UBUCIKO OBAQWASHISA UMHLABA
Izithombe zezigameko ezimqoka kuleli zaba ngumnikelo kubuciko kanye umlando nefagugu
Kwabanye abantu ubuciko bumele bube yinto ethize noma umuntu othize. Abanye baze basole ukuthi okuthile noma umuntu othile akalona iciko ‘langempela’. Omunye umkhakha abantu abaningi abangawubeki esigabeni sobuciko wukuthwebula.
Noma ngabe wumshando wosaziwayo, umngcwabo womholi othize, udlame nokuxokozela zweni, zonke lezi zindlela zokuthwebula zinento eyodwa efanayo, zonke ziqopha umlando ogcinelwa izizukulwane. Izazi kulo mkhakha zithi ubuciko bokuthwebula kondla ngokomphefumulo nengqondo, umthwebuli kanye naloyo osuke esebuka umsebenzi osuphelile.
Yenza bobabili babe nolwazi nokuqaphela lokho okubazungezile. Khona lapho bathi ukuthwebula kwenza umuntu akwazi ukubona okuhle nokubi ngoba phela nakhu kusuke kusesithombeni.
Empeleni kuningi okungabe siyakuqonda kangcono ukube isithombe salokho sinakho. Cabanga nje ukube kunesithombe siJesu Khrestu nomndeni wakhe sona eseLembe eleqa amanye amalembe ngaphandle komndwebo lo okuthiwa wadwetshwa yiphumalimi? Usho ukuthi ngabe kukhona ukungabaza ukube uLusifa uqobo lwakhe usesithombeni nengilosi uGabriel?
Lawa ngamandla esithombe sona esithi singaba khona sinike abantu ithuba lokuba nethuba lokuncoma nenkulumompikiswano ngaso. Bathi abanye isithombe asiqambi manga, bathi abanye siveza imibono eyizinkulungwane.
Emhlabeni jikelele zikhona izithombe ezathi uma zivela kwaguquka izinto. Zagqugquzela abantu ukuthi bajule ngokuthile nokuthi benze. Isithombe esashaywa nguMarch Ribound sentombazane yaseMelika uJan Rose Kasmir, ebhekene ngqo namagumgedlela eNational Guard ngaphandle kwePentagon nanamuhla sisabatshazwa yizwe sathathwa ngonyaka we-1967. Izithombe zeMpi yoMhlaba yeSibili nanamuhla zisaletha umuntu.
ENingizimu Afrika cishe zimbili izithombe ezikusho konke ngesikhathi esiphuma kuso. Esokuqala yisithombe esashaywa ngu-Ian Berry ngonyaka we-1960 ngomhla zingama-21 kuNdasa. Lesi kwabe kuyisithombe sesibhicongo saseSharpville kulandela ukudubula kwamaphoyisa ababhikishi ababebalelwa ezi-5000 kuya kwezi-7000.
UBerry ngaleso sikhathi wabe esebenzela iphephabhuku iDrum. Ubani ongakhohlwa isithombe soqweqwe lwentatheli, uMr Drum uqobo lwakhe uHenry Nxumalo sasejele. Lolu qweqwe lwentatheli lwahlela lungaqali ukuthi luboshwe ukuze luthathe izithombe ngempilo yaboHlanga emajele.
Konje ubani ongakhohlwa isithombe esanenjwa ngubaba uSam Nzima sangomhla ziyi-16 kuNtulikazi we1976. Kwabe kuyisithombe sabathathu. Yibhungu uMbuyisa Makhubu nentokazi u Antoinette Sithole.
Owayephuthunyiswa ngumfanyana uHector Peterson owadlakazwa yinhlamvu yamadlagusha kwaphela ngayo. Lesi sithombe sikaNzima saba wubufakazi bonya lukahulumeni wamandlagusha.
Knati nangeminyaka yedemokhrasi zikhona izithombe ezenza kuhlengezele izinyembezi nesithombe sesimo sicace bha. Isithombe sesibhicongo saseMarikana mhla zili-16 kuNcwaba ngowezi-2012 sikhumbuza noma ngubani ukuthi kwake kwanje nokuthi zalala izinsizwa, balala abamnumzane ngesandla salabo okwabe kumele kube ngabavikeli babo.
Wonke lo mlando neminye siwazi ngakho belu ngoba phakathi kwethu kunamaciko anekhono lokushaya izithombe. Nabo kumele bahlonishwe ngoba lokhu nje kuwumnikelo ekusabalaliseni ulwazi.