Ubandlululo kwezemidlalo
Obekubatshazwa kukhalisa emdlalweni wekhilikithi nasebholeni lombhoxo sekukhonjwa nakulo mdlalo wezinduku
Lapho kulindelwe ukuthi imidlalo ihlanganise abantu kodwa iHockey isakhungethwe wubandlululo oluyisimanga. AboHlanga basazithola bengamukelekile ngokwanele kulo mdlalo okwenza kube nzima kwabaningi ukugxila kuwona.
Kuzophela unyaka wama-27 nonyaka iNingizimu Afrika yathola inkululeko, yize kunjalo kodwa ubandlululo kubukeka kuyinto esakhona ngisho nakwezemidlalo imbala.
Eminyakeni edlule kuke kwakhalwa kakhulu ukuthi kusabandlululwa kukhilikithi nakumbhoxo njengoba eqenjini lesizwe iningi labadlali bekuba yilaba abanebala elimhlophe. Uma ungowoHlanga bekumele ikhono lakho kuze kube ukuthi lidlulele.
Muva nje kodwa zibukeka izinto ziguqukile nakhu amaBhokobhoko anqobe iNdebe YoMhlaba nyakenye eRussia eholwa uSiya Kolisi. Ngokunjalo naseqenjini lesizwe lekhilikithi baningi aboHlanga, uKagiso Rabada, u-Andile Phehlukwayo, uThemba Bavuma nabanye.
Yize kunjalo izikhalo zisekhona emdlalweni weHockey, ezinye zezikhulu kanye nabadlali boHlanga basakhala ngokuthi ubandlululo lusekhona.
IBAYEDE ibe nengxoxo ekhethekile noZamokuhle Siphosethu Ngubo, odlalela i-INK Hockey Club okuyiqembu elasungulwa nguNkosinathi Ngubane eminyakeni engama-27 eyedlule.
Lo mdlali oneminyaka yobudala engama-28 uthe ubandlululo yinto engasoze yaphela nhlobo kuleli.
“Ubandlululo lusekhona kakhulu kulo mdlalo. Uthando esinalo ngalo mdlalo kwezinye izikhathi lubuye lucishe luphele ngenxa yokubandlululeka. Siyabonga ukuthi nje iqembu lethu selikwazile ukuma iminyaka engama-27, kodwa iqiniso lithi inkulu impi esibhekana nayo mihla namalanga singaboHlanga,” kusho uNgubo ohlala eNtuzuma E.
Iqembu agijima kulo uNgubo lathi lisungulwa labe ligabe ngabadlali abahlala e-Inanda, eNtuzuma naKwaMashu (INK) yingakho libizwa nge-INK Hockey Club. Kodwa manje kuleli qembu sekukhona abadlali bakwezinye izindawo okubalwa, Umlaza, iPort Shepstone, iNewcastle, iMandeni nakwezinye izindawo.
UNgubo ufunde eBright Future PreSchool eNanda, iseBerea Primary School, iseGlenwood Preparatory lapho aqala khona ukudlala iHockey, wabe eseqeda amabanga aphezulu eGlenwood High School.
“Ukuqala kwami ukudlala iHockey ngangineminyaka eli-11. Ngingumuntu ozithandayo ezemidlalo, ngathi uma ngifika esikoleni (Glenwood Preparatory) kwaba iyona iHockey engiyikhethayo ngoba icishe ifane nonobhutshuzwayo futhi iyona eyayidlalwa. Kusukela lapho angiphindanga ngabheka emuva,” kusho uNgubo.
Uke wadlalela iqembu lesizwe labaneminyaka eli-16, wadlalela i-University of KwaZulu-Natal, wamela isifundazwe iKwaZulu-Natal kwabaneminyaka engama-21 nabadala. Udlalele iqembu eligijima kuPremier Hockey League (PHL), i-Addo Elephants.
Eqhuba umfo kaNgubo uthe: “Ngiyafisa ukuthi ezemidlalo kube yinto ehamba phambili kuzona zonke izindawo kakhulukazi emalokishini nasemakhaya. Ukudlala kwami iHockey kwayiguqula kakhulu impilo yami, ngenxa yayo ngikwazile ukufunda ezikoleni eziseqophelweni eliphezulu ngaze ngayongena e-University of KwaZulu-Natal (UKZN). Ngibonga uNgubane ngokuthi alwe noma kunzima ukuthuthukisa lo mdlalo. Ngibonga abazali bami ukuthi bangeseke kukhona konke.”
Le nsizwa e-UKZN yenza izifundo zokuziphatha nokuphathwa kwabantu ezimbonini (Industrial Psychology) emazingeni ahlukene.
UNgubo akuyena yedwa umdlali ozakhele igama kulo mdlalo ngaphansi kweqembu i-INK Hockey Club. Abanye uSihle Ngubane oseke wamela iKwaZulu-Natal Schools Hockey kusukela kwabaneminyaka eli-12 kuze kufike kwabaneminyaka eli-18. Omunye uNduduzo Mchunu naye wamela iKwaZulu-Natal Schools Hockey kusukela kwabaneminyaka eli-12 kuze kufike kwabaneminyaka eli-18. NgoNhlolanja wathola ithuba lokuthi ayodlala phesheya kwezilwandle, kuyimanje uzinze khona.
Esonga uNgubo uthe uyafisa ukuthi kwenziwe izinkundla zalo mdlalo emalokishini nasemakhaya. Kungagcinwa ngalokho kodwa nezinye izinkundla zeminye iminxa yezemidlalo zenziwe.
Ngiyafisa ukuthi ezemidlalo kube yinto ehamba phambili kuzona zonke izindawo kakhulukazi emalokishini nasemakhaya...