Kukhala mnikazi, mshayeli, msizi embonini yamatekisi
Akubanga nazihibe ukuvulwa kwezikole ngoMsombuluko eMgungundlovu. Nokho bekunetwetwe kubafundi asebekhulile ngendlela yokufunda entsha.
Selokhu zavalwa zili18 kuNdasa sekuze kwaba khona ukukhanya kwezinye izikole. Ngokomthetho izikole kwakumele zivalwe zingama-20 kuNdasa kodwa ngenxa yokhuvethe uMengameli uCyril Ramaphosa wamemezela ukuvalwa okuphuthumayo ukuze kuphephe abafundi kukhuvethe. Amehlo abethe njo esifundazweni iKwaZulu-Natali njengoba sinesibalo esiphezulu sabafundi nothisha uma kuqhathaniswa nezinye izifundazwe eNingizimu Afrika. Lesi sifundazwe siphinde sibe nezikole eziningi eNingizimu Afrika.
IKwaZulu-Natal inezikole eziyizi-6 148 kodwa ezili-104 zisalile kulezi ebezivulwa ngoMsombuluko ngenxa yokungabi nezivikeli ezanele kothisha nakubafundi. Isifundazwe sinabafundi bebanga le-12 nelesi-7 abayizigidi ezi-2,8 nothisha abayizi- 90 000.
IBAYEDE ivakashele izikole ezimbili eMgungundlovu izinsuku ezimbili ukuthola ukuthi zisebenza kanjani nokuthi abafundi nothisha bazizwa kanjani njengoba ukufunda nokufundisa kuzoba nezinguquko.
Esikoleni samabanga aphansi iPhilani Public Primary School, ligamenxe elesi-6 ekuseni othisha nabezempilo bese bemi esangweni lesikole belindele ukufaka abafundi ngokwemigomo yokhuvethe eshaywe uHulumeni. Bonke abafundi ababonwe yintatheli yeBAYEDE ngaphambi kokuba bangene emagcekeni esikole bebezifakile izimfonyo. Ngaphambi kokuthi bangene bebehlolwa amazinga okushisa ngomshini i-Infrared Temperature ukubheka ukuthi awekho yini ezingeni elingama-40 lokushisa okubiza ukuthi badluliselwe kwabezempilo.
Imizwa yabafundi bakulesi sikole ngokubuyela esikoleni ibicishe ifane. USinothando Hlela owenza ibanga lesi7 uthe: “Ngijabule kakhulu ngokubuyela esikoleni ngoba ekhaya bese ngibuye ngibhoreke.” Ephendula ukuthi uyazizwa yini ephephile, uthe akazi ngoba ubengakunakanga lokho.
UNokwazi Ngxongo webanga lesi-7 uthe: “Ngizizwa ngijabule ngokubuyela esikoleni ngoba sesizokwazi ukuqhubeka sifunde, bese ngingasathandi ukuba sekhaya ngoba abazali bebevala isango, bese siphumela emnyango kuphela siphinde sibuyele endlini.”
Onguthisha uNkk uPrimrose Ngubo yena uthe: “Sizizwa siphephile ngokuba sesikoleni ngoba zonke izivikeli siyazibona zikhona sinikiwe futhi singothisha nabafundi siyahlolwa. Sike safika emasontweni adlule njengoba kwakulindeleke ukuthi sivule kepha sabuye sahlala emakhaya ngenxa yokuthi izinto bezingaphelele. Okwamanje sijabule singazi-ke ngokuqhubeka kwesikhathi. Kuyasithokozisa ukuthi umtholampilo useduze nathi ngoba uma kukhona esingakuboni kahle sizokwazi ukuthi sibathinte.”
Osabambe njengothishanhloko uMnu uMotaung, uthe izinto eziningi eziyizivikeli zikhona. “Amagumbi ethu okufundela siwalungisile ukuthi ahambisane nemigomo, uMnyango usihlinzekile ngezibulalimagciwane kodwa into esinexhala ngayo udaba lomama basekhishini abangafundisekile futhi abangahlinzekwanga ngezivikeli kanjalo nephoyisa nalabo abasihlolayo abahlinzekwanga ngezivikeli kodwa sonke abanye sinazo ngoba izingane zinezimfonyo ngambili kanye nothisha. Odabeni lokubulalwa kwamagciwane emagunjini okufundela akekho umuntu oqeqeshelwe lokho sinazo izifutho nezibulalimagciwane kepha umuntu oqeqeshelwe lokho asihlinzekwanga ngaye, sizosebenzisa loyo osilekelela lapha esikoleni kwayena ongenazo izivikeli ezanele. Okungenani ama-95% sizizwa siphephile.”
Uqhube ngokuthi bafisa abazali bazilethe izingane esikoleni nothisha benze konke okusemandleni ukuthi abafundi baphephe baphinde bazame ukubuyisa isikhathi esilahlekile.
IBAYEDE ibe isivakashela isikole samabanga aphakeme iZamazulu Secondary School lapho umfundi webanga le12 uMatsidiso Masondo ethe: “Ngijabulile ukubuyela esikoleni kodwa nginokwesaba ngoba sibhekene nokhuvethe lokhu okwenza ukuthi njengabafundi bebanga le-12 sizibheke thina. Ngikhathazekile ngozakwethu bebanga lesi-7 esiqale nabo ngoba angiboni bezokwazi ukuthi bangadlali ngesikhathi sekhefu basebancane kakhulu, bazoba nokujabula kakhulu baze bakhohlwe. Okungikhathazayo ngathi ukuthi othisha uma bezobe befake izimfonyo ngeke sibezwe njengoba engathi ungasondela eduze kakhulu komuntu ukuze umuzwe, kungcono uma begqoke izimfonyo ezimahawu (shield mask).”
Ngempela lokhu okushiwo uMatsidiso kuqaphelekile ngenkathi abafundi befuna ukusondela kwabezempilo ngenxa yokuthi bebengabezwa ukuthi bathini uma bebabuza imbuzo noma benikwa imyalelo ngothisha njengoba amagumbi okufundela abeshintshiwe ngenxa yokuqikelela isibalo.
U-Aphiwe Mtolo webanga le12 uthe: “Ngikujabulela kakhulu ukubuyela esikoleni ngoba ngilangazelela ukuya enyuvesi ngonyaka ozayo njengoba ngifisa ukuyokwenza izifundo zobudokotela, ngeke ngikwazi ukuthi ngiphinde ngihlale omunye unyaka esikoleni, engingenaso isiqiniseko sakho ukuthi sizokwazi yini ukuhlonipha ukuqhelelana.”
Nokho othisha bebethetha bethethile izingane zijabulela ukubonana emva kwezinyanga ezintathu, ezamantombazane besezibelethene, abafana ‘bethatha o-5’.
Omele isigungu sesikole uMnu uBheki Ndlovu uthe: “Ngeso labazali ngibona zonke izinto zihamba kahle njengoba bekumele kubhekelelwe lesi sifo. Konke okokuvikela sikutholile. Ukuma kwabafundi imigqa ngaphandle siyakujabulela noma kudla isikhathi sokufundisa kancane ngoba izingane zifika ngesikhathi ezazi ukuthi esokungena esikoleni. Kuyasijabulisa lokhu okulandelwayo khona singezokuthola ukugxekwa ngokunqamulela ezinye izigaba. Siyafuna futhi ukuthi kuqhubeke kanje. Siyakholwa ukuthi othisha konke bakulungiselile njengoba kuzoba nezinguquko ekufundeni okwejwayelekile.”
Ukhuvethe luphoqe abuholi ukuthi benze izinguquko eminyangweni abayiholayo. UNgqongqoshe Wezokuthutha uMhlonishwa uFikile Mbalula wamemezela ukuthi kulo Mnyango awuholayo amatekisi kumele alayishe umthwalo ongama-70% lokhu okusho ukuthi kumele kube nabantu abali-10 etekisini. Abanye babasizi babashayeli balahlekelwe imisebenzi ngenxa yalo mthetho wabagibeli abali-10 uma imoto ilayisha abali-15.
Ngokwejwayelekile umsizi womshayeli ubeye ame etekisini asebenze ukubala imali, anike abagibeli ushintshi, aphinde ageze itekisi. UMgungundlovu unamatekisi angaphezu kwezi-2 000. Lawo ahambela eduze (local) amaningi awo abewavula amathuba omsebenzi ngokuthi aqashe abasizi babashayeli, bese kuthi awamabanga amade agxile ekuhlonipheni imthetho yomgwaqo nokulandela kulayishwa kwabagibeli.
UMkhethwa Shozi obengumsizi womshayeli ukhala ngokuphunyukwa yisinkwa ngenxa yomyalelo kaHulumeni.
“Umsebenzi wami bekuwukulayisha abantu etekisini, ngibale imali, ngazise umshayeli ukuthi umgibeli wehla kuphi, ngiphinde ngigeze itekisi kabili ngosuku emini nantambama engingasho ngithi bekuwukugcina itekisi lihlanzekile,” kusho
uShozi echaza ngomsebenzi wakhe. Uthi uma beyofesa bebevuka ligamenxe elesithathu ekuseni ukuze kuthi liqambe lilayisha itekisi lokuqala ngele-4 libe selinaye umsizi. “Kuyenzeka uthole ukuthi kukhona labo asebenamatekisi abawasebenzayo abangavuki bayofesa kepha balandwa ngumshayeli emakhaya ngesikhathi lelo tekisi elizolayisha ngaso,” kusho yena.
Echaza ngokuhola kwabo emsebenzini uthe: “Itekisi lilayisha abagibeli abali-15 njengoba bekhokha i-R14 kanti umthwalo ogcwele ngama-R210. Ngokujwayelekile umsizi womshayeli uhola imali yomthwalo wokugcina. Manje njengoba beli-10 abagibeli ilodi ili-R140 abanye obasi bathi le mali incane kakhulu ngeke bakwazi ukukhokhela abasizi babashayeli.” Ube eselandisa iBAYEDE ukuthi benzenjani manje ukuzama ukuziphilisa wathi: “Manje sesincenga abashayeli ukubagezela izimoto bese sizincengele simlayishise uma isaselokishini kuthi uma isiphuma bese siyasala akunike loyo-R30, uma kumele iwayinde ngaphakathi ilayishe uzomulayishisa uzothola u-R10. Manje sewuhola ngokukhuthala kwakho asisenayo imali eqondile ukuthi namhlanje uzokwakha malini ngoba bakhona abashayeli esingeke sithi bayizinqonqela kepha banengcindezi kobasi ngoba bona bafuna imali.”
Uqhube ngokuthi bayalimala ngoba sebephinda badle khona kule mali abayisebenzayo, ekuqaleni imali yokuphuza itiye ngehora le-10 ekuseni nokudla kwasemini bebeyinikwa ngumshayeli wetekisi bengabasizi.
Umshayeli wetekisi uThulani Nxele echaza ngokusebenza okusha uthe: “Ngeke ngiqambe amanga ingcindezi yenyukile futhi siyabona ukuthi abashayeli abasha basazozishayisa ngempela izimoto. Okokuqala sinenkinga yabagibeli abangamemezi uma besho izitobhi zabo lokhu ebesilekelelwa kukho ngabasizi ekuqaleni, okwesibili akudlali ukubala imali ube ushayela, maningi namaphutha ogcina uwenza ngoba abantu abakuthandi ukubala imali etekisini, okwesithathu ngezinsuku ezingekho matasa njengoLwesithathu noLwesine siyaphoqeleka ukuthi singabaqashi nokuthi basigezele izimoto, sizibambele thina mathupha ngoba nabagibeli bayawazi amalungelo abo ukuthi kumele babe setekisini elihlanzekile.”
Uphethe ngokuthi bona njengabaqashi babasizi babo bayaphoqeleka ukuthi bazithathele izinqumo ngoba bayaqula amacala uma sebehambisa imali ntambama uma ibe ncane.
“Obasi banengcindezi ngoba amanye amatekisi asakhokha ngakho-ke uma ngizoyaqasha bese ngihambisa imali encane lidliwa itekisi yimina ozolahlekelwa isinkwa ngoba siphila ngalo leli tekisi.”