Ayikaze ilubhade kubo ngumculo osalibhadile
Uchazwa ngezindlela ezahlukene. Uyindondakazi yolahleko e-Afrika. Ubuhle nesizotha buhambisana nomculo wakhe opholile wesigqi sePop, Soul neSmooth Jazz osudayise izigidi emhlabeni jikelele.
Abanye bachazwa indlela esiteji anandisa ngayo njengoba ebuye azihambele ngezinyawo. Abanye bakhala ngokuthi yize eyisihlabani kodwa uyifihlile impilo yakhe yangasese njengoba engatholakali esenamekwa emaphepheni njengabanye osaziwayo.
Okunye okwehlukile ngaye ukuthi akakhiphi i-albhamu iminyaka ilandelana njengoba kwenza amanye amaciko. Kanti futhi kubukeka nabalandeli bakhe bokuqina sebakwamukela ukungabaxini kwakhe ngomculo omusha njalo njengoba besaqhubeka nokumeseka kule minyaka engama-38 esemculweni.
Lowo uSade, abazali bakhe abamqamba ukuthi uHelen Folosade Adu ngesikhathi bemletha emhlabeni eminyakeni engama-61 edlule.
Okwenza abalandeli bakhe bembize ngendodakazi yolahleko ukuthi yize inkaba yakhe ise-Afrika (wazalwa e-Ibadan eNigeria), akakaze anandise kuleli lizwekazi. Uyise wayefundisa enyuvesi yangakubo eNigeria kanti unina oyiNgisi wayengumhlengikazi.
Bahlangana eLondon ngesikhathi befunda base bethuthela eNigeria lapho bazala khona lo mculi. Ngemuva kokuthi sebehlukene abazali uSade wathuthela e-England nonina nomfowabo.
Ilapho uthando lomculo lwahlala enhliziyweni yakhe njengoba wakhula elalela umculo woCurtis Mayfield, uDonny Hathaway noBill Withers. Esemncane esebenza endaweni edayisa utshwala ngezimpelasonto, wathathwa indlela iJackson 5 eyayishiya izethameli zifuna impinda uma zinandisa eRainbow Theatre eFinsbury Park.
“Indlela abebenza izethameli zingabi nasinqe yangichaza kakhulu.
Leso sitayela ngasithatha ngasifaka emqondweni wami. Ingakho uma nginandisa ngifuna ohambele umgidi wami ajabule nami,” usho kanje.
Nokho umculo kwakungeyona into ayeyihlosile. Wafundela ezemfashini ngaphambi kokuthi abanye abangani bakhe bamnxenxe ukuba azolekelela ngephimbo kwelinye iqembu, iPride.
Ilapho-ke athola ukuqeqesheka nokudlondlobala njengoba babezungeza i-UK benandisa ngezingoma ezipholile zigabe ngesigqi seJazz. Kulo mzungezo ingoma uSade ayibhala ethi Smooth Operator yathandwa kakhulu izingqapheli okwenza nabahlwayi bamakhono bezinkampani zokuqopha bamshela ubuthaphuthaphu.
Ngenxa yokuthi wayethembekile kwiPride wanqaba ukuyishiya kodwa ngemuva kwezinyanga ezili-18 lwagcina lugobile uphondo wajoyina i-Epic Records.
Wabeka umbandela wokuthi uzosayina namanye amalungu amathathu ePride. Nebala uStuart Matthewman ofutha iSaxophone, u-Andrew Hale oxebula iKeyboard noPaul Spencer Denman odendebula uBass Guitar bamlandela.
Yazaleka kanjalo-ke iSade.Wena owabona isivinini semoto eshayelwa uMichael Schumacher, isingle yokuqala yabo iYour Love Is King eyaphuma ngowezi-1984, yangena ngeshodi emsakazweni nakumathelevishini aseBritain. Yaqala kanjalo ukushintsha impilo yakhe neyamalungu njengoba namanje besahlonishwa. Amaphephabhuku ayebangisana ngaye efuna ukufaka ubuso bakhe kuwo kanti ayephela ubuthaphuthaphu emashalofini.
I-albhamu yakhe youkuqala egcwele wayikhipha ngowezi-1984 esihloko esithi Diamond Life, yayiqukethe izingoma ezathandwa kakhulu njengayo i”Smooth Operator”, “Hang On to Your Love” ne”Why Can’t We Live Together”.
Wake wabuzwa ngalo mkhuba wakhe wokunyamala ngemuva kokuqeda i-albhamu esihloko esithi Soldier of Love ngowezi-2020 nokungesayokugcina ayikhiphile. Wathi: “Uma ngipheka umculo angenzeli ukugcina icala. Ngingena estudiyo uma ngifikelwa umuzwa wokuthi kunomyalezo okumele ngiwudlulise. Angithandi ukwenza umculo ngoba ngifuna udayiswe nje.”
Akwaziwa ukuthi mhlazane leli qhawekazi lamemezela ukuza okokuqala e-Afrika kogcwala kangakanani.