Uqinisekisa inhlanzeko uMasipala uMhlathuze
Ubone kulijoka lawo ukuthi njengoHulumeni uqikelela ukuthi izindawo zokuhlanganyela zihlanzekile
Isiko elihle esizosala nalo ungunaphakade ngalo mbhedukazwe wesifo ukhuvethe esihlasele umhlaba wonke, elenhlanzeko, obekuyinto ebese singayinaki kangako.
Umkhuba oyichilo owokuthi abantu bazi ukuthi izandla zihlanjwa kuphela uma uphuma endlini yangasese. Usuku beluphela umuntu engakaze ageze izandla ekubeni ziziningi izinto ezenziwa yizandla nokwenza zithwale uhlobo oluningi lokungcola. Ukuqinisekisa leli siko nokuqikelela ukuthi ngale kwenhlanzeko yabantu kodwa nezindawo abaphila kuzona nsuku zonke zihlanzekile, ukuze uma kwenzeka kungabi wumuntu ohlanzekile kodwa kube yindawo engenamagciwane. NjengoMasipala sibone kuyijoka lethu njengoHulumeni ukuqikelela ukuthi izindawo ezihlanganela umphakathi zikhathi zonke ziba ngezihlanzekile. Sikubeke emahlombe ethu ukuqinisekisa ukuthi amarenke amabhasi nawamatekisi ayahlanzwa kabili ngesonto ngezibulalimagciwane ukuze kuphephe izinkulungwane zabagibeli, amakhulu abashayeli nabanikazi bezithuthi zomphakathi kanjalo nendathane yabantu bakithi abaziphilisa ngokudayisa emarenke. UMasipala ubambisene nemboni yezokuthutha eMhlathuze ubone lokhu kusemqoka futhi awugcini ngamarenke aseMpangeni naseRichards Bay kuphela kodwa wonke angaphansi kukaMasipala kanjalo nalawo asezakhiweni zosomabhizinisi abazimele.
Okunye okusemqoka okwengeziwe emarenke ngamathangi amanzi okuphuza nokuhlamba izandla ngenxa yokuthi kuba nesiminyaminya ezindlini zangasese eziba semarenke. Wonke amarenke aseMhlathuze asenamathangi amanzi agcwaliswa nsuku zasa. Ngesonto eledlule sisayine isivumelwano sokulekelela uMnyango Wezemfundo KwaZulu-Natal ngokuthi sifake amathangi ezikoleni ezidinga kakhulu. Iningi lezikole zinawo amanzi kodwa ngenxa yemigomo enqala eqhamuke noHulumeni kazwelonke, kuqubuke isidingo sokuthi kwengezwe amanzi ezindaweni ezintulayo kanjalo nasezikoleni. Kuzovulwa izikole nje ngoMsombuluko, asikho isikole esizobe sisokola ngodaba lwamanzi ngaphansi kukaMasipala uMhlathuze.
Amahhovisi ethu ayisizinda somphakathi, ngakho kwawona kumele ahlale ehlanzekile ngaso sonke isikhathi. Kumanje sibheke emaphethelweni okuqinisekisa ukuthi yonke imigomo ebekwe uHulumeni yokulwa nokhuvethe iyalandelwa. Amahhovisi ethu asefuthwe ngezibulalimagciwane wonke ngaphambi kokuba kubizwe ibinzana lezisebenzi ebezisebenzela emakhaya.
Nazo lezo zisebenzi ziqale zayohlolwa emtholampilo wethu owelapha izisebenzi. Lokhu kwenzelwa ukuvikela zona uqobo kanjalo namakhasimende azoletha kumbe azocela usizo lukamasipala emahhvovisi ethu. Labo abazocela kumbe abalethe usizo, bazohlolwa izinga lokushisa emzimbeni, bahlanzwe nezandla baphinde bacelwe ukuba bangangeni emahhovisi bengawushuqulile umlomo namakhala ngesimfonyo. Lokhu kobe sekwelanywa umgomo webanga eligunyaziwe lokulandelana kolayini.
Ngaphezu kwalokhu, amahhovisi kaMasipala asefakwe izingqwembe ezikhanya ngale ezivikela izisebenzi kanye namakhasimende uma ezocela usizo.
Kunengxenye yezisebenzi esazothatha isikhashana ngaphambi kokuba zibuyiselwe emsebenzini nokuyileyo enezifo ezingamahlalakhona kanjalo nalabo asebeqinile ngeminyaka njengokokulawula kukaHulumeni ukuthi labo abaneminyaka yobudala esuka kwengama-60 kuya phezulu mabake bathi ukusebenzela emakhaya ngoba basengcupheni enkulu bona yokuhaqeka kalula yileli gciwane.
Luningi ulwazi ngalesi sifo esesiludlulisile emphakathini ngokusebenzisana namakhansela, abaholi boMdabu kanye nabamabandla ezenkolo ngezindlela ezahlukene zokufinyelela kubantu. Phezu kokuba imigomo ingakavumi ukuba kube nokhukhulelangoqo bemihlangano kodwa izindlela zesimanje zokuxhumana ziselekelela kakhulu ukufinyelelisa ulwazi kubantu. Isiko esifisa abantu bakithi balejwayele ngokushesha elokwenza izinto ngobuchwepheshe besimanje njengokusishayela ucingo uma bebika ngokuphazamiseka kwezinsiza zabo njengokuqhuma kwamapayipi kumbe ukucima kukagesi, ukusebenzisa izinkundla zokuxhumana ukubeka imibono yabo ngomsebenzi owenziwa uMasipala, ukusebenzisa izindlela zobuchwepheshe zokukhokhela izinsiza zikaMasipala kanjalo nokuthenga ugesi wekhadi ezitolo nasemagaraji kaphethroli.
Lena ngenye yezindlela zokuqikelela ukuthi umphakathi uyaluthola usizo lukaMasipala yize abantu besahlezi emakhaya. Ngisho ngabe ukusebenza kwezwe sekubuyele kokwejwayelekile kodwa lezi zindlela kumele zijwayeleke ukuze abantu bangazitholi sebemi emigqeni emide belinde usizo lukamasipala abangaluthola ngokusebenzisa iselula noma ikhompyutha. Ukuze lokhu kube lula, sizosebenza kanzima ukwengeza izindawo lapho kutholakala khona iWifi yomphakathi yamahhala ukuze sihlangabezane nomphakathi esiwusebenzelayo. Ukusungula kwethu inqolobane yokudla esisize abantu abangaphezulu kwezinkulungwane eziyishumi kungenye yezindlela zokwelekelela ukulwa nendlala kulabo abathikanyezwe wukuvalwa kokusebenza kwezwe bangakwazi ukuyozizamela bona nemindeni yabo okokuqhuba impilo. Le nqolobane sihlose ukuthi iqhubeke nokusebenza noma ngabe ukhuvethe seludambile kumbe selwedlulile ngoba indlala isazolokhu ikhona kweminye imindeni.
Inselele esibhekene nayo njengamanje njengoHulumeni kusukela esigabeni sikazwelonke, owesifundazwe kanye nathi emazingeni abantu, eyokulwa nokubhebhethela kwegciwane. Sibhekene nempi lapho isitha singakwazi khona ukusibona sibhekane naso ngqo eziqwini zamehlo kufe ofayo kodwa silwa nesitha esithathelana kalula ngomoya esiwuphefumulayo.
Ngochwepheshe kuphela abakwazi ukubona uma usunaso emuva kokuhlolwa. Ngenxa yokuthi yisitha esisha lesi kunzima ukulwa naso ngakho-ke sinxusa wonke umuntu ukuba athobele zonke izaba ezibekwa wuHulumeni wakithi ngoba ososayensi bathi iyona ndlela esingasinqoba ngayo. Iningi labantu bakithi liyayithobela imigomo yezwe nesikholwa wukuthi kuyalekelela ukunqanda ukubhebhetheka kwegciwane, bese kuba khona oTomase abakholwa ngokubona ababa ngongomuyayona ngaso sonke isikhathi.
Siyaninxusa muzi wakwethu ukuba nibe yizakhamuzi ezenza umehluko ekulweni nokhuvethe ngokuthobela imithetho eshaywa uHulumeni wakithi. Sizodlula kule nkilayitheka kodwa ukuthi sodlula nini kohlonzwa yithina uqobo ngokuziphatha kwethu.