Ukufriza amakhekhe
Ngeviki eledlule, sicobelelane ngezindlela okuyizona zokufriza ukudla. Umlandeli wale ngosi, nozichaze njengombhaki osafufusa, uMncedisi Njongo, wangibhalela i-imeyli ecela ngichaze ngendlela yokufriza amakhekhe. Lokhu ukuceliswa ukuthi uke wazama ukufaka ikhekhe kufriza, kodwa laphuma linobumanzana mhla eselikhipha esezilungisele ukulidla. Kuyiqiniso ukuthi kunendlela ethize okumele asongwe aphinde apakishwe ngayo amakhekhe uma ezongena kufriza. Ngibone kungumbono omuhle ukuthi sicobelelane ngalokhu engosini yanamuhla. Ngiyethemba la masu azoba ngusizo nakuwena. Nansi-ke indlela:
1. Umthetho wokuqala, nobaluleke kunayo yonke ukuthi kufanele liphole ngokuphelele ikhekhe ngaphambi kokuthi lifakwe kufriza.
2. Okwesibili, songa ikhekhe ngecling wrap okanye iphepha lokubhaka (bona isithombe ngezansi). Qinisekisa ukuthi ikhekhe lisongeke ngokuphelele, kungabikhona neyodwa indawo lapho ikhekhe lingavalekanga khona kahle.
3. Okulandelayo, kuzobe sekulandela ukusongwa ngefoil. Ikhekhe liphuma kube ngathi liqeda ukubhakwa emva kokuhlala izinyanga ezintathu kufriza. Kuyasiza ukubhala ngaphandle kwefoil usuku okumele lidliwe ngalo ikhekhe ukuze lingahlali ngokweqile. Kulula ukulibala ukuthi lafakwa nini emva kwesikhathi eside. Songa libukeke nengesithombe esingezansi ikhekhe lakho.
4. Uma usulisongile ngefoil ikhekhe, lifake esitsheni esifanele ukungena kwi-friza, nesivaleka ngci. Uma ungenaso isitsha esikhulu ngokwanele, ungaphinda usonge nge-foil yesibili. Qiniseka ke ukuthi umbhalo uba kufoil engaphezulu ukuze ukwazi ukubona. Selilungele ukungena kwi-friza ikhekhe.
5. Uplastiki (noma iphepha lokubhaka) osonga ngawo ikhekhe uqinisekisa ukuthi ikhekhe lihlale li-fresh. Kanti ifoil ivikela umswakama ukuthi ungafinyeleli ekhekheni uqobo. Isitsha siqinisekisa ukuthi ikhekhe lingathinteki, nokungaholela ekutheni lifadabale, lishintshe isimo salo.
6. Kunendlela futhi yokukhipha ikhekhe uma selilungele ukudliwa. Likhiphe namuhla uma lizodliwa ngakusasa. Uma ulikhipha kufriza, likhiphe esitsheni ulibeka efrijini. Ikhekhe lidinga okungenani amahora ayisishiyagalombili lisefrijini ukuze lincibilike ngokuphelele. Ikhekhe lincibilika kahle kakhulu uma lihlezi efrijini kunokuba lingaphandle, nakuba kuthatha isikhashana.
7. Kubalulekile ukuthi lihlale lisongekile ngesikhathi lincibilika efrijini, ukuvikela umswakama ukuthi ungathinti ikhekhe.