Ukulima emakhaya kungaguqula isimo somnotho
Impilo yasemakhaya inezinto eziningi eziphelelisa impilo, ezingamenza umuntu aphile ngaphandle kokuya esitolo, lapho ezokhokha ephindelela ethenga izidlo ezehlukene abengazenzela zona ukuba ube semakhaya. Lokhu kungicacele kwathi bha ngingena komunye umuzi banginika isijumbana samadumbe kanye nesikabhatata, bathi ngifike ekhaya ngiwanwaye amadumbe ngidle ngishaye esentwala. Uma sengihamba ngibone ubhontshisi unekiwe egcekeni, ukuze wome bese ulungiselelwa ukuba udliwe. Uma ubheka lezi zinhlobo zokudla ezitolo zibiza imali enkulu.
Lezi zinhlobo zokudla zitshalwe emasimini, akufakwanga umanyolo othengwa esitolo, kodwa kufakwe umquba othathwe esibayeni naso esisegcekeni. Lendlela yokuphila yiyo obekuyindlela yokuphila ngaphambi kokuba abantu bashiye amakhaya baye emadolobheni. Manje uthola nabangasebenzi sebegcwele emadolobheni baze bafune ibala bakhe izakhiwo ezinye zazo ezibukeka njengezakhiwo zesikhashana. Abanye bashiye emakhaya ngethemba lokuthi ingcono impilo edolobheni, kanti bayazikhohlisa.
Eminyakeni ebalelwa eshumini eyedlule lolu hlobo lokudla bewungeke uluthole ezitolo ezingamasuphamakethe. Bekuthathwa ngabaningi njengokudla kwasemakhaya okungekho semqoka ukuba kungangena ezimakethe zesilungu. Phela amadumbe akusikho ukudla kondlebezikhany’ilanga. Kwabaningi ozimpande zabo zigxilile empilweni yobuhlanga, akukavumi ukuba bathenge amadumbe nobhatata esitolo. Iningi seliziduduza ngokuthenga kulabo abadayisa ezimpambanweni zemigwaqo noma beneke imikhiqizo yabo ezikhungweni ezinabantu abaningi. Abanye sebakwamukela ukuthi kabasayophinde balime ngoba nomhlaba abanawo. Ezinye zezindawo okwakungezomkhulu sezaba ngamafusi, akusabonakali nokuthi kwake kwalinywa kuzo.
Isikhathi esiningi uma ngingena engxenyeni ekhangisa imifino ezitolo ezinkulu oWoolworths noCheckers noSpar ngiye ngibone amadumbe nobhatata kudekiwe kudayiswa kanye nemifino. Imifino namadumbe nokunye bekutshalwa emakhaya kudliwe indlala ingabonwa. Kuyajabulisa namanje ukuthi basekhona abasalima batshale emakhaya. Okubuhlungu ngukuthi noma bangalima ukudla okunomsoco kangakanani, kabathathwa njengabalimi okungathenjelwa kubo.
Ukuze uthathwe njengomlimi osezingeni lokuhlonishwa njengosomabhizinisi kumele ukhiqize imikhiqizo elungele ukudayiswa ezitolo ezinkulu esengizibalile. Ubandlululo lwenze aboHlanga bangaba naso isibindi sokuveza imikhiqizo efana namadumbe ezimakethe ngoba abethathwa njengokudla okudliwa ngaboHlanga kuphela. Lokhu bekubangelwa wukuchithwa kweziningi izinto ezenziwa yibona baze bagcine sebe nokuzeya, bancame ukugaya bazidlele bona. Phezu kwalokho aboHlanga bekungesiyo into yabo ukudayisa ukudla abakulime emasimini. Isimo siyaphoqa namuhla ukuba umlimi atshale okuningi ukuze adayise akwazi ukuziphilisa ngakho futhi nezinhlaka zikaHulumeni zimthathe njengomuntu ongathola uxhaso.
Uma esenqumile umlimi ukuthi uzoziphilisa ngokulima kumele abe nomkhiqizo omningi. Amadumbe kumele awalime ensimini enkulu ngokwanele ukuze kungene imali enhle angezukumenza asebenzele ize. Phela uma umuntu etshale esiqeshini esincane bese eyadayisa, akayenzi inzuzo ngomsebenzi wakhe. Yikho lokho okwenza kube nesidingo esikhulu somhlaba ngoba baya ngokuya banda abantu abakubona kuyindlela yokuphila ukulima.
Okunye okubaluleke kakhulu ngukuba athi elima umlimi abe esecuphile ngabathengi azohambisa kubo imikhiqizo yakhe.
Iningi labanikazi zitolo liyayiphuthuma imikhiqizo engafakiwe izikhuthazi ezisheshisa ukukhula kwezitshalo, ezizikhulele ngokwemvelo, ngoba zithathwa njengezinempilo. Abalimi basemakhaya, abasebenzisa umquba ongahlanganiswe nazikhuthazi, basethubeni lokuhlomula kulezi zimakethe. Ngiyazi kungabukeka kuyinto enzima komunye, kanti izinhlelo ezithile zingalekelela ukufukula umnotho wabalimi basemakhaya.
Kujwayelekile ukuthi umphakathi utshale izinto ezifanayo ngesikhathi esifanayo. Uma kutshalwe amadumbe, uyaye uthole ukuthi nomakhelwane batshale amadumbe. Enye yezindlela engasiza ngukuba bahlangane kube noyedwa ohlanganisa imikhiqizo ayilungisele ukungeniswa ezimakethe. Lokhu kungasiza labo abangenazimoto zokuhambisa umkhiqizo ezimakethe, futhi kungawenza umkhiqizo wabo wethembeke ngoba ufika ngesandla esisodwa. Uma kunganamathelwa kulolu hlelo abalwejwayele abantu abazilimelayo emakhaya kungaba kuningi okungenzeka.
UHulumeni unoMnyango Wezolimo ogxile nasezindaweni zasemakhaya. Kunabantu abakufundele ukweluleka kwezolimo, kodwa anginaqiniso noma banazo yini izinhlelo zokuthuthukisa umnotho wasemakhaya. Uma kunesidingo bangaze bangene umuzi nomuzi otshalile, bahlanganise izinhlelo bangene kancane kancane abasemakhaya emnothweni wezolimo.
UHulumeni wasungula uhlelo olubizwa nge-AgriSeta olunezinhlelo zokufundisa ngezolimo. Lolu hlelo lwalusungulelwe abalimi abafuze abasemakhaya, abangazange bakuyele esikoleni ukulima, kodwa abakwenza ngolwazi olutholakala ezizukulwaneni ezisandulele.