Ngabe bazonele abenkezo kulokhu?
Mhla uMengameli wezwe, uMnu uCyril Ramaphosa, ememezela ukuthi sekuzovulwa ukudayiswa kotshwala esigabeni sesithathu semvalelwakhaya kwaqhuma imikikizo, kwachwaza izinkundla zokuxhumana abantu bejabulela ukuthi sebezokwazi ukuthola amanzi amponjwana okwasekuphele cishe izinyanga ezimbili bengakwazi ukuwathenga.
Ngosuku okwavulwa ngalo ukubudayisa lulunye kuNhlangulana kwakubonakala ngemigqa emide ezitolo ezibudayisayo abantu begijimela ithuba lokubuthenga kwazise kubekwe amahora nezinsuku ezithile ukuthi budayiswe. Nakhona obuthengayo akavumelekile ukubuphuzela emphakathini kodwa kumele kube sekhaya futhi angabi nabanye abantu.
Isinqumo sokuvunyelwa kokudayiswa kotshwala sahlangabezwa yimibono eyahlukene kukhona abathi buyimbangela yezingozi zomgwaqo, ukulimazana kwabantu, udlame lwasekhaya nokuhlukunyezwa kwabantu besifazane. Osomabhizinisi abasemkhakheni wotshwala babekhala ngokuthi ukuvalwa kokuthengiswa kwabo kuyabalahlekisela futhi baningi abantu abazophelelwa yimisebenzi ngalokhu.
Abanye bebethi kuzoba nenkinga yokugcwala kakhulu kwamagumbi ezimo ezibucayi ezibhedlela ngenxa yabantu abazobe bengeniswa kuzona belimele kakhulu ngenxa yotshwala. Lesi sikhalo sivela ngoba izwe libhekene nobhubhane lokhuvethe kanti ngokuhlela kukaHulumeni izibhedlela kumele zilungele ukwamukela abantu asebehaqwe yileli gciwane.
Ngosuku lokuqala kuvulwe ukudayiswa kotshwala ngokusho kweArrive Alive, kwaboshwa inqwaba yabantu ababebanjwe beshayela bephuzile kwaba nezingozi zomgwaqo ezadlula nemiphefumulo yabantu.
ENdwedwe KwaZulu-Natal owesifazane owayehamba nabantu abahlanu emotweni washona engozini yemoto. Omunye washayiswa yimoto eVryheid washona.
EVerulam kwaboshwa owesilisa emuva kokuthi eshayise imoto yephoyisa elalingekho emsebenzini. Lo mshayeli kuthiwa wayebukhile.
Kusabatshazwa lokho, abezimo eziphuthumayo beKwaZulu-Natal Ambulance Service besamatasa betakula imoto ebiphaphalazile yaginqika baphunyuka emlonyeni wengwenya kuqhamuka imoto eyayiphunyuke umshayeli ibheke kubo kwaphoqa ukuthi bazisindise. Omunye wabosizo oluphuthumayo walima wase ephuthunyiswa esibhedlela.
Ngalo lolu suku baningi abalinyazwa yizimoto emgwaqeni okubalwa nowashayiseka wafa eKempton Park eGoli.
Isasha phansi inkulumompikiswano ngokuvulwa kokudayiswa kotshwala, eJozini, KwaZulu-Natal, ngoLwesithathu umshayeli weloli okusolwa ukuthi ubebukhile ushayise iqulu labantu kwafa abayisi-8 abangama-30 baphuthunyiswa esibhedlela. Lo mshayeli ukhalelwe ngamasongo kaSigonyela.
Esifundazweni i-Eastern Cape uyaqina umkhankaso wokuthi kuvalwe ukudayiswa kotshwala oqalwe nguNdunankulu wakhona, uMnu u-Oscar Mabuyane. Manje usethole ukwesekwa yinhlangano yabahlengikazi iDemocratic Nursing Organisation of South Africa (Denosa) ethe selokhu kwavulwa ukuthengiswa kotshwala ayachichima amagumbi ezibhedlela amukela abantu abalimele nabasesimweni esibucayi.
Kusukela lulunye kuNhlangulana e-Eastern Cape sekubikwe amacala ayizi-3 145 ahlanganisa angama-77 okudlwengula, angama-94 okubulala, angama-354 okushaya ngenhloso yokulimaza, angama-25 okubulala ngokungenhloso nangama-354 okuzama ukubulala avulwe eziteshini ezahlukene ezili-197 kulesi sifundazwe.
Umbiko okhishwe yisigungu esibhekelele ukulwa nokubhebhetheka kokhuvethe kulesi sifundazwe uveze ukuthi wonke la macala ancikene nokuvulwa kokudayiswa kotshwala.
Nakuba uHulumeni kuleli sonto uveze ukuthi awukho ezinhlelweni zokuvala ukudayiswa kotshwala kodwa kubukeka sengathi abaphuzi bawo sebezonele ngendlela abaziphathe ngayo selokhu kuvulwe ukudayiswa kwamankwebevu.
Ngesikhathi kuvalwa ukuthengiswa kwabo isizathu esasihamba phambili ukuthi abantu bazokwehluleka ukuzilawula kudale izingozi, balimazane kwenyuke izigameko zodlame emakhaya. Ukwehla kwesibalo sezingozi zomgwaqo ngenxa yokuvalwa kokudayiswa kotshwala kwafakazeleka ngesikhathi kukhishwa izibalo zezingozi zePhasika nonyaka ezaba ngama-26 kwafa abangama-28 kuzwelonke.
Izigameko ezenzeke emuva kokuvunyelwa ukuthi utshwala budayiswe zifakazela zona izinkulumo zokuthi bunomuthelela odlameni nasezingozini.
Cishe amehlo asethe njo kuMengameli uRamaphosa ukuzwa ukuthi ngabe izehlakalo ezenzeke emuva kokuvulwa kotshwala ngeke yini ziwuphoqe uHulumeni ukuba uguqule umqondo. Lokhu kungase kuphinde kunike abanye njengalabo abalwela ukuthi kuvulwe ukuthengiswa kukagwayi, abezindawo zokucwala amakhanda nabezindawo zokudlela abebelokhu bekhalile ngokuthi abamibhizinisi abo anqatshelwa kanjani ukudayisa amanye njengawezindawo zokudlela, angavuliwe ngokugcwele, kodwa utshwala bavunyelwa.
Uma kungenzeka uHulumeni athathe isinqumo sokubuvala utshwala akekho ongasolwa ngaphandle kwabo uqobo ababuphuzayo ngoba lezi zigameko ziyakhombisa ukuthi inkulu inkinga ekhona. UNgqongqoshe Wamaphoyisa kuleli, uBheki Cele, ophenduke isitha kwabaphuza utshwala uhlezi ebuza ukuthi: “Yini lena esotshwaleni?”.