Abafundi baphawula ngosizi lwaboHlanga
Mhleli
Ukuthi akuzilelwe uFloyd kuyangixaka. Yebo, akuphoqwe muntu ukukukwenza lokho. Kwabhubha abantu eMarikana kodwa nanamhlanje uma kukhunjulwa usuku lwabo akuzilwa. Nangu okuthiwa ubulawe amasotsha zolo lokhu, nangu uBobo senzeni siyizwe? Ukwenza into ngoba ujabulisa umuntu akusizi uthunuka isilonda somunye ngoba asikapholi ngaphakathi. Kubuhlungu indlela ezinye izinto ezenzeka ngayo.
- nguThembelihle Ntshingila Mhleli
Le nto ikhomba ukuthi iNingizimu Afrika yonke iyabona ukuthi konakele kwaboHlanga kulokhu kufihlwa iqiniso licace bha. Angazi singenza kanjani ukuthi sibe mqondomunye sibone ukuthi abaholi bethu bayasilahlekisa, sisukume silwele izinto ezibalulekile. UNkulunkulu akasiphe amandla asikhiphe ebumnyameni.
- nguSonwabile Pakati Mhleli
Usizi lwaboHlanga lukhona cishe umhlaba wonke. Iqiniso lithi aboHlanga ababhekene nezingqinamba eziningi kusukela ekuxakekeni, izifo, ukweswela, ukuhlukunyezwa ngokwebala, ukuphathwa ngendlela engalungile amaphoyisa kanjalo nokuhlukunyezwa ezindaweni zokusebenza. Sibonga aboHlanga e-USA ngokuzama ukulwa ngqo nalolu sizi ukuze sonke sivuleke amehlo.
- ngu-Andile KaGwazamambuka Njapha Mhleli
Uma sizoyithatha ngebala izoba nzima. UBobo akekho emhlabeni ufe ngesandla somuntu, eMarikana lalibalele lihlaba umhlaba. Amasotsha atholane emsulwa ecaleni lokubulala umnumzane kwakhe eSoweto kodwa-ke angithule ngoba impilo yomuntu yowoHlanga ibaluleke uma kuthinteka omhlophe. Mhla owoHlanga wama wathi ngisecaleni lobulungiswa uguquko siyolubona kodwa okwamanje busanebala sizoqhubeka sibheke ukuthi kuzilelwa abanjani? Amadoda angama-34 alala azange sizwe uMengameli kuthiwa uthi asigqoke okumnyana.
- nguNomvikelelo Kawula Mhleli
Abelungu abamfuni owoHlanga kodwa bayakwazi ukwenza sengathi bayasidinga kanti akunjalo bayasithenga nathi sibaxolele. Thina sahlukunyezwa kakhulu ohulumeni bobandlululo. Sekuyisikhathi sokuthi nathi singama-Afrika sisukume ngoba sebasihlakaniphela abaseNtshonalanga bedla nomnotho wethu. E-Afrika sicebile sinayo yonke into engasenza singadlali abamhlophe. I-USA icebile kodwa ayinalutho eyikhiqizayo intshontsha izinto zabantu izenze ezayo ijike ibadayisele.
Kunamabhanoyi lapha kodwa awekho aya ngqo eMadagascar ukuze uye khona kumele uqale uye eFrance kodwa ube uya khona lapha e-Afrika umuntu agcine esekhokha imali enkulu. Inhloso yabo ukuncela thina basishiye singenalutho ukuze basithathe isinoma yikanjani.
- nguSticks Mnisi Mhleli
Ukubheka e-USA kodwa sibe sithwele okukhulu kunabo angikuthathi njengento ebalulekile. Ngiyambongela uGeorge Floyd ukhalelwa umhlaba wonke kithina la e-Afrika akukhali muntu. Siqalwe abase-Europe kwalandela abase-Asia kwase kuvala bona laba esithi bangabakithi. Into esiyibone kuFloyd ibuhlungu kodwa nithule uma kuba umuntu walapha e-Afrika.
- nguPakiso Mohlakoane Mtebani Mhleli
Abamhlophe akaze baba nothando kwaboHlanga ngisho nathi asithandani.
Umlungu uyakwazi ukusebenzisa owoHlanga ngemali ukuthi abulale owoHlanga. NoHulumeni udlala enkulu indima ekubulaleni abantu, izwe liphethwe abantu abathi basivikela kukhuvethe kodwa kubulawa abantu ngesandla sabomthetho. EGoli kubulawe umuntu ekwakhe kwathiwa weqe umthetho wemvalelwakhaya, KwaZuluNatal kufe umfana oneminyaka eli-17 obedlala ibhola egijinyiswa amaphoyisa eqe umthetho wemvalelwakhaya. La maphoyisa angaboHlanga.
Ngeke babe nankinga abelungu ukusibulala ngoba akukho zwelo kusuka kuHulumeni osiphethe wakha imali yamabheyili ngabantu uyazi ukuthi uma eyifuna ngeke usayinuka ngoba uzokulahla ngecala. Kuzuza bani ngokuboshwa komuntu uHulumeni?
- nguBongani Shezi