Kubuyekezwe ubuchwepheshe nesitayela kuBMW 5 Series entsha

AbakwaBMW bathi abaphathi bamabhizinisi sebenezidingo eziphezulu abazilindele emotweni abahamba ngayo kwazise isitayela sekumele sihambisane nobuchwepheshe nobumnandi bokushayela. Yingakho bethi iBMW 5-Series entsha izozifeza lezo zidingo.

Ushintsho abalwenzile kule BMW 5-Series luqala emathoshini abawanciphisile okuyenza ibukeke incane kahle ngaphambili. Afika nobuchwepheshe beLED kanti uma ufuna asezingeni eliphezulu abizwa nge-Adaptive LED anobuchwepheshe beMatrix noma uma ufuna anelaserlight, kumele wengeze imali. Igrille yayo bathe ukuyenyusa nokuyivula ngesakhiwo okuyenza ibukeke inamandla. Uyakwazi ukuyithola ineM-Sport ngokwesakhiwo okuyenza kucace ukuthi isitayela sihambisana nejubane. Uma uthanda enesizotha ukukhetha iLuxury Line enobucwebe nesizotha. Emathayini inesakhiwo esiqala ku-18 inch kuya ku-20 inch. Ngemumva inamathoshi awu L futhi anobuchwepheshe beLED ne-3D okuyenza ibukeke kahle uma ikhanya ebusuku. Zonke izinhlobo zifika namapayipi amabili emaceleni futhi ayisikwele obekuyisakhiwo ebesitholakala kumaM-Sport kuphela ngaphambilini. I-BMW M550i xDrive okungeyokugcina okwamanje, ifika nesakhiwo seM esehlukile futhi esidonsa amehlo kwazise isabambe izintambo kuze kufike iM5.

Alukho ushintsho olukhulu ngaphathakathi kwazise isakhiwo sayo besihamba phambili. Banyuse usayizi wesibuko somsakazo (Control Display Infotainment Touchscreen ) waba u-10.25 Inch futhi uyakwazi ukwenza udlulele ube u-12.3 inch. Isiqandisi esilawulwa ngokuhluka kubagibeli (multi zone climate control), isiteringi seSport esinesikhumba futhi nesakhiwo esisha sifika kuzona zonke izinhlobo. Ukukhanya kweLED Ambient Lighting kwangaphakathi kwenza ushintshashintshe imibala yokukhanya ezindaweni zangaphakathi okwenza ukuhamba ngeBMW 5-Series ebusuku kube sengathi usemkhathini.

Ubuchwepheshe bokuxhumana busebenzisa iBMW Operating System 7 obungobesimanje buhlanganisa iselifoni yakho nemoto i-Android Auto noma i-Apple CarPlay. Lokhu kwenza iBMW 5-Series ikwazi ngisho ukuthumela umyalezo kwabosizo lokuqala uma uba sengozini, ngisho uthule noma ulimele ungakwazi ukuzisiza wena. IBMW Intelligent Personal Assistant yenza ulawule ukusebenza kwemoto yakho ngokukhuluma nayo nje bese yenza lokho okushoyo. Ubuchwepheshe beWi-fi benza abagibeli bakwazi ukuxhuma ku-5-Series uma befuna ukungena ezinkundleni zokuxhumana.

Okwamanje zintathu izinjini i5Series entsha ezofika nazo kumakethe yaseNingizimu Afrika. Kuqala nge-520d enenjini kadizili oyi-2L onamasilinda amane namandla awu-140kW/400Nm. Lokhu kwenza isuke ku-0 iye ku100km/h ngemizuzwana eyisi-7.2 igcine kuma-235km/h ibe idla amalitha ama4.3 ebangeni elingama-100km. I-530i edla uphethroli yona inenjini eyi-2L onamasilinda amane namandla awu185kW/350Nm okwenza isuke ku-0 iye ku-100km/h ngemizuzwana eyisi-6.4 igcine ku-250km/h ibe idla amalitha ama5.5 ebangeni elingama-100km. Okuyiyona ephethe kuma-5 Series okwamanje yiM550i xDrive enenjini ewu-4.4L awu-V8 anamandla angu-390kW/750Nm eyenza isuke ku-0 iye ku-100km/h ngemizuzwana emi-3.8 imiswe ku-250km/h ibe idla amalitha ali-10 ebangeni lama-100km. Zonke lezi zinjini ezifika nalolu luhlu lwemoto zineTwinPower Turbo futhi zonke zinogiyebhoksi onamagiya ayisishiyagalombili ozishintshayo (8-Speed Steptronic Automatic). I-520d ne-530i zidonsa ngamasondo angemumva bese kuthi iM550i yona idonse ngamasondo amane (xDrive).

I-BMW 5-Series entsha izofika eNingizimu Afrika phakathi kukaMfumfu noLwezi wezi-2020.