INafcoc ikhala ngokuncane okwenzekile kokuhle
INational African Federated Chamber of Commerce and Industry (Nafcoc) ibe ngenye yezinhlangano zosomabhizinisi eshayele ihlombe uHulumeni ngezinhlelo zawo zokusiza nokubolekisa ngemali okuthanjisiwe emabhizinisini amancane akhahlamezwe ubhubhane iCovid-19 nemvalelwakhaya.
INafcoc ikholwa wukuthi imizamo emenyezelwe uMengameli uCyril Ramaphosa ngoMbasa njengengxenye yemali yosizo eyizigidigidi ezingamaR500, bekufanele isize njengoba iningi losomabhizinisi abasafufusa bengasakwazi ukukhokhela izisebenzi zabo kanjalo nabanye abanikazi bamabhizinisi bengasakwazi ukuzibhekelela bona noma imindeni yabo ngalesi sikhathi semvalelwakhaya. Abanye bakholwa, kube kufanele, ukuthi imvalelwakhaya izoba yisipikili sokugcina emabhizinisini abo.
Amabhizinisi ashayeke kakhulu afaka iziphaza, izinkampani zokwakha, ezokukhiqiza, izitolo, ezokuthutha, izindawo zokudlela, ezidayisa utshwala namanye amaningi emkhakheni wezomnotho. Amanye kuphoqelekeukuthi avalwe thaqa noma avulwe ingxenye.
Lawa ngamabhizinisi osekuneminyaka ehlinzeka ngokudla, indawo yokufihla ikhanda nenhlalakahle ezigidini zemindeni eNingizimu Afrika, ezikoleni nasezikhungweni zemfundo ephakeme. La mabhizinisi aqashe izinkulungwane ngezinkulungwane zabantu ngokugcwele nangokwesikhashana. Ngenxa yohlelo lomnotho waseNingizimu Afrika, amabhizinisi amaningi kulawa asebenza engxenyeni ethile ephakathi kwalawo abhalisiwe nangabhalisiwe.
Aphoqeleka ukuthi ame ukusebenza njengenxenye yemizamo yokulwa nokhuvethe futhi asabela ekhweleni likaHulumeni. Bakwenze lokhu ngokwethembeka nokusebenzela izwe nemiphakathi yabo. Iningi lala mabhizinisi, okubalwa namalungu eNafcoc, asebhalisele usizo lwemali nokwebolekwa imali okuthanjisiwe ukuze akwazi ukubhekana nobunzima.
Bakwenze lokhu besebenzisa izindlela ze-inthanethi nezinye ezimenyezelwe uHulumeni kodwa bahlangabezane nezingqinamba ezibashiye bengasizakele.
Ucwaningo olubili olusha lukhomba ukuthi cishe amaphesenti angama-85 osomabhizinisi abasafufusa kuzoqhubeka ukuthi bazitshwe noma bangakulungeli ukuthola lolu sizo olumenyezelwe uHulumeni njengohlelo lokusiza abakhahlanyezwe wukhuvethe. Lokhu kuzodalwa yindlela abahlolwa ngayo. Kuze kube yimanje babalelwa emaphesentini ali-15 osomabhizinisi abasafufusa asebelutholile lolu sizo lwemali.
Lona lolu cwaningo luthole ukuthi osomabhizinisi abancane abathathu kwabane baveze ukuthi bazowavala amabhizinisi abo uma umvalelwakhaya uqhubeka ngalolu hlobo kuze kudlule umhla lulunye kuNtulikazi.
Iningi lamabhizinisi asengcupheni ngawaboHlanga okungamalungu aqavile eNafcoc. Nakuba uHulumeni ezivezile izindlela ezilawula ukufakwa kwezicelo zokusizwa ngemali, njengolwe-inthanethi, kodwa amalungu ethu athi azisebenzi, iningi lezikhulu zikaHulumeni zisebenzela emakhaya, uma kwenzekile zabakhona, nazo azicaciselekile ngemigudu yokufaka izicelo.
Amabhizinisi azamile ukufaka izicelo nge-inthanethi kodwa bathi isikhathi esiningi ulayini usuke ungasebenzi. Ngaphezulu kwalokho, amalungu eNafcoc ezifundazweni ayakhala ngokuhamba ngonyawo lonwabu ukuhlungwa kwezicelo. Esifundazweni iFree State, ezicelweni ezingama-279 ezihambisana nemigomo ezitholwe uMnyango Wamabhizinisi Amancane Nethuthuko esifundazweni ngoMbasa, zingama-20 eseziphasisiwe.
Nginxusa izikhulu zikaHulumeni ukuba zelekelele abanikazi bamabhizinisi abaxakekile abakhalela usizo. Ukhuvethe lunemiphumela engemihle kuwo wonke amabhizinisi ngokungakhethi. Iningi lamalungu ethu selivele lishayekile baze baphoqeleka ukuba badilize izisebenzi. Iningi labo selime iminyaka ngaphandle kokwesekwa manje selibhekene nokuvalwa kwamabhizinisi alo ngenxa yokhuvethe nemvalelwakhaya.
Akuwenzi umqondo ukuthi uHulumeni namabhange baqinise imigomo kwabafanele ukuthola lolu xhaso ukuze bavikele lokho okusasele. Uma lokhu kwenzeka, imali ebekelwe ukuhlenga amabhizinisi izogcina ingasetshenziswanga noma iye kulabo okungabafanele ukuthi bayithole kodwa abaxhumene nabathile ekubeni izinkulungwane zamabhizinisi aqondile ewa. Lokhu akufanele ukuba kuvunyelwe kwenzeke. INafcoc izimisele ukusebenza noHulumeni ukwelekelela ekutheni uhlelo lokufakwa kwezicelo luhambe kahle nokusiza amalungu ayo ukuba akwazi ukuthola uxhaso.