Sekuqale phansi ukuklwebhana eKorea
Umhla zingama-25 kuNhlangulana ngowe-1950 yilapho iNorth Koera neSouth Koera bahlukana khona. Indaba yaqalwa ngabaseNorth Korea ababenesifiso sokuhlanganisa la mazwe empini eyaziwa ngokuthi yiMpi YaseKorea neyathatha iminyaka emithathu kusuka ngowe-1950-1953. Ekupheleni kwempi lawa mazwe ahlukaniswa yindawo ebizwa namuhla ngokuthi yiDemilitarized Zone (DMZ).
Kule minyaka emibili kuke kwanethemba lokuthi ubutha bwo buyadamba ngenxa yezimo zomnotho. INorth Korea idinga ukuthi umnotho wayo ugeleze ngakolunye uhlangothi iSouth Korea idinga ukuphepha nokungathikanyezwa yiNorth Korea ehlale njalo iviva ngenuzi. Ngonyaka owedlule ubuhlobo bala mazwe bugqugquzelwe nguMengameli wase-United States of America (USA). Okokuqala ngqa ngonyaka owedlule kube nomhlangano osezingeni eliphezulu phakathi kwala mazwe nokube nethemba lokuthi kukhulu okuzayo. Nokho okwakamuva kwenze kwanokwesaba ukuthi selibuye lagqabuka igoda. Lokhu kulandela isinqumo seNorth Korea sokunqamula amaxhama okuxhumana phakathi kwayo neSouth Korea.
Abezindaba baseNorth Korea babike ukuthi izindlela eziningi zokuxhumana phakathi kwala mazwe zizovaleka, okubalwa kuzo ukuxhumana kwabezempi nabaholi bwo okunguMholi uKim Jongun waseNorth Korea noMengameli waseSouth Korea, uMnu uMoon Jae-in.
Le ndlela yokuxhumana yayithathwa njengebalulekile nengakwazi ukugwema ukungqubuzana kwamasosha ngengozi okubangelwa ukuhumusha kabi inhloso yolunye uhlangothi.
UChoi Hyun-soo, Wezokuvikela eSouth Korea, uthe: “Indlela yokuxhumana yangaphakathi (Inter-Korean) kufanele igcinwe ngokwesivumelwano ngoba iyisisekelo. UHulumeni uzoqhubeka usebenzele ukuthula nenqubekela phambili eKorea futhi kuhlonishwe isivumelwano esenziwa.”
IPyongyang ithe iziba iSeoul ngenxa yokuthi ababaleka eNorth Korea asebehlala eSouth Korea bathumele amabhalunde kuleliya lizwe ephethe amapheshana namakhadi eSecure Digital (SD card) okusolakala ukuthi abequkethe ulwazi lomhlaba ongaphandle kwaseNorth Korea. Akukho emthethweni ukuthi izakhamuzi zaseNorth Korea zamukele noma ulwazi olungagunyaziwe uHulumeni. Ukuphela kokuxhumana kwala mazwe kungawafaka nawangomakhelwane engcupheni.