngabe kuncane kangakanani okwenziwa ngokuhlanganyela ezingeni lesifunda kungashiya imiphakathi isesimweni esingcono futhi kukhuthaze ukuzenzela izinto ezithize.