Inhloko ithwalwa ngumqala nakwezikanobhutshuzwayo
Kubukeka kuzoguquka ukucabanga indlela abasizi babaqeqeshi bebebukwa ngayo ebholeni laseNingizimu Afrika.
Phambilini abasizi bebethathwa njengabantu abangenazwi ezinqumweni ezifana nokuboshelwa kwesikimu nokuqhamuka namaqhinga.
Obekugqama bebefana nabantu umsebenzi wabo wukuqoqa amabhola uma sekuqedwe ukujima noma umdlalo.
Uma kubhekwa amaqembu amakhulu kuPremiership, amane aqashe abasizi abanamava njengoba phambilini bake baba izinhloko zabaqeqeshi.
IMamelodi Sundowns iholwa uPitso Mosimane owalanda uManqoba Mngqithi eshiye kuGolden Arrows eminyakeni eyisithupha edlule.
Ku-Arrows kunoSteve Komphela onobudlelwano obude noMandla Ncikazi oyisekela lakhe. Abanye babateketisa ngokuthi ‘inqola noseyili.
La madoda aqala ukusebenzisana kuFree State Stars babuye baficana kuMaritzburg United njengoba sebehlangene kuBafana Besithende.
Njengoba uNcikazi eseyisekela nje, wake waba inhloko kuMaritzburg kanti ubeseka uClinton Larsen ngaphambi kokulandwa kukaKomphela.
U-Ernst Middendorp uthe engabuyiswa kuKaizer Chiefs walanda uShaun Bartlett, oseke wahlala esigqikini se-Arrows ayibuyisela kuPremiership ngowezi-2015.
UJozef Zinnbauer ufikele kuFadlu Davids ongamsusanga kulesi sikhundla kanti izinto zesiqala ukulunga njengoba besitshekile isimo.
UDavids uzakhele igama efaka iMaritzburg kufayinali yeNedbank Cup wabuye wayifaka ku-Top 8.
KuHighlands Park u-Owen da Gama ulande u-Allan Freese, owanqobisa izindebe iPlatinum Stars.
Ngokubona kukaNcikazi amakilabhu akuleli aseguqule ukwenza ngokuqasha abantu asebegudlile ukuqinisa amabhentshi awo.
“Umsebenzi wokuba isekela ave umnandi futhi unezinselelo zawo. Ibhola lesimanje alizidingi izimfunda makhwela. Umthwalo nengcindezi eyehlela ezinhlokweni zabaqeqeshi ziyefana nakithina basizi.”
Okokuqala abantu okumele bakuqonde wukuthi iSundowns iqembu elikhulu kabi kanti futhi nomsebenzi owenziwa uPitso muhle. Ngihlale ngitshela abantu ukuthi uPitso usebenza kanzima.
Eqhuba uNcikazi, owafundela ubuthisha nowake wadlala ku-African Wanderers, uthe. “Miningi imisebenzi ebhekene nezinhloko. Ngaphandle kokuqeqesha kumele babe wubuso bekilabhu ingakhoke bedinga abanye abantu abazobacobelela ngeminye imiqondo.”
Akakuphiki ukuthi basekhona abanye abasizi abahudula ngesimabomu izinyawo ngoba befuna inhloko yehluleke emsebenzini wayo.
Uthi ezinye zezimbangela zalokho ukuthi mhlawumbe inhloko isuke ingamethembi lo emficile, okudala ukuthi ukuthembana nokuzwana kungabi bikho.
Ngokubona kukaNcikazi kumele zinconywe izikhulu ngokukhuphula abaqeqeshi abancane ukuze bancele ulwazi kwabadala.
“Uma ubheka kuPirates kuhambe uMicho, uRhulani Mokwena wanikwa amatomu. Phesheya uPep Gaurdiola washiya iBarcelona uTito Vilanova wayithatha indawo yakhe. KuReal Madrid kwahamba uCarlo Ancelotti kwafika uZinedine Zidane wagila izimanga.”
Yize abaningi bethi uMngqithi uyakuncishwa ukunconywa njengoba kuhlale kutuswa uMosimane, leli sekela linomunye umbono.
“Okokuqala abantu okumele bakuqonde wukuthi iSundowns iqembu elikhulu kabi kanti futhi nomsebenzi owenziwa uPitso muhle. Ngihlale ngitshela abantu ukuthi uPitso usebenza kanzima. Kodwa-ke impumelelo yasebholeni ayincikile kumuntu oyedwa. Siyadingana kodwa kumele ngimhloniphe ngoba nguye osiholayo. Ngaphandle kwethu futhi kunenqwaba yabantu esisebenzisana nabo abakhathula enkulu indima ekuphumeleleni kweSundowns.”
Mayelana nokuthi kungani engafuni ukuphindela ekubeni inhloko yabaqeqeshi njengoba awenza lo msebenzi ku-Arrows, iChippa United naMaZulu FC, uMngqithi uthe weneme kwiSundowns njengoba ephethwe kahle uMengameli uPatrice Motsepe.
“Akhona amaqembu aseke anginunusela ngemali kodwa ngazibuza ukuthi njengoba ngiseqenjini elenza into engiyithandayo-ukuwina nokuhlala kufunwa ukuzuza okungaphezulu, kungani kumele ngishiye?,” kusho lo mqeqeshi odabuka eMzimkhulu.