Lususe ukukhuluma olukaTshatha nokhuvethe
Mhleli
Kusobala ukuthi ukube ubengabuzanga uNgobe ngabe akatshelwanga ukuthi kube nephutha, iqiniso ukuthi kumele kube nezibalo ezinyukayo ukuze uMengameli wethu naye ahambise okuthile ehhovisi lomhlaba ukuze izwe lethu lingene nalo kulabo-5G no-4IR okukhulunywa ngabo. Yizo lezi zivumelwano ezisayinwa mihla namalanga. Umbuzo uthi ngonjani lo mkhuhlane ongachazeki ohlasele umhlaba wonke manje sekuthiwa thina sisemathubeni okuba sigule kakhulu kunabamhlophe? Kuningi okusazovela. - nguMlondy Mbutho
Mhleli
Ngiyasola lesi sikhungo esikade sihlola umfo kaNgobe le nto siyenze ngamabomu. Akunaphutha la. Sikhumbule ukuthi uTshathugodo umuntu odumile ngokomsebenzi wakhe. Manje nabo abahloli begciwane bebezenzela udumo lokuphuma emaphepheni. Kungenzeka futhi lokhu kwenziwe ngezinhloso ezithile. Okufike kuxake, ukuthi kuthiwe unkosikazi walo msakazi ohlale eseduze kwakhe, alala naye egumbini elilodwa yena akanalo kodwa yena uNgobe unalo. Kwenzeka kanjani ukuthi abantu abanyamanye omunye kuthiwe unegciwane omunye angabi nalo? Kukhona okushaya amanzi ngomsila phezu kwesiziba la. Usekhulumile-ke uTshatha wathi usazoxhumana nabameli bakhe ukuze bahlahle izinyathelo abazozithatha. Kuyacaca ukuthi lolu daba luyaphambili futhi luzoshisa njengomlilo. Sikhumbule kakujwayelekile ukuthi kuthiwe unegciwane, gwiqiqi kuthiwa kawusenalo. - nguSipho Mbatha
Mhleli
Yizo izinsuku zokugcina lezi. Lesi sikhungo bangakhi abantu esesibahlolile ngephutha banikwa imiphumela ethi banaleli gciwane bengenalo? Indaba yaleli gciwane iyindida akekho umuntu ongamethemba kulo mhlaba ngaphandle kukaMdali wezinto zonke. Nale ndaba yokubeka ithemba kuHulumeni kakhulu nguJehova okumele simethembe hhayi umuntu wakulo mhlaba. - nguSbu Thwala
Mhleli
Nginomuzwa wokuthi okwenzeke kulesi sikhungo nakwezinye ezihlolayo kungenzeka ukuthi kwenzekile kodwa kwangabambeka. Lobu budlabha nobudedengu buzodala kukhule ungabazane olukade luvele lukhona kwabanye ngalolu khuvethe nokungabeka impilo yabantu abaningi engcupheni kuphinde kubhebhethekise ukufa. - nguCollin Sandile Kansas Khathi