IToyota Hilux entsha izobonakala maduze eNingizimu Afrika
AbakwaToyota sebebuyekeze iHilux ngokuguqula isakhiwo, ukufaka ubuchwepheshe kanye nokunyusa amandla. Isakhiwo sangaphambili sithole ushintsho olukhulu njengoba kutholakala igrille entsha enkulu kunakuqala, amathoshi eLED asekhanyisa kudim nakubright kanti ubhampa ushintshiwe isakhiwo nawo. Amathayi awu-18 Inch athole isakhiwo esisha kanti ngemumva amathoshi asethole ubuchwepheshe beLED okungokuqala emlandweni weHilux.
Ingaphakathi aliguqukanga kakhulu ngesakhiwo kodwa ubuchwepheshe obusetshenzisiwe busezingeni eliphezulu. Isibuko senkombajubane sesiwu-8 Inch ubukhulu futhi sikhombisa yonke imininingwane yesimo semoto kanye nesokuhamba. Isibuko somsakazo naso sithole ukubuyekezwa njengoba sesifika ne-Apple CarPlay® kanye ne-Android Auto™. Emakethe yaphesheya kuvele ukuthi kuzoba khona nomsakazo weJBL Premium Sound onamandla awu-800W okusolakala ukuthi nasemakethe yethu izoba khona. Isifika ne-3D Camera ekhombisa amacala onke emoto uma uhlehla. Ngaphakathi usuthola nokukhanya kweLED Ambient okukhanya ngokuluhlaza.
Injini ithole ukunyuswa amandla lapho i-2.8 GD6 isinamandla angu150kW (inyuke ngo-20kW) bese iba neTorque ewu-500Nm (isuka ku-420Nm kuqala) okwenza iHilux isuke ku-0 iye ku-100km/h ngemizuzwana elishumi. Ifika idonsa ngamasondo angemumva (4x2) noma idonsa ngawo womane (4x4). Kukhona enamagiya ayisithupha ashintshwayo (6-speed manual) kanye nenamagiya ayisithupha azishintshayo (6-speed auto).
Ubuchwepheshe bokuvikela sebunyusiwe njengoba isikwazi ukwazisa umshayeli uma imoto iphaphalaza kumgwaqo wayo (Lane Departure Alert), futhi uma ufaka uCruise Control isizokwazi nokukala imoto engaphambili izehlise ijubane uma isondela kuyona (Dynamic Radar Cruise Control). Okwamanje abakamemezeli abakwaToyota ukuthi izodayiswa nini kodwa ungakapheli lonyaka izobe isikhona emgwaqeni waseNingizimu Afrika. Sizokwazisa kulo leli phephandaba uma amanani esephumile.