Imicijo yenqudulu isesimongo nakumfo kaMathonsi
Usebe sembonini yokuqamba nokudweba kwezokuxhumana iminyaka eyishumi nemisebenzi yakhe iyabonakala futhi iyatuswa
Kuhlale kulukhuni ukubhala ngomuntu omaziyo. Kulokhu kube lukhuni kakhulu ngoba lo okubhalwa ngaye ubesebenza khona lapha kweloHlanga. Lona nguRapule Mathonsi waziwa kakhulu embonini ngelikaPule noma ngelika “uMkhulu Mtshali”. Lena yinsizwa emakhonokhono njengoba ngezandla zayo ikwazi ukuba umdwebi kwezokuxhumana (Graphic Designer), umthwebulizithombe nomhlelimavidiyo. Uma uhlangana naye ungecabange ukuthi nguye lo ongemuva kwemisebenzi emihle esihlale siyibona cishe zonke izinsuku.
Uma ngiqala ukuxhumana nale nsizwa ngayinika umsebenzi wokwakha uphawu lwephephandaba iBAYEDE lolu namuhla olibona njalo uma uthenga noma ufunda elaboHlanga. Ngiyakhumbula nje abanye esabe sinabo baba nokungabaza ngoba nabo babe namagama abantu ababecabanga ukuthi bangawenza lo msebenzi. Okwabe kungabazisa kubo yisigubo sikaMathonsi omunye waze waphimnisa ukuthi: “Usho ukuthi le nsizwa izokwazi ukwakha uphawu olungamukeleka kwaboHlanga, phela lokhu othi akwenziwe nephephandaba ozoliqala kujulile,” kusho omunye engabe ngimsondeze ukuba ezwe enganginakho emqondweni.
Impendulo yami yathi: “Kayihlabi ngakumisa, uzokwenza futhi ngiyakholwa ukuthi uzosimangaza.” Sekuwumlando ukuthi namuhla uphawu lweBAYEDE seluneminyaka eyisi-6 emashalofini kanti futhi sekuwuphawu olungqamile nolwaziwayo.
Isandla sakhe sihle njengoba kule minyaka eyishumi eseke wasebenzela amaviyo ehlukene nahlonishwayo kuleli nasemhlabeni jikelele. Phakathi kwenzinkampanai kubalwa i-Unilever, iTBWA Hunt Lascaris, i-Oliver & More kanye nelaboHlanga. Ungumthwebuli wezithombe osezingeni lomhlaba. Bheka ngoba useke wasebenza nemikhiqizo ehamba phambili ezweni okufaka iKnorrox, iRama, iRobertsons, iSunlight, i-Aquelle, i-Aromat, iKnorr, iRajh, i-AXE, iVaseline, iSTATUS nodume kakhulu iMnandi Mahewu. Nezikhondlakhondla zezinkampani zincinda kuye uMathonsi lapha singabala abakwaSPAR, iTOPS, iDJ Black Coffee Foundation kanye no-Ukhozi
FM ukubala nje abambalwa.
Uma uthi uyamazi ushaye phansi ngoba uthi usamaze kokuthwebula nokudweba kwezokuxhumana bese eqhamuka nokunye. Ubuye adwebe ngopende enze nemifanekiso futhi wake wakhombisa ngemidwebo yakhe eDurban Art Gallery wabuye waba yingxenye yethimba elalithwebula idokhumentari eyafakwa kuDurban Film Festival.
UPule usezuze imiklomelo eminingi embonini yobuciko. Okubalwa imincintiswano iNational Truworths Design a Ginger Mary Competition, iBest Free Standing Unit Design for Radox wabuye waqokelwa emiklomelweni emithathu kuKZN Young Achievers Awards wanqoba lapho kubad webi bokuxhumana. Wabuye wanqoba umncintiswano iPeople’s Choice Award for No.1 Mageu lapho kudwetshwa khona.
UPule wajutshwa ukuba adwebele abakwaDunhill indawo yokuhlala kuDurban July wabuye wadweba nendawo yohlala kwaDecorex
Ngowezi-2018 wangenwa yidlozi wahamba wayothwasa kuthe esebuya lapho wasungula ezokugqoka wathi yiNguni Brand, ezokhombisa ubuhle besiko labeNguni nakhu simuzwa ethi: “Ngiyakholwa ukuthi ngalolu hlobo lwezingubo, abadala bakithi bangithume ukuba ngidlulise umlayezo othi kufanele sithande okwamasiko ethu futhi siziqhenye ngawo njengaboHlanga. Ngiyezwa ukuthi uma ngisika lolu hlobo yilapho ngizizwa khona ngixhumana kalula nedlozi lami.”
kumanje umatasa ulungiselela ukwethula ingqephu i”Ubuntuism” azoyethula ngoNcwaba wezi-2020. Ephawula ngalokho uthe: “Ngalolu hlobo ngixhumana kakhulu nomyalezo ‘Ubuntu’ nokuthi ubuntu buqhamuka kithina boHlanga okungafanele silibale imvelaphi yethu,” kusho umfo kaMathonsi.