Amaqhude ayeqana “ngelobudlelwano” be-IFP ne-ANC
Kuyinhlamba ukuthi uMnu uMncwango athi iQembu iNkatha libambisane noKhongolose eSishayamthetho saKwaZulu-Natal
Ngivumele ukuba ngiphendule umbono kaMnu uZwakele Mncwango (osesithombeni) weDA ophume kwelakho langomhla zingama-29 kuNhlaba kuya zizi-4 kuNhlangulana osihloko sawo sithi: “Soyicela ivuthiwe kumfelandawonye weANC ne-IFP”.
Angeke ngingene odabeni olwenza ukuba kube nesivumelwano sokubambisana phakathi kweQembu iNkatha kanye noKhongolose eGoli ngoba anginayo imininingwane yokuthi kungani iSigungu sikaZwelonke seQembu iNkatha sathatha leso sinqumo ngenxa yokuthi angilona iLungu leSigungu sikaZwelonke seQembu iNkatha. Ngiyethemba omunye wabaholi bethu olilungu leSigungu sikaZwelonke uyochaza kabanzi ngalobu budlelwano.
Elihlabe laphukela kimi ngamanga akhulunywe nguMnu uMncwango lapho ethi: “Ubumbano lwe-IFP ne-ANC seluze lwafinyelela ngisho aseSishayamthetho sakulesi sifundazwe lapho bebukisa ngobudlelwane babo.”
Ngizibona ngifanelekile ukuphawula ngala manga aqanjwa nguMnu uMncwango ngoba iqembu iNkatha langithuma ukuba ngiyolimela kulesi Sishayamthetho. Angazi ukuthi uMnu uMncwango kungani eqamba la manga ngoba mina angikwazi lokhu kubukisa ngobudlelwano noKhongolose akhuluma ngakho futhi asinabo ubudlelwano noKhongolose.
UKhongolose uyinhlangano ezimele nQembu leNkatha liyiQembu elizimele ngokwalo. Ngenkathi iQembu iNkatha lisithuma eSishayamthetho langithuma ukuba siyomela abavoti baKwaZulu-Natal siqhakambise imigomo yeNkatha, sibuye sibeke phambi kwezwe lonke ukuthi singenza kanjani ngokwehlukile kulokhu okwenziwa nguKhongolose ekuphatheni isifundazwe iKwaZulu-Natal.
Abavoti baKwaZulu-Natal bavotela iQembu iNkatha ngonyaka odlule ukuthi libe yiQembu eliphikisayo ngokusemthethweni balaxaza iDA okwakuyiyona eyayiliQembu eliphikisayo ngaphambi kokhetho lwangonyaka odlule. Uma kungukuthi sinobudlelwano noKhongolose eSishayamthetho ngabe sidayisa ngokuthenjwa ngabavoti ngoba sathunywa ukuba siyoba yiQembu eliphikisayo ngokusemthethweni kulesi Sishayamthetho. Iqhinga esilisebenzisayo ukufeza lokhu esathunywa khona ngukuphikisa uKhongolose ngendlela eyakhayo singaphikisi nokungenasidingo sokuba sikuphikise, siphikisa ngendlela eyakhayo.
Sibuye sibeke imigomo ehlukile kunalena kaKhongolose engasetshenziswa ukwenza ngcono impilo yabantu baKwaZulu-Natal. Yilokhu iQembu iNkatha elisithume kona futhi mina ngingakusho kugcwale umlomo, ngingananazi ukuthi yilokhu uMntwana waKwaPhindangene asithume kona futhi uma singenza okuhlukile kunalokhu size sibukise ngobudlelwano esinabo noKhongolose njengoba kuphupha uMnu uMncwango ngabe sikhombise okukhulu ukungethembeki kuMntwana waKwaPhindangene nakubavoti besifundazwe iKwaZulu-Natal.
Mina nje angeke ngazihlanganisa naleyo mbudane uma kungukuthi kungabakhona phakathi kwethu abangathi masenze kanjalo.
Mina ngithembekile emigomeni yeQembu iNkatha futhi ngiyohlala ngimele lona iQembu iNkatha ngokwethembeka, nangawowonke amandla enginawo, angeke ngivume ukuthi ngibeyingxenye yombimbi noKhongolose uma uMntwana waKwaPhindangene kanye neQembu iNkatha lonke lingashongo ukuthi masenze ubudlelwano noKhongolose futhi ngikholwa ngukuthi nozakwethu abangamalungu eSishayamthetho nawo azosho lokhu engikushoyo, angeke nawo enze angazange akuthunywe ukuba akwenze.
Yinoma yinini uma sihlangene njengenguyazana yeQembu iNkatha asikaze sixoxe ngokuthi sizokwakha ubudlelwano noKhongolose eSishayamthetho, sihlale njalo sibeka phambili lokho okufanele kwenziwe ukwenzangcono impilo yabavoti baKwaZulu-Natal. Angeke ngivume ukuba sibhecwe ngobende inyama singayidlanga nguMnu uMncwango ngezinhloso zakhe afuna ukuzifeza. La mazwi kaMnu uMncwango ayinhlamba kithi. Thina asikasho lutho ngendlela iDA eyenza ngayo eSishayamthetho ngoba sihlonipha ukuthi benza lokho abathunywe ngabavoti ukuba bakwenze futhi siyakuhlonipha lokho ababona ukuthi kufanele bakwenze, ngakho-ke asilindele ukuthi uMnu uMncwango azigaxe ezindabeni ezingamthinti aqambe amanga bese ethuka iQembu iNkatha eSishayamthetho ngendlela enze ngayo uMnu uMncwango.
Kufana nokusibukela phansi ukuthi uMnu uMncwango athi: “IDA iyaqhubeka nokubamba iqhaza lokuba ilona iQembu eliphikisayo eSishayamthetho yize liyiqembu lesithathu elikhulu kunawo wonke KwaZulu-Natal”. La mazwi ngiwabona eyinhlamba asithuka ngayo thina esithunywe yiQembu iNkatha ukuba siyomela abavoti baKwaZuluNatal eSishayamthetho. Uma kungukuthi yiDA kuphela eyiqembu eliphikisayo eSishayamthetho pho kungani abavoti baKwaZulu-Natal bayikhipha iDA endaweni eyayikuyo yokuba yiQembu eliphikisayo ngokusemthethweni ngonyaka odlule?
UMnu uMncwango makabheke izindaba zeDA angumholi wayo KwaZuluNatal ayeke ukuzigaxa ezindabeni zeQembu iNkatha futhi ahlukane nokukhuluma ilumbo ngeQembu iNkatha.
Inkulumo kaMnu uMncwango ingiphathe kabi ngabona kungifanele, Mhleli ukuthi ngiphendule le nkulumo engamanga ngeQembu iNkatha.