Makhulu impela amandla eNkantolo yoMthethosisekelo
Kuningi esibhala ngakho okuthinta ukusebenza koMthetho esigcina sicabanga ukuthi sikuqondise kubantu abathile abanolwazi loMthetho kodwa sithole ukumangala ukuthi baningi abanomdlandla ngakho nabakulandelayo. Ngivamise ukubhalela iphephabhuku lezomthetho lapho sigxila kakhulu ezintweni ezithinta umthetho nokusebenza kwawo. Leli bhuku yiHarms Dr Civil Procedure in the Superior Courts.
Ngisanda kumangala ukuzwa ngomunye wabafundi balo ukuthi uliphonsele ababhali inselelo lapho ibhuku libheka khona isigaba sokuchitshiyelwa koMthethosisekelo esibizwa ngokuthi i-17th Amendment of the Constitution.
Abawulandelayo umthetho bazokhumbula ukuthi emuva kwesichibiyelo lesi sigaba sibe sesinika amandla Inkantolo YoMthethosisekelo ukuba ivumeleke ukucubungulisisa amanye amacala adluliselwa kuyo. Lokhu kuchaza ukuthi le nkantolo yabe isikwazi nokuthatha nezinqumo ngokushesha ngaphandle kokunqunyelwa isikhathi.
Lo mfundi obephonsela ababhali baleli phephabhuku lezomthetho inselelo ubekhuluma ngoMthetho 167 (3) woMthethosisekelo okuthe emuva kokuba sekwenziwe isichibiyelo kusukela ngoMandulo wezi-2013 wama ngendlela ehlukile njengoba usuthi iNkantolo
YoMthethosisekelo iyiNkantolo eNkulu ezweni. Iyona le Nkantolo enamandla okukhipha izinqumo ezindabeni ezithinta uMthethosisekelo nanoma yiziphi izindaba inqobo nje uma iNkantolo YoMthethosisekelo iqoma ukulidlulisela phambili udaba ngoba kukhona lapho ingazwisisi kahle khona.
Iyona enamandla okukhipha isinqumo esingujuqu sokuthi ngabe udaba lolo, lungena ngaphansi kwayo noma cha.
Ecaleni likaNgcobo J wenkampani iLufuno Mphaphuli and Associates noAndrew nabanye lowezi-2009 kusuka emshweni wama-293 kuya kowama-299 lapho kudingidwa khona ngobudlelwano phakathi kweNkantolo Yokwedlulisela Amacala neNkantolo YoMthethosisekelo ngaphambi kokuba kwenziwe isichibiyelo, i-17th Amendment to the Constitution yowe-1996, kwahlaluka ukuthi iNkantolo YoMthethosisekelo akuyona nje inkantolo ejwayelekile, kodwa ineqhaza elibalulekile elibambayo ezindabeni ezithinta uMthethosisekelo, hhayi noma yiziphi izindaba.
Nakuba kunjalo kodwa isichibiyelo i-17th Amendment yakuguqula lokho ngenxa yokungenelela kwePhalamende. Udaba lwecala likaNgcobo J nabanye kwacaca ukuthi kwakuwudaba okwakungenasidingo sokuthi lwalungaze ludluliselwe eNkantolo YoMthethosisekelo kodwa lwalungadingidwa luphele nakwezinye izinkantolo.
Qaphela ukuthi ngaphambilini kokuba kwenziwe isichibiyelo, leli cala lalichazwa ngokuthi luwudaba lweNkantolo YoMthethosisekelo kuphela.
Isibonelo nje icala likaLee noNgqongqoshe Wezokuhlunyeleliswa Kwezimilo langowezi-2013 lapho inkantolo yanquma khona ukuthi udaba lwabo kwakumele luphelele eNkantolo Yezokwedlulisela Amacala. ULee owabe eyisiboshwa wayefuna kubhekelelwe amalungelo akhe anikezwe indawo ekahle yokuhlala, anikwe imithi yokwelapha nokudla okunempilo.
INkantolo yanquma ukuthi lolu daba lubalulekile hhayi kuphela kuLee kodwa nakwezinye iziboshwa nomkhakha wezempilo ngobubanzi.
Kuhle ukuthi sekwenziwe isichibiyelo ngokusebenza kweNkantolo YoMthethosisekelo akusadingi ukuba ize ichaze kabanzi uma ingeke ikwazi ukudingida amanye amacala.
Icashunwe embhalweni ka-Advocate uDereck Harms SC. U-Advocate uHarms uneziqu zeLLB, DIP azizuza eLondon. Ungummeli omkhulu eCape Bar