INkandla nemizamo yokulwa nokhuvethe
Isikhathi esibhekene nomphakathi waseNkandla sibukeka sizoba lukhuni njengoba umkhuhlane owumashayabhuqe uhlasele izwe lonkana.
UMnyango Wezempilo eNkandla usukuvezile ukuthi sekunabantu abahlanu asebeqinisekisiwe ukuthi sebesulelekile ngeCoronavirus. UMkhandlu waseNkandla ube ngomunye weyokuqala ukuhlahla indlela yokungenelela kulesi sikhathi esinzima.
Nakuba saziwa njengoMkhandlu onakekela kakhulu izakhamuzi zawo, kodwa isimo esingase sibhekane naso ngenxa yalolu khuvethe singenza singakwazi ukwelekelela umphakathi wethu ngendlela.
INkandla ikhahlamezeke kakhulu ngezibalo eziphezulu zabantu abangasebenzi nokuyinto eyenza isimo sendlala sibe sibi kakhulu ngalesi sikhathi.
Savakashela izinhlangano zamatekisi ukuyoqwashisa ngokhuvethe, sanikezela ngezibulalimagciwane ezingama-500 kosomatekisi. Savakashela irenki enkulu eNkandla, eyaseLindela neyakwaDolwane.
Saqwashisa umphakathi ezigodini ezingama-126 sizungeza ngemoto enomyalezo oqoshiweyo onamazwi eMeya ukufundisa ngezindlela zokuzivikela kulolu bhubhane. Sisabalalise izibulalimagciwane eMakhosini aseNkandla nabaholi bamabandla. Uma kuyizinsuku zokucosha izibonelelo, kunamathimba oMkhandlu ahambela izindawo ukuyofundisa ngokhuvethe kuphinde kukhuthazwe ukuqhelelana kwabasuke bemi emigqeni.
Abasuke behambela lapho kuholelwa khona izibonelelo baphatha izibulalimagciwane behlambisa izandla. Abadayisa emigwaqeni nabo bahlomula ukudla nezibulalimagciwane.
Sibasiza ngoba ngesikhathi semvalelwakhaya ayikho inzuzo abayicoshayo noma lokho kwaholela ekuboshweni kukaSodolobha nabanye abaholi boMkhandlu besolwa ngokuphula imibandela yemvalelwakhaya. Silekelele kakhulu nangokuthi ihhovisi lethu lezokuthuthukisa umnotho wendawo lingavali ukuze sisize osomabhizinisi bethu ngezimvume zokusebenza ngalesi sikhathi sebevunyelwe ukuhweba.
Siphinde salekelela imifelandawonye ikakhulukazi leyo ethungayo ngokuyixhasa ngezindwangu ukuze ithunge izamfonyo izidayisele amalungu omphakathi.
Imindeni engenalutho nayo iyahlomula ngokudla, eminye amavawusha okudla ezitolo. UMkhandlu usukhiqize izamfonyo eziyizi-16 000 ezisabalaliswa emphakathini ikakhulukazi kulabo abahlonzwe njengabasengozini kakhulu ngenxa yeminyaka noma ngenxa yamahlalakhona.
Ukuqinisekisa ukuziphatha kahle komphakathi uMkhandlu ubambisene namaphoyisa baba nezivimbamgwaqo, bavakashele namabhizinisi ukuqinisekisa ukugcinwa kwemibandela yemvalelwakhaya. Lo mkhankaso usuholele ekuboshweni kwabaphula umthetho kwaphinde kwabanjwa nezimoto ezebiwe.
Iminyango kaHulumeni ihlangana njalo ngoLwesibili ukucosha imibiko nokubuyekeza izinhlelo zokungenelela. Emhlanganweni obumhla zimbili kuNhlangulana wezi-2020, uMnyango Wezempilo uqinisekise ukuthi sebekhona asebehaqwe yilo mkhuhlane eNkandla. Lokho kugcizelela ukubaluleka kokuziphatha kahle okufanele kuqinisekiswe umuntu wonke.
Njengamanje kunokwesaba kakhulu emphakathini njengoba kuzovulwa izikole ikakhulukazi umatikuletsheni ngoba eNkandla ngenxa yezinga eliphezulu lemfundo ezikoleni ezinjengeBizimali, iLushaba, iVelangaye, kunezingane eziningi eziqhamuka ezindaweni eziningi eNingizimu Afrika. Lokhu kusho ukuthi uma kungenzeka kube khona izingane esezisulelekile ngalo mkhuhlane, kuzodaleka isimo esinzima kakhulu emphakathini.
Izingane zesikole zimbondelana emiqashweni okungabeka impilo yazo engozini. INkandla inezakhamuzi ezingaphezulu kwezi-100 000 kodwa inezibhedlela ezimbili, okuyisimo esingabanzima kakhulu uma sebebaningi abantu abasuleleka ngalo mkhuhlane.
Ngaphezu kwalezi zinhlelo esesibe nazo, esabelweni soMkhandlu sezimali sonyaka wezimali ozoqala lulunye ngoNtulikazi, sikhuphule imali yokubhekana nezinhlekelele sayibeka ezigidini ezimbili zamarandi ukuze sikwazi ukubhekana nezimo ezinzima.
Konke lokho kuyimizamo yethu yokulekelela abantu bakithi eNkandla.