Ulahleke kuphi ukhiye ebuholini bentsha?
Izinselelo zesikhathi sanamuhla, zingefaniswe nezinselelo zesikhathi sayizolo. Kanjalo nobuholi besikhathi sanamuhla bungefane nobesikhathi sayizolo. Kepha isintu siyefana zikhathi zonke. Umuntu omusha uma ekhula unamaphupho alokho azibona eseyikho uma esekhulile. La maphupho abalulekile ekulolongeni isiqu salo muntu okhulayo, indlela aziphatha ngayo nezenzo zakhe ezizomenza asondele kuleli phupho lomuntu amfisayo emqondweni wakhe. Kunabantu lo muntu okhulayo abubukela kuye nokuyibo abamenza abe nesifiso sokufana nabathile babo ngelinye ilanga. Laba bantu babalulekile ngoba ngaphandle nje kwezimfundiso umuntu omusha azicoshayo kepha laba afisa ukuba yibo bayisifundo kwesinye isikhathi esedlula izimfundiso ezinhlobonhlobo umuntu omusha adlula kuzona.
Ukuphendula lo mbuzo kakhiye kubalulekile-ke ukuba singabuki nje indlela ubuholi bentsha obenza ngayo sigcine lapho. Kepha kufanele sidlule nasekubukeni umphakathi wethu isimo oyiso nezimfundiso ozifakayo ezinhliziyweni nasezifisweni zabantu abasha namuhla. Uma sibuka indlela yasemphakathini yokuphila namuhla, ihluke kakhulu kulokho umphakathi wayizolo obukade uyikho. Namuhla indaba yokwesaba ihlazo icishe ifane nomdlalo. Kunezinto eziwumbukiso kumbe ubuqhawe namuhla ekade zibukwa njengehlazo izolo. Kunezindlela zokuphila eziwungqaphambili namuhla kodwa ebezibukwa njengehlazo izolo. Lokhu kuyilimazile indlela ebesingalindela ngayo ubuholi obuqotho kubantu abasha banamuhla.
Umuntu omusha ophumelelayo namuhla yilowo onemali eningi, odlisa ngemiswenko kanokusho ebiza imali eshisiwe nezimoto ezibizayo ezishintshashintsha kuhle kwamasokisi. Umuntu omusha ophumelelayo unamathenda ezimali ezinkulu kuHulumeni. Unabangani abanemali yamathenda eningi. Unemizi kanokusho ezindaweni eziphezulu zawomntakabani. Uhamba amahhotela namakilabhu obumnandi ezindawo eziphambili. Uhambela amazwe aphesheya ngezikhathi zokuvakasha egibele kula makilasi abiza imali eshisiwe. Uhamba imicimbi ethile yezwe egqokelwa izinto ezithile ezibiza imali enegama. Uma ungelona leli kilasi, awuyena umuntu omusha ophumelelayo namuhla.
Kufikwa kanjani-ke kule mpumelelo ngokushesha? Yilapho-ke umbusazwe ungena khona. Ubuholi bombusazwe sebaphenduka isitebhiso sale mpumelelo.
Kufanele ube nezindlela ezisheshayo, wazane nabantu abanamandla ezindaweni eziphezulu eziphethe amandla ezinto. Kanjalo nobukhempu emaqenjini ezombusazwe buzaleke khona lapho. Uma iqeqebana elithize ebuholini bentsha yeqembu bungifukula ngaphumelela, kuzofika isikhathi sokuba uma sengisemandleni okulawula ebese ngiklomelisa iqeqebana lami elangifukula ngokuba ngilinike la mathuba okuba liphumelele. Ngishilo ngathi siphila esikhathini lapho ihlazo selingasekho selibizwa ngenye into engazwakala kangcono kunayizolo. Leli hlazo ngilibona libafaka ntshi abaholi abadala ngokuchema nentsha ethize ngezizathu ezingenabuqiniso.
Lezi zindlela zempumelelo ezinqamulelayo seziwubulele umphakathi wethu nendlela enesimilo yempilo. Esikhathini esingaphambilini sempilo yobuholi babantu abasha, bekunobuqotho bobuholi obuma eqinisweni. Umuntu omusha ubethi engumholi ebe ekhuliswa ngendlela ezokwakha ubuqotho kuyena. Ubungaphangwa umdaka. Ubuholi nobuholi bebunendawo yabo ngokwehlukana kwamazinga. Abengekho amathenda okuklonyeliswana ngawo. Sikhule sifisa ukufaniswa nawoMntwana waKwaPhindangene. Kakuwona umdlalo ukufika kulawo magalelo. Ngiyazi ukuthi intsha kwaKhongolose ikhule ifisa ukufana nawoDkt uMandela. Kungumqansa ukufika lapho. Ngiyazi ukuthi intsha yePan African Congress ikhule ifisa ukuba uBaba uRobert Sobukwe. Kubiza iminikelo enzima ukufinyelela lapho. Kepha zonke lezi zingqalabutho zakithi engizibalile ebesifisa ukuba yizo sibukela kuzona kunento eyodwa ezenza zifane, ubuqotho. Yiyona-ke lena esilahlekile kubaholi besikhathi sanamuhla. Ngakhoke, kunokhiye olahlekile khona laphaya ebuholini obudala, okuyiwo olahle ukhiye wobuholi bolusha. Leli sikompilo lokuchema nezinto ezingenabuqiniso ngenxa yethuba elizotholakala kulokhu kuchema liwulimazile umphakathi wethu nendlela yokukhula kobuholi bentsha.
Ake sibuke nje ukuthi kwenzekeni ezweni lethu okuze kwaholela ekubeni kuthiwe kube neminyaka yencithakalo eyisi-9 ezweni. Yimpilo esheshayo yobukhazikhazi engabheki ubuqotho bezinto ezenzakalayo. Enye inkinga esibhekene nayo ukungaboni ukubaluleka kokufunda entsheni. Unoma wubani nje ongafikanga ndawo uyakwazi ukufinyelela ezintweni ezidinga imfundo ethile futhi kumlungele. Lokhu akuyona into embi. Usomqulu wezwe lethu wamalungelo uyakuvuma lokhu. Kepha okubi wukufinyelela ezintweni ezithile ezidinga amazinga athile ukwenze lokhu ngobuqili okusithunazile isithunzi semfundo. Kanjalo nokunikwa kwabathile amathuba ngobungani nangobuqembu kepha bengawafanele, lokhu kwenza isithunzi sokukusebenzela ngemfundo lokho sithunazeke. Isikompilo lokusebenza kanzima empilweni ukuze umuntu azuze impumelelo anokuziqhenya ngayo lilimele. Izindlela ezinqamulelayo sezihamba phambili. Zimbi-ke izindlela ezinqamulelayo ezibukela phansi umthetho. Kanjalo nokungabibikho kwamathuba emisebenzi ezweni lethu kudale isimo sokuba abantu bafune izindlela ezinqamulelayo zokuziphilisa nakuba zingekho emthethweni. Ukufadabala komnotho nokuncipha kwamathuba emisebenzi kuzale ubusomathuba obulimaza ubuqotho.
Zonke-ke lezi zinto zenza kube nabaholi bentsha ebesibadinga abasale ngaphandle ngoba bengeyona ingxenye yobungani nabathile. Lokhu ebese kwakha isithombe sokuthi buyentuleka ubuholi. Cha akunjalo. Bukhona kepha busele ndawana thize. Abafanele abahambe bayobufuna. Intsha yanamuhla isiyazi kakhulu, lokhu kwase kunciphisa izinkundla ezibalulekile zokubuza indlela kwabaphambili. Azibuyiswe lezi zinkundla buqeqeshwe ubuholi. Yebo, umholi uyazalwa. Kepha uthi ezelwe aphinde acijwe ngokuqeqeshwa.
Nabaholi babantu abasha besikhathi sanamuhla ake bakwenqabe manje ukusetshenziswa ngosomathuba abakwetela ngayo ukufinyelela ezikhundleni eziphezulu. Ake intsha inake kakhulu ukuthuthukiswa kwabantu abasha kanye nezindaba zezingqinamba zentsha empilweni yanamuhla. Kukangaki nje emihlanganweni yabantu abasha ukuthi intsha ingakhulumi ngezinketho nezikhundla ezizoba khona kodwa ikhulume ngamathuba abantu abasha nokuthuthukiswa kwabo. Okuseqhulwini ezinhlanganweni zentsha nasemihlanganweni yabantu abasha makube yizidingo nentuthuko yabantu abasha. Lokhu kuzokwenza kube lukhuni ukuba intsha isetshenziswe ngosomathuba ngoba nayo izobe ibeke phambili okuthinta abantu abasha ezinkulumweni zayo. Ake sibe nabaholi bentsha abazoba nemibuthano ekhuluma ngemfundo nokuthuthukiswa kwezindawo zokuqeqeshwa ngemiqondo kwabantu abasha.
Ake sibe nabaholi bentsha abaqhudelana ngokuzithuthukisa kwezemfundo nangemibono eyakhayo yokuthuthukisa ikusasa labantu abasha kwezemfundo. Yebo, izinhlangano zabo zizalwa ikakhulukazi emaqenjini ezombusazwe, kepha ingqikithi yizindaba zentuthuko yabantu abasha. Yikho lokhu okushodayo. Intsha yethu makungabi yimibuthano yenyanga kaNhlangulana ebese kuyaphela. Umsebenzi omningi obalulekile ulele kulezi ezinye izinyanga zonyaka esingazinakile ukuze kufike uNhlangulana sesigubha impumelelo yokusebenza yonyaka wonke.
Indlela ibuzwa kwabaphambili.
UMntomuhle B Khawula uSihlalo wesithathu ngokomlando wobuholi bentsha ye-IFP