Ukhala ngegebe phakathi kwababhali abasha nabadala
Umbhali wezincwadi zesiZulu ufisa kuvalwe igebe elikhona phakathi kwabancane nababhali abanohlonze abadala. UMuntomuhle Mcambi, obukeka engene ngeshodi emkhakheni wokubhala izincwadi, izinkondlo nemidlalo yomoya emsakazweni Ukhozi FM, ukholwa wukuthi intsha ingancela embeleni ogwansile uma ingasondezwa kubabhali abadala. Kweminye imisebenzi uMcambi ayenzile ukulekelela ngokuhlela izincwadi abuye abhale ngokuhlanganyela nozakwabo.
Incwadi eyathakaselwa kakhulu engomlando wesilomo sikamasikandi uKhuzani “Indlamlenze” Mpungose, uMncambi wayisebenza ngokubambisana no-Eric Ngobe, oyintatheli emnkantshubomvu.
UMcambi, oneminyaka yobudala engama-32 nodabuka esigodini oBunjaneni, eMtubatuba, ozifelayo ngezilini zamaNguni, uthi kuyamkhathaza ukuthi ababhali abafufusayo abakwazi ukuncela ulwazi kwabadala. “Leli gebe lingiphathisa ngekhanda ngoba ngikholwa ukuthi kukhulu esingakuncela kubantu abafana noSolwazi uDBZ Ntuli, uSolwazi uSibusiso
Nyembezi, uNcamisile Makhambeni noJohn Kani. Kusamele kwenziwe imizamo yokuthi thina bantu abasha sisondezwe kulezi zincithabuchopho ukuze sihabule. Isisho sithi indlela ibuzwa kwabaphambili. Ngikholwa ukuthi umsebenzi wabo omuhle abawenzile singakwazi ukuthi ulondolezeke uma bengasincelisa ulwazi lwabo,” kusho uMcambi.
Uveze ukuthi uthando lokubhala lwamqala kubo njengoba uyise uMnqandeni Mcambi engusomlando. “Ubaba akafundanga kodwa unekhono eliyinqaba lokuxoxa umlando onothile. Bekuthi uma engixoxela ngilokhu ngivukwa ugqozi ngase ngibona ukuthi kumele ngikuqophe phansi konke engibona ukuthi kungaba usizo kubantu bakithi. Ingakho ngahlanganisa umlando kwaphuma incwadi esihloko sithi “Umlando WaMacambi” ekhishwe eminyakeni edlule,” kusho uMuntomuhle.
Mayelana nabantu abukela kubo, ubale lezi zingwazi akhalela ukusondeza eduze kwazo, wathi. “Laba babhali banendlela yabo ababeka ngayo udaba. Bayakwazi ukuthatha babeke ngomqondo umuntu okubhalwe ngabo. Ngisho nendlela izisho nezaga abazisebenzisa ngayo abavele bazigaxe noma ikuphi. Banobunono nesisoka sokubeka into.”
Phakathi kwemisebenzi aseyenzile kunencwadi yezinkondlo ethi Ngithweseni Umqhele ebhalwe uMnu uNkosiyazi Radebe noNks uZwakele Gumbi, umdlalo Ugovana Kagovana obhalwe uMnu uMbusiseni Bhenya, Isibeletho Nethuna okuwumdlalo obhalwe uMnu uSanele S Mzimela.
INgiyabonga Mama Nobaba – okungumdlalo oqukethe iqiniso (non fiction) kaMnu uLindani “Leeh” Hlophe. Amanoveli esiZulu asihloko sithi “Ngithwaliseni” kaMnu uZanele Phakathi nethi Impande Yothando kaMnu uThulani KaPhumuza Seme aphuma esandleni sakhe. Wenze namaqoqo ezinkondlo Impokophelo neKujamelene Izingqwele kaMnu uSipho “S.J.S.” Nene, iqoqo lezincwadi zikaMnu uLwazi Cele Izidlamlilo neyakhe esihloko esthi Intengo Engatheni.
Nencwadi enamazwi okukhuthaza esihloko Motivations kaMnu uNzuzo Phakathi uyisebenzile. Ezinye zalezi zincwadi ukhulumile ngazo emsakazweni ehlukene.
Ngaphandle kokuba umbhali wezincwadi elinye ikhono lakhe ulivezile emsakazweni njengoba eqeqeshwe kuDurban Youth Radio kanti useke walunguza nakuVuma 103 FM esebenza njengentatheli ezimele.
Okhozini FM ubhale umdlalo womoya othandwe kakhulu osihloko Buchitheka Bugayiwe obungena njalo ntambama phakathi nesonto. UMcambi, osenenkampani Iziko Art Publishers Company (Pty) Ltd ekhiqiza izincwadi noyilungu eliqavile le-EThekwini Reading Camp; Writing Club, useke wahlabana emncintiswaneni i-Avbob Poetry ngenye yezinkondlo zakhe ezahlaba umxhwele amajaji.