Intsha eyizintatheli iyayekethisa
Esikhathini samanje kufanele kube nezinguquko ezihambisana nesikhathi ngaphandle kokulahla umongo wobuntatheli. Yize indlela ibuzwa kwabaphambili kodwa intsha eyizintatheli kufanele iqondisise izinselelo ezikhona manje ibhekane nazo mahlanze ngaphandle kokwesaba njengoba ibonakala iyekethisa ingahlali amagqoza kokuhlupha imiphakathi.
Likhulu iqhaza elabanjwa yizintatheli zaboHlanga ngesikhathi somzabalazo wenkululeko eNingizimu Afrika. Ngalesi sikhathi izintatheli ezazibhala ngezinto eziphambene nobandlululo zazigqunywa emajele, zihlukunyezwa ngenhloso yokuzivala umlomo.
Phakathi kwazo singabala uMnu uPhil Mthimkhulu, uMnu uZwelakhe Sisulu, uMnu uMathatha Tsedu, uMnu uJoe Thloloe, uMnu uThami Mazwai, uMnu u-Aggrey Klaaste, uMnu uPercy Qoboza nabanye. Laba bangamavulandlela ebuntathelini kodwa ngabe isizukulwane sezintatheli samanje siyahamba yini ezinyathelweni zabo?
Njengoba kule nyanga kubungazwa intsha yangowe-1976 eyadela impilo yayo ilwela ubulungiswa yabhikisha eSoweto, eGoli, kwabulawa inqwaba uHulumeni wobandlululo, ngabe intsha esebuntathelini isalibambile yini iqhaza ekuthuthukiseni iNingizimu Afrika? Okwehlukile manje wukuthi akusalwelwa inkululeko yokuphatha izwe kepha eyokulikhulula ngakwezomnotho, ukulwa nobubha, ubugebengu, izifo nokunye.
Izintatheli zingalibamba kanjani iqhaza kulo mzabalazo uma izikhungo zabezindaba zisaphethwe ngabezinhlanga zabadla izambane likapondo? Inselelo ikubahleli bezikhungo zezindaba ukuba bahlelembele izintatheli indawo ekulungele ukusebenza ngokukhululeka.
Kodwa nabahleli boHlanga kuncane abangakwenza kwazise amandla akubanikazi abanezinhloso zabo Nokho lesi simo asiqali manje bakhona ababhekana naso phambilini futhi bamelana naso. Isibonelo nje, owayenguMhleli wephephandaba iThe World, uMnu uPercy Qoboza, wayengahlonizi ukugxeka uHulumeni wobandlululo kepha esebenza ngaphansi kwesimo esiqinile sokulawulwa kwezindaba sabamhlophe esasibheka okufanele kushicilelwe. Ngesikhathi leli phephandaba livalwa umlomo ngowe-1976 uQoboza waphoqeleka ukuba esule kodwa wayengomunye waboHlanga ababelwa nobandlululo ababekwazi ukusebenza ngaphansi kwesimo esasingabavumeli.
Okuphawulekayo ngomzabalazo walaba ukuthi okwabo kwakungeyikho ukuphatha noma ukuba namandla okuhlela izindaba kepha kwakunentshisekelo yokukhulula aboHlanga emaketangeni obandlululo. Kubonakala ngokuthi babengakweqeni ukuboshwa ngenxa yomzabalazo wabo.
Usuku lwangomhla zili-16 kuNhlangulana we-1976 intsha yazibonakalisa ngalo ukuthi inawo amandla okulwela ekufunayo ngisho ngabe isimo sinjani. Lesi yisibonelo okufanele izintatheli nabahleli boHlanga banamuhla abayintsha babukele kusona. Iningi lentsha eyayiyingxenye yombhikisho wangowe-1976 kwangubafundi kodwa bakwazi ukuyibamba ishisa.
Inkinga-ke abahleli bezindaba kuvamise ukuthi banikwe lezi zikhundla ngenxa yamava abo kwezobuntatheli kungabhekwa ikhono lokuphatha. Nayo le mboni inecala lokungazithuthukisi izintatheli ngakwezokuphatha. Okunye, abahleli abasenalo izwi ngentatheli okumele iqashwe ngoba kulawula isimo sezimali senkampani. Ngenxa yobuthuntu ekuphathweni kokuhlelwa kwezindaba sibona lehla izinga lezindaba kulesi sikhathi. Ukwehluleka kwabahleli ukubeka phambili izidingongqangi zomphakathi kuyimbangela yokuthi ungabonakali lowa mfutho wamavulandlela ayekwazi akulwelayo.
Lesi simo sihlasele kakhulu amaphephandaba aboHlanga okufanele alwele inkululeko yaboHlanga. Kunalokho sithola izindaba eziwumfundumezo. Injula Engabe lapho ekhona uMnu uHenry “Mr Drum” Nxumalo owayeyintatheli yeDrum angathini uma ebona lesi simo.
Ungomunye wezintatheli ezaziphenya ezazihamba phambili kuleli ngeminyaka ye-1950. Wabeka impilo yakhe engcupheni waze waya ejele eyokwenza udaba ngezimo zasemajele. Udaba olukhulu lokuqala lweDrum olwaluphenyiwe olwenziwa nguNxumalo lwalumayelana nokuxhashazwa kwezisebenzi zetoho epulazini laseBethal. Le liphephabhuku nakuba lalingagxilile kwezombusazwe kepha izintatheli ezifana noNxumalo zakwazi ukulisebenzisa ukulwela amalungelo nenhlalo yaboHlanga. Okuhle manje ukuthi kuleli sesiphila ngaphansi kwedemokhrasi namalungelo abezindaba asevikelekile, inselelo isikubahleli abanikwe umsebenzi wokulawula izindaba ukuthi basebenzise amandla abo ngisho izimo zinzima bangabi yizichuse zongxiwankulu ngoba umlando uyobabeka kabi sebengasekho ukuba baziphendulele.