Okungazuzisa uHulumeni
Ukusebenzisana kweminyango kaHulumeni kungaba yisixazululo ezinkingeni zakuleli zomnotho. Ezinye zezinkinga zibangwa wukudonsisana kweminyango kaHulumeni lowo nalowo ufuna ukugqama ukwedlula omunye okuholela ekufadabaleni komsebenzi osuke wenziwa. Isifo ukhuvethe sikukhombisile ukuthi kungenzeka kalula kubhekwane nomnotho wezwe.
Kube yinto enhle ukubona oNgqongqoshe abehlukene besukuma bededelana beneka izinhlelo zabo obala bechaza izindlela uMnyango noMnyango ozobhekana ngazo nokusabalala kokhuvethe. Okungichaze kakhulu ngukubona ukuthi amukho owenza into yakhe engenamthelela kulo msebenzi omkhulu okubheknwe nawo. Nakuphi kuyenzeka kube nosomathuba, nalabo abazama ukubhukuda baphambane nomsinga. Angithandi sibuke kulabo namuhla ngoba kuningi okumele ukuba uHulumeni ukufundile ngokuhlanganyela kulwiwa nokhuvethe.
Iminyango kaHulumeni ngingayifanisa nezandla kumbe izinyawo zomphakathi. Ifinyelela kulokho okudingwa wumphakathi eyimele ibuye nakho iyinikeze umphakathi. Uma abantu beqhubebeka bengazitholi izinto abebethemba ukuzithola, kusho ukuthi isandla asiwenzi umsebenzi waso wokuthatha sibuyisele kubantu. Uma abantu beqhubeka bengena shi enhluphekweni, unyaka nonyaka kusobala ukuthi isandla asiwenzi umsebenzi waso wokufunza imilomo nezandla zomphakathi ezikhamisile. Uma kunomuntu osehlale iminyaka embalwa eqedile ukufunda wangawutholi umsebenzi, kushiya imibuzo yokuthi kukhona yini okwenziwa yilabo abavotelwa bangena eminyangweni kaHulumeni. Uma kuphela iminyaka umphakathi kusaphela izinyanga ulindele ukuphendulwa kwezicelo wuMnyango Wezasekhaya, kwesinye isikhathi ubuye ulambatha usuku lonke ulindile, kusho ukuthi kunesandla esingawenzi umsebenzi waso.
Kuyakuthikameza ukulethwa kwezinhlelo zikaHulumeni kubantu uma zilethwa ngendlela enokuncintisana, kuyilowo nalowo efuna ukubala ukuthi wenzeni uma esebuzwa. Abantu abalimalayo kulokho yilabo obekumele bathole usizo. Ngike ngabuka olunye lwezinhlelo lokusiza umphakathi utshale uhlobo oluthile lwesitshalo esasizokuba wusizo ukufukula umnotho nokususa ikati eziko emndenini. Lwaqala ezansi nesifundazwe iKwaZulu Natal kwahlangana imizi eyishumi eyayizolima belekelelwa wuMnyango uCOGTA. Zenziwa kahle izinhlelo yilowo nalowo mnumzane ezosebenzisa ingxenye ethize endaweni yakhe ebalelwa kumahektha asukela kwamabili kuya kwayisihlanu. Zazihamba kahle izinhlelo, sekukhona nomeluleki owayeseqokiwe. AboMnyango Wezolimo babona lolu hlelo oluhle nabo bakhuluma nalo mphakathi base bengena kulolu hlelo. Akubanga khona ukuhlela ndawonye phakathi kwezikhulu zeminyango umphakathi wagcina ungazi ukuthi uzokhuluma nobani, kungasekho ozithintayo kuyo yomibili iminyango. Uhlelo oluhle olwalunokukhuliswa kusizakale abaningi lwalinyazwa wukuncintisana phakathi kweminyango asala amadoda ayishumi encela izithupha.
Ngenkathi kuqala izinhlelo zokulwa nokhuvethe sibone umsebenzi omuhle iminyango kaHulumeni inikezelana ngezinhlelo. Okuningi okuzuziwe kuze kube manje kwenziwe wukulalelana nokungancintisani.
UMnyango Wezokuthuthukiswa Kwamabhizinisi ungomunye owachaza izinhlelo ezizolandelwa ukubhekelela amabhizinisi. Ngokunjalo noNgqongqoshe Wezohwebo Nezimboni ubelokhu evela echaza ngokuzokwenzeka kwezezimboni. Angazi noma kukhona yini ukusebenzisana phakathi kukaNgqongqoshe Wezokuthuthukiswa Kwamabhizinisi, uNks uKhumbudzo Ntshavheni noNgqongqoshe Wezohwebo Nezezimboni uMnu Ebrahim Patel. Uma ubheka lemiNyango emibili esengiyibalile, kumele kube nokusebenzisana noMnyango Wezolimo. Imboni yezolimo ingenye yezimboni ezisemqoka kwezamabhizinisi. Ngike ngambona uNkk uThoko Didiza ebeka izinhlelo ezizolandelwa ngowakhe uMnyango ngesikhathi sokhuvethe. Le minyango yomine ngiyibona ingebalulekile ekubuyiseni amandla omnotho wezwe. Uma kungekho ukusebenzisana nokuhlanganiswa kwezinhlelo ngandlela thize phakathi koNgqongqoshe abengamele le minyango, ungathola ukuthi kuningi okugcina kuphindaphindeka kungafanele.
Kuneminye iminyango engiyithatha njengesemqoka emnothweni wezwe, phakathi kwayo kunoMnyango Wezokuhutha, oWezokuvakasha, oWamabhizinisi kaHulumeni, oWezamandla, oWezemisebenzi yoMphakathi neNgqalasizinda, kanye noWezabasebenzi. Le minyango ingumgogodla womnotho wezwe. Kungakuhle ukuba kube nemigomo ehlanganisa ukusebenza kwale minyango. Kushiya imibuzo ukuthi kuso sonke les isikhathi kulwiwa nokhuvethe angikaze ngimuzwe uNgqongqoshe ophethe amabhizinisi kaHulumeni ekhuluma ngendlela okuzosetshenzwa ngayo kulesi sikhathi. Uma ngingenza isibonelo kumele osomabhizinisi abathuthukiswa wuMnyango Wezokuthuthukiswa Kwamabhizinisi babe nendlela yokuthola imisebenzi emabhizinisini kaHulumeni, ezimayini, ekwakhiweni kwengqalasizinda, njalonjalo. Okwamanje ezinhlelweni eziningi yilowo nalowoMnyango uzimele, akukho okukhombisa ukuxhumana ekusebenzeni kwayo okungazuzisa osomabhizinisi bakuleli lizwe.
Kukhona isakhiwo esihlanganisa abaQondisi Jikelele beMinyango kaHulumeni esehlukene izigaba ezinhlanu esibizwa ngeForum of South African Directors-General (FOSAD). Lesi sakhiwo sinezigungu eziyisihlanu. Isigungu ngasinye sihlanganise iminyango ethile kaHulumeni. Kubukeka kuyimizamo kaHulumeni yokuxhumana kweminyango kube nokusebenzisana. Esokuqala isigungu kulezi zigaba esibukeka singesikhulu kunazo zonke ngobuningi beminyango ngesibhekela izinhlelo zomnotho, ingqalasizinda nokunye. Lesi sigaba sihlanganisa iminyango kaHulumeni engamashumi amabili.
UMongameli wezwe ugcine ukuhlangana neFOSAD ngenyanga uNcwaba nyakenye. Weluleka ukuba abaQondisi Jikelele kumele benze izinhlelo ezizofukula umnotho wezwe. Anginaqiniso noma zikhona yini izinhlelo esezike zaqhamuka nalesisigungu seFOSAD, ikakhulukazi emva kokuba uMongameli wezwe ekhulume nabo abaQondisi Jikelele, enyangeni uNcwaba nyakenye, mayelana nesimo somnotho nokulahleka kwemisebenzi.
Kungawenza umahluko emnothweni uma kungahlelwa ndawonye, kubhekwane nesimo esisodwa ngezindlela ezehlukene.