USofasonke umlweli wamalungelo abantu
Asisoze safinyelela ezweni lesethembiso sisaphethwe abantu abanomlando wokuzihlupha ngobubona nabazithanda bona kuphela.
Kuyakhathaza ukushaywa indava kwalabo ababengabaholi bethu beqiniso kodwa kuphinde kucace ukuthi kukhona nabanye osopolitiki abalokhu beshiywa ngaphandle kube kuyibona ababa ngamaqhawe eqiniso esingananazi ngawo. Umlando usikhombisa ukuthi abaholi babelumbi ababa namagalelo ngesikhathi sokubusa kwabo banokuhlonishwa ngezakhiwo ezaqanjwa ngabo. Umlando ukhomba ukuthi kuncane okuhle okwenziwa ngaboHlanga okubhalwa ngabo. Uma kukhona kuyoshiwo ngalabo ababevela eqenjini elibusayo kuphela. Amaqhawe akuwona aweqembu elibusayo kuphela futhi ipolitiki akuyona yodwa ebuyise leli lizwe. Kuye kuthi noma sekukhona okwenziwayo kukhunjulwe kuqhakanjiswe abayisigejana nakhona okusuke sekudalwa yingcindezi.
Kodwa uma kuyizigayigayi zeqembu elibusayo kuphuma izigidi zemali. Kuqulwa amacala eSilo uDinuzulu eMngungundlovana kwakunomama womulungu onguHarriette Colenso owama neSilo ngezikhathi ezinzima kodwa akaqhakanjiswa ngamagalelo akhe njengalabo ababe ngamalungu esifazane enhlangano ebusayo. Ngowe-1889 eGeorgedale ngaselokishini iMpumalanga kwazalwa iqhawe uMnu uSofasonke Magebhula James Mpanza. Wayeyisifundiswa esizigqajayo ngokuba owomdabu. EMkhumbane waqoqa abantu kwahlaselwa indoda yeNdiya esitolo sayo eyabe ihlukumeza aboHlanga bayibulala bashisa nesitolo sayo.
Wagwetshwa uMpanza kodwa waphunyuka ngowe-1927 esigwebeni sikadilikajele ePitoli. Ngowe-1937 waqala iqembu lebhola i-Orlando Boys eyaba i-Orlando Pirates kusuka ngowe-1939.
Ngowe-1944 wahlanganisa iziqashi eSouth West Townships (Soweto), wamema abaholi be-ANCYL uMandela noSisulu ukuthi babe yingxenye yokuthatha umhlaba ukuze abantu bakhe. Abaholi be-ANCYL bangaba yingxenye yalokhu. UMpanza waqhubeka wawuthatha umhlaba ngempumelelo enabantu ababebalelwa ezi-8000. Ngowe-1959 wenza isethulo wafaka nengcindezi eMkhandlwini waseGoli ukuthi kwakhiwe inkundla yebhola okwaba yi-Orlando Stadium.
Ingxenye enkulu yaseSoweto yakhiwe emhlabeni uMpanza awuthatha ngenkani. Kuncane kakhulu esikuzwayo ngoMnu uMangaliso Sobukwe nePAC, ngoMnu uPhilip Kgosana owayehola imashi yamapasi eKapa kodwa iqiniso lithi zingama-21 kuNdasa we-1960 yiPAC eyamasha eSharpeville, eLanga nakwezinye izindawo eNingizimu Afrika ngomkhankaso wokuthi abantu abaye emaphoyiseni bayozinikela bafike bawatshele ukuthi abawaphethe amapasi ukuze ababophe.
Ngokubona kwe-ANC ukuthi lesi sehlakalo sesithathe imiphefumulo futhi awuyona ingxenye nokuthi wawuzosalela emuva wabe usumemezela ukuthi zingama-28 kuNdasa makube usuku lokuzila ezweni lonke. Emva kwalokhu kwabe sekungenelela nobuholi be-ANC iNkosi uLuthuli, uSisulu, uMandela nabanye okwaphetha ngokuthi neNkosi uLuthuli igcine ilishisile ipasi layo, wahlawuliswa ngalesi senzo kodwa uSokukwe noMnu uPotlako Leballo bagwetshwa iminyaka emithathu nemibili ngokwahlukana kwabo. Lokhuke kukodwa kukhombisa ngokusobala ukuthi izenzo eziwubuqhawe zalabo ababengebona abeqembu elibusayo kuncane kakhulu okwenziwayo ngabo.
UMpanza nenhlangano yakhe iSofasonke wabe eyiqhawe njengeziNgonyama ezalwela umhlaba kodwa okungashiwo lutho ngazo. Imibuzo okumele sizibuze yona ilena elandelayo:
Kungani iFNB ingabizwanga ngoSofasonke?
Kungani isifundazwe iGauteng singabizwanga ngoSofasonke?
Kungani okungenani uMkhandlu waseGoli ungabizwanga ngoSofasonke?
Impendulo ilele ekutheni iqembu elibusayo nosopolitiki abaphethe amandla abasoze bakuthokozela ukumnika isithunzi esimufanele ngoba lokhu akakwenzanga ngaphansi kwenhlangano ebusayo.
Okukamama wakwaColenso kuwudaba olufanayo nolukaSobukwe, olukaGosana, olukaSigananda nolweNkosi uBhambatha kaMancinza Zondi nezimpi ezaziliwa abesifazane eMkhumbane kubangwa ukudayisa kwabo utshwala besiZulu bebangiswa uMkhandlu weTheku. Akukho noyedwa obhalwe njengeqhawe elinsundu ngalo mlando waseMkhumbane wamhla zingama-24 kuMasingana we-1960. Ngabe lokhu yingoba zazingekho izigagayi ezazivelele okungaqanjwa ngazo imigwaqo kuze kubhalwe amaphoyisa kuphela?
Izindawo ezibalulekile eGoli kuyacaca ukuthi ziqanjwe ngamagama abantu ababehambisana neqembu elithize.
Umgwaqo uDF Malan waphenduka waba uBeyers Naude Drive.
Indawo yokuhlanganyele iVan Der Bijl Square yaphenduka yaba iGandhi Square.
Isibhedlela iJohannesburg General Hospital yaphenduka yaba iCharlotte Maxeke Johannesburg Academic Hospital.
Isibhedlela iBaragwanath yaphenduka yaba iChris Hani-Baragwanath.
Isikhumulo sezindiza iJan Smuts yaphenduka yaba yi-OR Tambo International Airport.
Okucacayo ukuthi inkululeko yokuqanjwa kwezinto zomphakathi eyamadlelandawonye eqembu elibusayo nezigagayi zeqembu elibusayo. Uma amagama esephelile abanqeni ukuqamba indawo ngomfula. UMkhandlu eGwa ubizwa ngokuthi iMfuleni, kungani ungabizwanga ngezigagayi zePAC okanye uSobukwe?
Uma kwakwazi ukuguqulwa kwalezi zindawo kungani engakhunjulwanga uSofasonke njengomulweli wamalungelo aboHlanga eSoweto naseMkhumbane.
Kuyophoqa ukuthi iqembu eliyophatha leli lizwe liphinde lenze ubulungiswa, ekuqanjweni kwezindawo komele likhumbule iZilo, aMakhosi, izinduna, izigagayi namaqhawe alwela leli lizwe ezigabeni ezahlukene ngaphandle kokuchema. Ngeluleka abaholi beqembu elibusayo ukuba basenze sonke sizizwe siyingxenye yeNingizimu Afrika okuthiwa eyethu sonke.
Siyawuzwa umsindo ovuka eMzinyathi njengoba imeya yakhona ifuna ukuqamba uMkhandlu ngoMntwana waKwaPhindangene. Asinandaba nokuhlongozwa yi-IFP okuyiqembu elibusayo eMzinyathi kodwa esibaluleka ngakho ukuthi bamkhumbule noBhambatha, amaqhawe ayelwa impi yaseSandlwana, uRuth Nyembe noHarriette Colenso, afana noSmakade Mchunu nabanye ngokuzinzisa isimo kulo Mzinyathi.
UMnu uPG Mavundla unguMengameli we-Abantu Batho Congress (ABC)