Inkunzi isematholeni
Oshicilelweni lwaleli sonto sibheke kakhulu intsha. Laba ngabantu abangaba yisibusiso nesilingo ezweni. Kubo kungavela osidlame ababhidliza yonke into noma abaholi abanombono ngezwe nangomhlaba. Umlando waboHlanga unobufakazi bobuholi obuqotho nobunombono okuqala entsheni. Uma singaqala emlandweni weLembe elabumba namuhla esikubiza ngoZulu. Umlando walo uveza ukuthi umthente wahlaba usamila. Wabonwa esengumfana ukuthi lapha kuzohluba indoda nembala leyo ndoda yaba ngubaba wakho konke okunguZulu. Kanti nakuye ugogo walo nobabekazi walo iLembe, iNdlovukazi uMthaniya noMntwana uMkabayi ubuholi babo babonakala beseyizintombi njengoba namuhla umlando kaZulu ungephelele uma amagama abo engekho. Umlando weNgonyama uDinuzulu kaCetshwayo uwubufakazi bokuthi abantu abasha bangalihola izwe. Ithathe isihlalo sawoyise isengumfana ineminyaka ebalelwa kweli-16 kepha yawuhola uZulu ezikhathini ezinzima. Nale ehleli eSihlalweni ngesethu isikhathi ithathe iseneminyaka engama-23 vo nanamuhla isasihola. Bakhona nabanye abaholi bomzabalazo waboHlanga abafana noMnu u-Anton Lembede, oMnu uBantu Biko, uMntwana waKwaPhindangene, uMnu u-Oliver Tambo, uSol uMangaliso Sobukwe, uMnu uRholihlahla Mandela, uNkk uNomzamo Mandela, uNkk u-Albertina Sisulu, uNks uLillian Ngoyi nabanye nabo ubuholi babo obagqama besebancane. Namuhla izwe lidinga ubuholi bohlobo olwehlukile ngoba nesibhekene nakho kwehlukile. Kuyinkolelo yethu ukuthi lobu buholi ngeke buvele emkhakheni owodwa njengakupolitiki nje. Kunalokho buyovela kuyo yonke imikhakha. Buyovela kuthisha, ephoyiseni, kumfundisi, kodokotela nakubahlengikazi, kubadlali bemidlalo enhlobonhlono nakubalimi emakhaya njalo njalo. Kungalesi sizathu njengephephandaba ngokukhethekile ngesonto lesithathu kuNtulikazi sizoshicilela inkonyane elisihloko sithi ‘Imithente ehlaba isamila’ lapha siyobe sibungaza ubuholi bentsha cishe kuyo yonke imikhakha. Kuyisifiso sethu ukuthi nawe ube yingxenye yokuqoka labo ocabanga ukuthi bakufanele ukuba sikhulume ngabo. Kulokhu ngeke sihambise ngeminyaka yamaqembu epolitiki noma imithetho yezwe kepha sizobheka abaholi, abesilisa nabesifazane abasuka eminyakeni eli-18 kuya kwengama-40. Laba kuyobe kungaboHlanga esibabungazayo nabayisibonelo kithi sonke. Bheka iminingwane ezinkundleni zokuxhumana nakulo ushicilelo lwanamuhla.