Asabisa ngokuhoxa ku-WHO ngokhuvethe
IWorld Health Organisation (WHO) isaqhubeka nokubovulwa ngamanye amazwe amakhulu emhlabeni njengoba sekuvele izinkulumo ezingezinhle ezweni iBrazil emuva kokuba le nhlangano ithole ukugxekwa uMengameli wase-United States of America (USA)
UMengameli waseBrazil, uMnu uJair Bolsonaro, ngesonto eledlule usongele iWHO ngokuthi izwe lakhe lingase liphume kuyo emveni kokuba ithe ohulumeni abangaxhamazeli uma sebethatha isinqumo sokunciphisa imikhawulo yemvalelwakhaya emazweni abo ngenxa yokuthi izibalo zabantu abanokhuvethe ziyaqhubeka nokwanda nsuku zonke. Izibalo zasebebulewe, ngosuku lulodwa, yileli gciwane eBrazil zikhombisa ukuthi sezedlula ezaseItaly kodwa uMengameli uBolsonaro uyaqhubeka ukulwela ukuthi imithetho yemvalelwakhaya ezweni lakhe incishiswe ngenxa yokuthi izindleko zomnotho esezidalekile zidlula ubungozi bempilo emphakathini.
UMnyango Wezempilo eBrazil usubike ukuthi abantu abanokhuvethe sebengaphezu kwezi-600 000 kuthi abayi-1 437 labahaqa ngosuku olulodwa.
UMargaret Harris weWHO, uthe indlela ebalulekile yokunciphisa imigomo yemvalelwakhaya ukwehla kwezinga lokuthelelana kwabantu ngaleli gciwane.
“Ukuhlasela noma ukuqubuka kwalolu bhubhane eLatin America kuyethusa kodwa okufanele kwaziwe ukuthi enye yezindlela zokunciphisa imikhawulo ukuncipha kokuthelelana kwabantu,” usho kanje.
IBrazil isongela iWHO nje noMengameli wase-USA, uMnu uDonald Trump, naye uke wayigxeka waze wayisola ngokuba “yisicashalala” seChina kodwa le nhlangano yakuphika lokho wabe eseyisongela ngokuthi izwe lakhe lizophuma kuyona. I-USA iwumxhasi omkhulu weWHO ngakho-ke ukuhlehla kwayo kuyozwela. Nakuba kukhona amazwe ayimise kabi iWHO kepha awaseAfrika asayeseka ekubeni abaxhasi bayo abakhulu beyigxeka okungaholela ekutheni amazwe azuzayo ngeWHO agcine esesala osizini.
Kungenzeka ukuthi abaxhasi beWHO abakhulu balwa izimpi zabo noma kubangwa ukubuswa kwayo ngoba iChina ike yabika ukuthi izonikelela elinye ilungu leWHO, iWorld Health.