Kume imiqhudelwano yasebusika
Umhla zili-16 kwephezulu uzohluka kakhulu kulo nyaka. Lolu suku olwaziwa ngolwentsha kujwayele ukuthi kwenzeke izinto eziningi ngalo, imicimbi ethize kanye nemiqhudelwano ezindaweni zasemakhaya nasemalokishini.
Ngenxa yokhuvethe (coronavirus) konke lokhu ngeke kwenzeke, abantu lolu suku bazolugubha besemakhaya kwazise abantu akuvumelekile bahlangane.
IBAYEDE ikhulume noMafa Zuma ongumhleli womqhudelwano iHeroes Cup, oba minyaka yonke eChesterville.
UZuma uthe ukhuvethe lubalimaze kakhulu kwazise nonyaka bebenezinhlelo ezinkulu ngalo mqhudelwano.
“Ukube kuya ngathi lo mqhudelwano ubuzoba khona kodwa ngeke sikwazi ukuphikisana nemiyalelo kaHulumeni ngaphandle kwalokho besizobe sifaka inhlangano ephethe unobhutshuzwayo iSouth Africa Football Association (SAFA) enkingeni. Izinhlelo ebesinazo bezizokwenza iHeroes Cup udumo lwayo lunyuke kakhulu,” kusho uZuma.
Lo mqhudelwano waqala ukuthi uhlabahlose ngonyaka wezi-2006. Ukuqala kwawo waqala udlalwa amaqembu amane, abayisi-8, ugcine ukudlalwa amaqembu ali-16.
UZuma uthe ngengcindezi ababefakeleka yona amaqembu efuna ukuba yingxenye yalo mqhudelwano bebezonyusa amaqembu abe ngama-32.
IHeroes Cup ayigcini ngokuthi idlalwe abadlali abadlalela amaqembu asemalokishini kuphela kodwa nabadlala ebholeni elikhokhelayo bayawudlala.
Ukubala abadlali abambalwa abake badlale lo mqhudelwano u-Ayanda Gcaba oseke wagijima ku-Orlando Pirates, uMenzi Masuku weBloemfontein Celtic, uSiyanda “Magazi” Xulu weMaritzburg
United, uThabo Cele weC.D Cova da Piedade yasePortugal, uRicardo Goss weBidvest Wits, uTshepo Liphoko woUthongathi FC nabanye abaningi.
Omunye oseke wadlala lo mqhudelwano uSenzo “Nzori” Meyiwa ongasekho emhlabeni, ngalowo nyaka wayevimbele uMlazi.
“Umthetho walo mqhudelwano iqembu belidlala ngabadlali abadlala emazingeni aphezulu abahlanu bese kube abadlala emazingeni aphansi. Inhloso yalokho bekuwukugqugquzela abadlali abancane ukuthi nabo bangafika esigabeni esiphezulu. Besesikhulumile noMandla Ncikazi, uSteve “Mphathi” Komphela, uManqoba Mngqithi noPitso Dladla oqeqesha uThongathi ukuba bazobheka ikhono kubadlali abancane,” kunaba uZuma.
Iqembu elinqoba lo mqhudelwano lijwayele ukuhamba nezinkulungwane ezingama-R20, uxhaswe iHollywoodbets, iRedbull kanye nosomabhizini bendawo.
UMsholozi, abakwaZuma, uthi ukhuvethe alugcinanga ngokumlimaza kulo mqhudelwano, luphinde lwalimaza umgqigqo weqembu ayisekela mqeqeshi kulona iSummerfield Dynamos FC egijima ku-ABC Motsepe League KwaZulu-Natal.
“Kuligi sihlezi endaweni yesibili kulogi sisalelwe imidlalo eyisi-6 , ngendlela okumiswe imidlalo bengisho ukuthi nakanjani sizoya kodlala imidlalo yokuhlungela ukungena kuGladAfrica Championship nakhona sifike silwe. Kodwa thina abaqeqeshi nabaphathi kukhona esikwenzayo ukuthi baziqeqeshe ngabodwana. Okunye bayaholelwa okubakhuthaza ekutheni bangenzi okuphambene kulesi sikhathi,” kusho uZuma.
Omunye umqhudelwano obubhekiwe okaDerrick Spencer, obizwa ngeDerrick Spencer Soccer Festival.
Lo mqhudelwano owasungulwa ngonyaka wezi-2011 ubuzoqala namuhla ngoLwesihlanu usongwe kusasa, ezinkundleni zaseShowe.
IBAYEDE ikhulume nomgqumgquzeli walo mqhudelwano uSfiso Ndlovu, nothe umoya wakhe awumuhle neze njengoba ungeke ube khona kulo nyaka.
“Kulukhuni ukwamukela ukuthi into ebesiyenzeke iminyaka eli-10 kulandelana nonyaka ngeke isaba khona. Silimele kakhulu njengoba lo mqhudelwano unyuka unyaka nonyaka, nakulokhu besinesiqiniseko sokuthi sizolinyusa izinga lawo. Besizokwandisa amaqembu njengoba ejwayele ukuba li-16 siphinde sibize izinhloli zabadlali eziningi eziqhamuka emaqenjini amakhulu.
Okubuhlungu kakhulu ukuthi lo mqhudelwano kulezi zinsuku ezimbili ukhona uyakwazi ukunyusa umnotho kodwa nonyaka lokho ngeke kwenzeke,” kusho uNdlovu.
Namuhla ngoLwesihlanu bekuzoqala kudlale izikole ezili-16, bese kuthi kusasa kudlale amaqembu. Ngendlela izinga lalo mqhudelwano elikhulu ngakhona kudlala amaqembu aqhamuka eGoli naseSwazini imbala. Iqembu elisuke linqobe lo mqhudelwano lihamba nezinkulungwane ezingama-R50, uxhaswe omasipala ababili okuwuMlalazi neKing Cetshwayo.
IDerrick Spencer Soccer Festival iphinde ihanjelwe izingwazi zikanobhutshuzwayo kakhulukazi ezidlalela iKaizer Chiefs ne-Orlando Pirates. Kwezinye zalezi zingwazi singabala uDoctor Khumalo, uFabian McCarthy noJoseph Makhanya nabanye abaningi.
UNdlovu uthe intsha ibizothola ithuba lokufundiswa ngonobhutshuzwayo yizinkhakha mahhala.