Wabanjwa engazelele uBenni
UBenni McCarthy usephumele obala okokuqala ngesizathu esenza wakhishwa ngemizuzu yokugcina kuBafana Bafana eyayizodlala kuFifa 2010 World Cup.
Kwahlukana imibono ngesikhathi le ntandokazi eyayingalibheki ipali ishiywa ngaphandle ngumqeqeshi uCarlos Alberto Parreira.
Imibiko eyasabalala yathi uMcCarthy nonozinti uRowen Fernandez bajeziselwa ukungaziphathi kahle besekhempini iNingizimu Afrika idlala owokungcweka neColombia.
Kwathiwa babhadanywa befake amantombazane ehhotela, okuyinto ehunyushwa ngokuthi kuphulwe umthetho.
Okunye okwavezwa ithimba labaqeqeshi bakaParreira ukuthi uMcCarthy, owayedlalela iWest Ham esuka kuBlackburn Rovers e-England ngaleso sikhathi, wayenonile.
Nokho kuleli sonto uMcCarthy ubeke uhlangothi lwakhe ekhuluma nabeSouth African Football Journalists Association (Safja).
“Angeke ngibakhohlwe laba baqeqeshi baseBrazil. Babeka izaba zokuthi nginonile futhi angikho qatha ngokwanele. Mhlawumbe babeqinisile kodwa ejimini ngangibaba njengopelepele nezitobha zingakufakazela lokho. Leliya qembu elalihlanganiswa ngaphambi kweWorld Cup lalilihle impela. Ngabe kungcono ukube uCarlos wangitshela ukuthi angenzi kangcono kunomunye uzakwethu kunokuthi ahubhuze amanga,” kusho uMcCarthy.
Eqhubeka uthe: “Nasi isizathu engicabanga ukuthi senza u-Alberto angivalele ngaphandle. Ngesikhathi esanda kuthatha umsebenzi wayephakamise ukuthi akwenziwe ikhempu eBrazil izinyanga ezintathu. Wayefuna thina esasidlala e-Europe sibe ingxenye yekhempu.
Ngikhumbula ukuthi abantu bokuqala abavakashela kwakuyimi noAaron Mokoena kuBlackburn Rovers. Umphathi weRovers washaya phansi ngonyawo wathi angeke asivumele siyohlala izinyanga ezintathu. U-Alberto wanginxenxa ukuthi ngifake ingcindezi ekilabhini ukuze ngidedelwe. Manje kumele abantu bakuqonde ukuthi abantu abangiholelayo iBlackburn. Uma benginqabela ngizothini mina? Naye ngamtshela umqeqeshi lokho. Ngaleyo ndlela ngikholwa ukuthi wacabanga ukuthi angiwuhhoyi umyalelo wakhe.
Ingakho ngibona ukuthi wajabula wafa ngesikhathi sekufike isikhathi seWorld Cup wathi uzongibamba la ngimncane ngakhona.”
Uthi ukholwa ukuthi wavala abaningi imilomo ababecabanga ukuthi usephelelwe ushatini ngesikhathi efika ku-Orlando Pirates ngowezi-2011 egila izimanga yize wayethe ukunonophala. Wanqoba izicoco ezintathu neBucs.
Uthe ukukhishwa kwakhe namanje eqenjini leBafana Bafana kusafana nesilonda esinsonsothayo kwazise wayefuna ukuqopha umlando ngokudlala kulo mqhudelwano omkhulukazi amahlandla amathathu.
Wayekhona eFrance ngowe-1998 naseSouth Korea/Japan ngowezi-2002. UMcCarthy uthe kungamampunge ukuthi wafaka amantombazane ekhempini. Lo mlisa ozalwa eHanover Park, eCape Town, kusenguye namanje kuleli osanqobe isicoco esilangazalelwa iwo wonke umdlali emhlabeni.
Waphakamisa indebe ye-Uefa Champions League neFC Porto bedlule emaqenjini amakhulu njengoManchester
United, iReal Madrid neChelsea ngowezi-2004.