Kulokhu sicheme isidana naboHlanga
Njengephephandaba seseka umkhankaso wokulwa nokucwaswa kwaboHlanga emhlabeni jikelele
Singabokuqala ukukhuza nokuqwashisa ngobungozi bokuchema. Nokho namuhla singabokuqala ukusho ukuthi sichemile, ngalokho asizenyezi. Ukuchema kwethu kuncike ekwazini ubuhlungu nomlando wonya olubhekiswe kwaboHlanga e-United States of America (USA) nasemhlabeni jikelele. Okwakamuva yilapho insizwa uGeorge Floyd ibulawa ngesihluku, incishwa umoya yiphoyisa lomlungu. Kube buhlungu ukuzwa indoda izikhalela ukuthi ‘kayikwazi ukuphefumula’ futhi ikhala ngonina. Yebo siyavuma, njengoba kuhlala kushiwo, ukuthi kuzoba nophenyo necala nabenzi bobubi bagwetshwe. Lokhu sekwedlule kulokho, akusiwo umhuzuko lo sekuyinxeba uqobo.
Yimpi uqobo futhi ihlelekile. Isenza sizibuze ukuthi kuyoze kube nini sibulawa, sidlwengulwa, sivenyeliswa? Siyamangala ukuthi kambe umholi (kwaboHlanga) ongakubabazi lokhu uthule leni, wesabani nokuthi uncengeni?
Isililo saboHlanga e-USA asisisha kade baqalwa kusuka befika beyizigqila. Nanamuhla kusekhona amathimboxo athi aboHlanga kuleliya lizwe abalutho.
Baseyizinyamazane okulindeleke ukuba zihujwe, uma zitholwa zibulawe. Njengephephandaba lakho olethembayo sikunxusa ukuthi ungathuli. Qala ngokufunda umlando waboHlanga e-USA, ngaphandle kokubona ukuthi usizi lwabo luyefana nolwakho, uzobona ukuthi ngabakwethu. Funda indlela abacindezelwa ngayo, imizamo yabo yokuphuma ogibeni lwengcindezelo bazithuthukisa ngemfundo nangokuba yingxenye yomnotho. Uzophinde ufunde ngokuthi njengathi lapha kwelengabadi bangabantu abasheshayo ukukhohlwa nokuxola.
Njengathi basasemzabalazweni wokuzithola ukuthi bangobani, banelungelo lokuvikeleka, ukungahujwa njengezinyamazane. Asibe yingxenye yeviyo lokudweba umugqa ngoba uma singakwenzi lokho lokhu okwenzakalayo kuyoqhubeka nakwesibazalayo kwedlulele nasezizukulwane ezizayo. uFloyd uncishwe umoya, thina ngokusukuma asiyiphe umoya wokubumba isifuba sempi yaboHlanga ezoyeka ukukhala kepha yenze okuzokwenza kuthule du. Sekungayinhlamba uma abaholi bethu nathi qobo siyoqoma ukubuka engxenye, efile umuntu!