Amawolintshi namasu okuwasebenzisa ekhaya
Ngazalelwa enkabeni yeKwaZulu-Natal, edolobhaneni elincanyana elaziwa ngeWeenen okanye KwaNobamba. Abayaziyo le ndawo bayiteketisa ngokuthi kusezweni lamaklabishi. Empeleni, leli dolobhana linothe kakhulu ngezitshalo ezahlukahlukene ezifana namaklabishi, amazambane, ubhatata, utamatisi kanye nezaqathi. Okunye leli dolobhana elinothe ngakho izithelo ezifana namawolintshi (athela abe yizinguzanguza ezihlahleni zawo), amanantshi, ulamula kanye namahananadi. Uthando lwami lwamawolintshi luqhamuka ekukhuleni kwami. Kwaba sebudaleni bami lapho ngaqala ukwazi khona ukuthi iwolitshi liyisithelo ongasisebenzisa ngezindlela eziningi ezahlukahlukene ngaphandle nje kokulidla. Lesi sithelo, nalezo ezisemndenini ofanayo njengolamula kanye namanantshi, sinconywa kakhulu ngabezempilo ngenxa yokuthi siqukethe uVithamini C noba ngusizo kakhulu ekuvikeleni imizimba yethu ezifweni. Kulesi siqephu, ngibone kukuhle ukuthi kesicobelane ngezinye izindlela iwolintshi elingaba wusizo ngalo ekhaya, ikakhulu ekhishini. Nazi ke:
1. Ukuhlanza endlini. Iphunga elimnandi lewolintshi yilona elangenza ngalithanda isu lokuhlanza ngalo usinki kanye nendawo yokusebenzela ekhishini lami. Sika iwolitshi phakathi nendawo bese uvuvuzela kancane usawoti engxenyeni ngayinye, bese ulihlikihla kusinki wakho noma lapho usebenzela khona ngaleli wolintshi. Emva kwalokho uyobe ususula ngendwangu emanzana. Iphunga elisala lapho limnandi ngendlela emangazayo.
2. Emva kokuhluba iwolitshi lakho, faka amakhasi alo emgqonyeni wezibi wasendlini (ungawafaki kuplastiki).
Lokho kusiza ekunciphiseni iphunga elibi elivamise ukuba semgqonyeni kadoti.
3. Liyakukhathaza iphunga elisefrijini yakho? Ukulwa nalo, sika iwolitshi kabili, bese ukopolota le ngxenye edliwayo ngesipuni. Faka usawoti phakathi. Lithathe ulibeke ngemuva efrijini yakho. Angeke uphinde ukhathazeke ngephunga elibi, ngiyakwethembisa.
4. Uma ungumuntu wengadi, uthanda ukutshala, ngokuzayo, ungawalahli amakhasi ewolitshi kodwa uwaphose enhlabathini ozotshala kuyona. Lokhu kulekelela ekuvundiseni inhlabathi yakho ukuze ilungele ukutshala.
5. Iningi lababhaki liyavuma ukuthi enye yezinto ezicasulayo ngoshukela onsundu, ukuhlangana kwawo uqine. Isikhumba sewolintshi singaba yisixazululo sakho kule nkinga. Phosa amakhasi ambalwa esitsheni sakho esiqukethe ushukela onsundu. Uzomangala uma usubona usuhlakazekile emva nje kwamahora ambalwa efakiwe. Kwenze kube wumkhuba nje lokhu, uwashintshe amakhasi uma ubona ngathi ayoma. Liyangisebenzela kakhulu leli lisu, ngiyethemba lizokusebenzela nawe.
6. Uma unendawo lapho ongafisi ukuthi kusondele amakati kuyo (njengasezitshalweni zakho), yizungeze ngamakhasi ewolinsthi. Amakati awalikhonzile neze iphunga lamakhasi ewolintshi. Uzophumula ukuxoshana namakati kuleyo ndawo.
Uma kukhona ezinye izindlela osebenzisa ngazo amawolintshi okanye amakhasi awo, engingawabalulanga lapha, ngingajabula kakhulu ukuzwa ngazo. Ungangibhalela ku:szungu@nkzgroup.co.za