Okufanele sikwazi sikuqaphele ngoshukela nokhuvethe
Isifo ukhuvethe siyaqhubeka nokuba yinkinga enkulu emazweni amaningi lapho abathelelekile bengaphezu kwezigidi eziyisi-7 emhlabeni kanti asebefile bangaphezu kwezi-400 000. Amanye amazwe aseyaqala ukusimama futhi sekuqala ukuba kungabi nomunye umuntu othelelekile. INingizimu Afrika, nokho, inyukelwa yisibalo sabathelelekayo kulokhu kuxegiswe imithetho yemvalelwakhaya (Lockdown). Lokhu kukhuphuka kwezibalo zabathelelekile akwethusi ngoba kusukela kuvulwe ukusebenza abantu baqala ukuhamba okwenza kube nobungozi obukhulu bokuthintana nokudluliseka kwegciwane. Kumanje iNingizimu Afrika inabathelelekile abangaphezu kwezinkulungwane ezingama-50 kanti asebefile bangaphezu kwenkulungwane.
Ukuqhelelana nokungagcaluzi kusagqugquzelwa ikakhulukazi kulabo bantu abasengcupheni emiphakathini yethu. Abasengcupheni kakhulu yilabo abanalokhu ukuyingozi kubo: Abangaphezu kweminyaka engama-60 Abanesifo sikashukela Hypertension Abaneminyaka engaphezu kwengama-65 Abanomdlavuza
Abanesifo sokucinana kwesifuba ikakhulukazi labo abangasazweli emithini yokwelapha
Abanenkinga yamaphaphu njengeChronic Obstructive Pulmonary Disease (COPD)
Abanesandulelangculaza iHuman Immunodeficiency Virus (HIV) ikakhulukazi uma ingalawulekile ngendlela efanele (amasosha egazi embalwa amagciwane emaningi)
Abathatha imithi ethintibeza ukuzivikela komzimba (njengemithi yomdlavuza, elungisa isimo neyokubhekana nokufakelwa kwezicubu)
Ukukhathazeka kwezisebenzi zezempilo mayelana nalokhu kwanda kwabathelelekile yisidingo sokuthi imitholampilo nezibhedlela zingasetshenziswa ngokufanele ukuze kube nesikhala sokwamukela inani labangangeniswa ngenxa yokugula okuhambisana nokhuvethe. Lokhu kusho ukuthi iziguli ezinamahlalakhona azisezukubonwa njalo ukulawula izifo zazo. Ukwehla kokulawulwa kungaholela ekutheni bangalandeli imiyalelo yokwelashwa bese kwanda ubungozi bokudaleka kwezinye izifo nokungalapheki kwezifo.
Esinye salezi zimo yisifo sikashukela esaziyo ukuthi sikhona kakhulu emphakathini. Sesake sathi fahla ngesifo sikashukela ngoLwezi. Kafushane, kunezinhlobo ezimbili zesifo sikashukela: uType 1 lapho usuphila ngokujova noType 2. Iziguli eziningi ezinoType 2 azibonakali. Kodwa uma seziqala ukubonakala ziba nalezi zimpawu ezilandelayo:
Ukuchama njalo, ukoma kakhulu nokuncipha emzimbeni
Ukuba nezilonjana ezithweni zangasese noma ukuvuvuka kwenkanda kwabesilisa Ukungaboni kahle Ukunsonsotha nokubandikindiki kwesikhumba
Ukungalandeli indlela yokudla imithi kungabanga obunye ubunzima njengenkinga yokungaboni ngendlela efanele okungaholela ebuphumputheni nasekungahambini kahle kwegazi ezinyaweni nasemilenzeni okungaze kunqunywe, ekungasebenzini kwezinso, ukungalangazeleli ucansi nasebungozini bezifo zenhliziyo nohlangothi.
Kubaluleke kakhulu ukuthi uphuze imithi yakho ngendlela efanele (ngokuphelele), ulawule umfutho wegazi noshukela uma unazo izinsiza zokubheka ubuye uye kothola usizo lozokwelashwa uma ungaphilile ungalokhu uzindela.
Isifo sikashukela nokhuvethe
Okuvela kule mininingwano ekhona kukhombisa ukuthi isifo sikashukela asiwandisi amathuba okutheleleka ngokhuvethe okusho ukuthi amathuba okutheleleka awekho phezulu kubantu abanesifo sikashukela kuqhathaniswa nabantu abangenawo ushukela. Nokho kuyavela ukuthi uma usuthelelekile ngokhuvethe kanti unesifo sikashukela kuba nzima kakhulu.
Abanesifo sikashukela banamathuba aphindwe kabili kuya kwaphindwe kathathu ukuba bangeniswe egunjini labagula kakhulu, bahlale isikhathi eside esibhedlela futhi lubabulale ukhuvethe uma kuqhathaniswa nalabo abangenaso isifo sikashukela. Lokhu kunobungozi obufanayo kuzo zozimbili izinhlobo zesifo sikashukela.
Ubungozi bokuthi abanesifo sikashukela bafe buphezulu kwabadala, abakhuluphele ngokweqile nabasebenzisa i-insulini. Sekubonakele futhi ukuthi ukulawula izinga likashukela ngenkathi usesibhedlela kuba nemiphumela engcono.
Izincomo ekunciphiseni ubungozi bokutheleleka ngokhuvethe uma unesifo sikashukela ziyefana:
Qhelelanani. Hlala ekhaya futhi ugweme ukuthintana nabantu ngayo yonke indlela ikakhulukazi labo abagulayo ngoba bangaba sengcupheni enkulu bokuthi baguliswe kanzima wukhuvethe. Geza izandla njalo ngesipho namanzi. Gwema ukuthinta ubuso, amakhala namehlo ngezandla ezingageziwe.
Sebenzisa izifonyo futhi uhlale uqaphela ukuthi uhlala uhlanzekile ngokusebenzisa izibulalimagciwane.
Khwehlelela endololwaneni kusemqoka ekulawuleni zombili izifo.
Ngaphezu kwalokho kusemqoka ukuba ukhumbule:
Idla ngokwempilo: Lokhu kuyasiza ukulawula izinga likashukela egazini futhi kwenze ungakhuluphali.
Zivocavoce: Ukuzivocavoca kunemithelela emihle eminingi okusikho ukuba nesisindo esikahle nje kuphela kodwa nokulekelela ekungahlaselweni yizifo kalula.
Gomela umkhuhlane ngoba lokhu kuyasiza ukunciphisa amathuba okungenwa wumkhulane.