Usuku lokugcina lwezicelo zesibonelelo kwezemidlalo
UMengameli weKwaZulu-Natal Sports Confederation uThami Mchunu (osesithombeni) uthe kusizile ukuthi kuhlehliswe usuku lokubhalisela izicelo sezibonelelo kalabo abaziphilisa ngezemidlalo KwaZulu-Natal, iKwaZulu-Natal Provincial Relief Fund, esixhaswe nguMnyango Wezemidlalo Nokungcebeleka esifundazweni.
UMchunu usizana nabacwaningimabhuku abazimele ukuze kuqinisekiswe ukuthi izinto zisebenza ngononina yini ekulethweni kwezicelo.
Ukulethwa kwezicelo bekulindeleke ukuthi kugcine ngoLwesihlanu olwedlule, kodwa ngenxa kokuhamba kancane kokubhalisa uMnyango Wezemidlalo, Ubuciko, Amasiko Nokungcebeleka oholwa uMhlonishwa uHlengiwe Mavimbela wathi namuhla akube yilona usuku oluwumnqamulajudu.
“Sikhuphuke kakhulu isibalo sabantu ababhalisile. Engingakusho abantu abaqondi ukuthi kungani abantu bekusabhalise abantu abangama-400 ngeledlule, okwenza kube njalo ingoba uma kubhalisa onompempe abadlalisa ngaphansi kweLocal Football Association (LFA) noma kuthiwa bangama-50 kodwa sibabala njengomuntu oyedwa. Kodwa kusebenze kakhulu ukululwa kokubhaliswa njengoba, zingaphezulu kwama-750 izinhlangano ezibhalisile okusho ukuthi abantu abazohlomula bangaphezulu kwabayizinkulungwane ezimbili (2000) nakhona ngiyahlawumbisela,” kusho uMacingwane.
Abantu okumele bafake izicelo abadlali, abaqeqeshi, yizimenenja, ngabanye osomaqhinga nongoti bezokulolongwa kwemizimba bonke abazithola bekhahlanyezwe wukumiswa nokuhoxiswa kwezemidlalo ngenxa yokubheduka kokhuvethe.
Okuzophasa izicelo zabo yilabo abangakaze bathole lutho esikhwameni esifanayo somnyango wezemidlalo kuzwelonke kanti kufanele baphinde banikeze nobufakazi bokulahleka kwemali engenayo njengoba kume yonke into.
UMchunu uthe: “Yize kubukeka zizovuleka izinto kulaba amadlala ezigabeni ezikhokhelwayo, kodwa iqiniso lithi kuzoba buhlungu kwazise konke kuqala esigabeni sama-amesha. ICorona isibulele kakhulu kwazise beziningi izinhlelo ebezikhona zokuthuthukisa ezemidlalo kulesi sifundazwe”.