Izovala isikhala semeneja iBSA
Sekulindwe ukuba kuphele ukhuvethe bese kuqokwa imeneja entsha yakwaBoxing South Africa (BSA) ezovala isikhala esivuleke ngokushona kukaFrancis Manning.
UManning udlule emhlabeni ngoMbasa ngemuva kokuxinwa ukugula. Ubethathe indawo kaLes Andreason owathatha umhlalaphansi ngonyaka odlule.
USihlalo weBSA, uDkt Peter Ngatane, waveza ukuthi uma seludlulile ukhuvethe bazokwenza inkonzo yokubungaza iqhaza alibamba uManning. Ikhono likaManning, obekhonze ukufuya, lamenza waqokwa njengonompempe nejaji ngaphansi kweAfrican Boxing Union neWorld Boxing Council. Yize konke sekulele kuBSA ukuthi iqoka bani ozobamba amatomu okwesikhashana, kodwa umthombo waleli phephandaba uhoshe ukuthi abaqeqeshi, izimeneja nosomankomane imbala bafisa kuqokwe uBonginkosi Eric Khoza.
UKhoza, odabuka kwaCele Avenue eLamontville, usedonse iminyaka engaphezulu kwengama-30 ezihlanganise nezamankomane. Usebenza njengejaji nonompempe. Wayesebenza ngaphansi kuka-Arthur Nxumalo noMaurice Owen ngezikhathi zeBoxing Control Board neBoxing Commission njengoba le nhlangano engamele isibhakela ezweni sekuyiBSA. UKhoza, ongaxoxa ngomlando wesibhakela kuze kushone ilanga, uqale esigabeni sama-amesha lapho edlalise abantu abanjengoPhilip “Time Bomb” Ndou, uCassius Baloyi noMoruti Mthalane ngaphambi kokuba ngompetha bomhlaba.
Elinye igama elivelayo kwabangahle bagixabezwe lesi sikhundla elikaSipho Ndaba Zondo. Nayo le nsizwa yasoLundi isebenza kuBSA njengejaji nonompempe kanti ineminyaka iyibambile ishisa.
Kodwa okungenza ingaphusheki kulesi sikhundla wukuthi iqashwe ngokugcwele kwaMasipala Ethekwini.
Bethintwa oZondo noKhoza ngokumataniswa kwamagama abo nalesi sikhundla, bathe akukho muntu wakwaBSA oseke wabathinta.
Nokho uKhoza uthe uma iBSA imjuba ukuba athathe umsebenzi, wokwamukela lokho ngezandla ezimhlophe.
“Isibhakela sisemithanjeni yegazi lami.Noma ngabe ngingabizwa phakathi nobusuku kuthiwe angenze umsebenzi walo mdlalo, ngingavuka ngokushesha,” kusho le nsizwa abasondelene naye abayibiza ngeS’lovas saseKasi.
Uma uyimeneja yeBSA ezifundazweni eqhatha kuzo okwenzayo ukuthi imigudu nezimfuno zilandeliwe yini abafuna ukuqhatha izimpi. Nokucophelela ukuthi amalayisensi okulwa nokuqhatha anikwa abantu okubafanele yini.
IBSA ithunyeliwe i-imeyli mayelana nezinhlelo zayo ngesikhundla. Ibingakabuyeli ephephandabeni.
Khonamanjalo, yize uNgqongqoshe Wezemidlalo Nokungcebeleka, uMnu uNathi Mthethwa, ememezele ukuthi imidlalo efana nombhoxo nonobhutshuzwayo isingabuyela ensimini, kodwa esibhakeleni akukavulwa. Ukujima kosomankomane kudinga ukuthi abantu bathintane ngokushayana kanti basebenzisa kakhulu izithibagalelo belekelelwa abaqeqeshi nabasizi babo.
IBSA ithe bazothumela ithimba elizohlola ukuthi iyalandelwa yini imithetho ebekwe uHulumeni ukuqinisekisa ukuthi abantu abazitholi sebetheleleka ngegciwane. Le nhlangano ibuye yaveza ukuthi bali-12 abaqeqeshi nosomankomane ezingaphumelelanga izicelo zabo zemali yesibonelelo sikaHulumeni. Ithe isifake isimangalo kanti sekumincelwe impendulo.