Zisadonsa kanzima izindawo zokudlela
Nakuba imithetho yemvalelwakhaya seyehliselwe ezingeni lesithathu, amanye amabhizinisi avunyelwa ukuthi ahwebe yize engavuliwe ngokugcwele kepha umkhakha wezindawo zokudlela usakhihla eseNdlovukazi uNandi.
Phezu kokuthi lolu hlobo lwamabhizinisi luvunyelwe ukuba luhambisele ukudla amakhasimende afake ama-oda, akuwona wonke lolu hlelo oluwasizayo.
Okhulumela usoseshini wezindawo zokudlela, iRestaurant Collective, uNkk uGrace Harding, uthe: “Sithole ukuphefumula kancane kodwa akukasisizi sonke sisasegumbini labagula kakhulu.”
NgoNhlaba ngesikhathi elakuleli lisezingeni lesine, uHulumeni wavumela abakuleli bhizinisi ukuba badayise futhi badilive ukudla okuphekiwe. Ekuqaleni kukaNhlangulana kube sekuvunyelwa ukuba amakhasimende aye ezitolo ayothatha ama-oda awo kanjalo nokudayiswa kotshwala phakathi kwelesi-9 ekuseni kuya kwelesine ntambama ngoMsombuluko kuya kuLwesine.
Abezindawo zokudlela bathi bayazamukela izinyathelo zikaHulumeni zokuxegisa imithetho kodwa azanele.
UNkk uHarding uthe njengoba ezindaweni zokudlela sekumele kuthengwe kodwa kungadlelwa kuzona, sezizodinga izisebenzi eziyisi-6 kungafani nasesimweni esejwayelekile lapho kudingeka ezingama-25.
Uthe kwesinye isikhathi kugcina sekungadingeki muntu ozosebenza. Eveza ukulungela kwabo ukuvula ngokugcwele uthe sebakhe izindlela zenhlanzeko nemithetho yokuphepha ukuze izindawo zokudlela zisebenze ngaphansi kwezimo eziphephile.
Uthe kuningi abakuzuzile kule nyanga edlule ukulungiselela ukuvula. Ubalule ukusebenzisana neSector Education and Training Authority (SETA) esibagunyaze ukuba baqeqeshe izimeneja zabo.
Isitolo sokudlela i-Ocean Basket isigunyazwe njengesizoqeqesha izimeneja eNingizimu Afrika. Abezindawo zokudlela baqeqeshwa mahhala ngendlela ye-intanethi kanti ngesonto bakwazi ukuqeqesha isibalo sabanikazi balezi zindawo nezimeneja esifinyelela enkulungwaneni.
“Zonke izindawo okuzodlelwa kuzona zizolengisa ezindongeni izitifiketi ezikhombisa ukuthi ziqeqeshiwe futhi zizibophezele emithethweni yokhuvethe emayelana nokuphepha,” kusho uNkk uHarding egcizelela ukuthi bakulungele ukuthi amabhizinisi abo avulwe ngokugcwele. Uthe sebevule ulayini wocingo ukwelekelela amakhasimende anokukhathazeka ngokhuvethwe nokuphepha kwawo.
Esinye isisebenzi sakwaKentucky Fried Chicken (KFC) eThekwini esikhulume naleli phephandaba kodwa sacela ukuba igama laso lingadalulwa, sithe isimo kwabamabhizinisi ezindawo zokudlela sinzima kakhulu.
“Nakho ukuthi kuthiwe amakhasimende ukudla awaku-ode ahanjiselwe kumba eqolo ngoba ezinye izitolo azinazo izinto zokuthutha ziyaphoqeleka ukuthi ziqashe abantu noma izinkampani ezizimele ukwenza lokhu,” kusho lesi sisebenzi.
Senze izinsolo zokuthi njengoba kuphoqelelwa ukuthi ukudla kuhanjiswe kumakhasimende kukhona abahlomulayo ngalokhu njengoba izinkampani ezenza lokhu zithatha ama-30% emalini ye-oda.
Ukubheda kwesimo kulo mkhakha kufakazelwe nguWendy Alberts oyiSikhulu Esiphezulu seRestaurant Association of South Africa (Rasa), othe le mboni ishayeke kakhulu emhlabeni wonke ngenxa yokhuvethe.
“Akukho ukusizakala esikutholile kuphoqe ukuthi siguqule indlela esisebenza ngayo kusuka ekudiliveni ukudla nokungavunyelwa ukuthi amakhasimende athenge bese edlela ezitolo zethu. Lena akuyona indlela esisebenza ngayo,” kukhala uWendy.