Abadlali abangalindi amathonsi abanzi - uSifiso
Owayengumgadli ongalibheki ipali emaqenjini amakhulu kuPremiership uSifiso “Jomo” Vikakazi ukhala ngesinqumo sikaHulumeni sokwehlisa isibalo sabagibeli ematekisini.
Selokhu kuqale imvalelwakhaya, amatekisi kuzwelonke aqale angalayisha kwathi ngokuhamba kwesikhathi avunyelwa. Nokho avunyelwe ukuthutha abantu abangama-70% umthwalo ngamunye nokuyinto abanikazi bamatekisi abathi ibalimaze kakhulu.
UVilakazi, ogcine ukubonakala emehlweni abantu egijima kuMaZulu FC ngowezi-2014, uthi sibalimazile isinqumo sikaHulumeni. Le nsizwa eyayivamise ukuthwalisa kanzima iKaizer Chiefs ithi iqale ukungena ebhizinisini lezokuthutha ngowezi- 2009. Usebenza ngaphansi kweKempton Park Taxi Association eGoli.
“Lesi sinqumo sikaHulumeni siyasilambisa kakhulu. Yebo khona uHulumeni usizamile ngokuthi asenzele ufefe namabhange nasezinkampanini esithenge kuzo amatekisi, kodwa ukungalayishi igcwale kuyasilimaza kakhulu,” kukhala le nsizwa ewuswahla edabuka eDriefontein, eMpumalanga.
Uvumile ukuthi impilo ayisafani njengakudala esengumdlali webhola owayehlale esemehlweni abantu.
Uthi imali ayenza kuMaZulu, iFree State Stars, i-Ajax Cape Town neBidvest Wits wayilondoloza kwathi enye wathenga ngayo amatekisi ahambela eGoli nangakubo eMpumalanga.
Abaningi bamkhumbula ngamagoli amabili angcwaba ngawo uSuthu kowanqamu eNedbank Cup eFNB Stadium eGoli ngowezi-2020. Uthe angeke awukhohlwa umzuzu wokunqoba isicoco seTelkom Knockout ne-Ajax edlala ngokuzwana noMabhuti Khenyeza.
I-Ajax yaguqisa izimfivilithi i-Orlando Pirates eChatsworth Stadium ngamagoli amabili kwelilodwa ngowezi-2014.
Uma engekho matasa ngokugada umsebenzi erenki, uVilakazi uzibandakanya ne-Off Pitch Goal, enohlelo lwethelevishini olugxile ekusizeni abadlali ukuthi bonge imali yabo.
Weluleke abadlali bamanje ukuthi bangayixhaphazi imali, wathi yena usenawo umuzi eKempton Park awuthenga ngemali yebhola. Ubaluleke ngokuthi njengoba imali isabavuma kumele basungule amabhizinisi abangaziphilisa ngawo nemindeni yabo uma sekuphelile ngabo ebholeni.
Umgadli weChiefs, uBernard Parker, usungule indawo ngakubo eBoksburg egxile ezintweni ezisetshenziswayo uma ufuna ukwehlisa umzimba noma ukwenza isikhumba sibe sihle.
UThabiso Semenya weBaroka FC naye usewalungele amathonsi abanzi njengoba enenkampani iKgaleke Tours eqashisa ngezimoto ezithutha izivakashi.
Umdlali waseswini woSuthu, uMichael Morton, unenkampani egxile ekugcineni imizimba iqatha. Kakade unesitifiketi sokuba iPersonal Trainer nokuba iNutritional Coach.
UMorgan Gould wodumo lokudlala kuJomo Cosmos, iSuperSport United neChiefs uhlanganisa isitolo sezingubo zokugqoka. Lesi sitobha seStellenbosch FC kubukeka sizowathola amakhasimende kwazise silandelwa inqwaba yabantu ezinkundleni zayo zokuxhumana. Njalo uma kunento yokugqoka ayigaxile abantu babangisana ngemibuzo yokuthi isiyatholakala yini emakethe.
Abalingani uSiphiwe Tshabalala noReneilwe “Yeye” Letsholonyane bona banendawo yokuphola iShaye Lounge eseSoweto.