Bavunjululwa bahlubuke bashiye isilonda - uNcita
Unesilonda esingapholi uWelcome “Hawk” Ncita sokungakhiqizi ompetha abaningi bezicoco zomhlaba.
UNcita waba yingqwele yokuqala yomhlaba eNingizimu Afrika ngesikhathi ebuya nesicoco se-International Boxing Federation (IBF) Junior Featherweight kwa-Israel ngowe-1990.
UNcita, owayephekwa umqeqeshi uMzimase “Bra Mzi” Mnguni, wabukisa ngoFabrice Benichou eTel Aviv kwanyakaza iNingizimu Afrika cishe yonke ngoba kwakuqala ukuthi kube khona umuntu onqoba isicoco senhlangano ebalwa nezine ezinkulu emhlabeni.
Ngemuva kokuwagaxa emgibeni amagilavu ngowe-1998, uNcita wagxila ekuvundululeni ikhono labafana bangakubo eMdantsane nase-Eastern Cape namaphethelo.
“Ngakhiqiza abantu abanjengoGabula Vabaza noMhikiza Myekeni okwathi uma sebevuthiwe ngephucwa abaqeqeshi ababenokungcono kunami ngokuma kangcono ezimalini. Namanje ngisakhala ngoba ngikholwa wukuthi ngabe bafinyelela esicongweni ukube abangishiyanga. Lokhu kusangithunuka enhliziyweni yami kodwa ngizoqhubeka nokubhukula,” kusho uNcita.
UVabaza, owayeteketiswa ngokuthi uSlashing Tiger ngenxa yokubhozomela kwakhe indoda eringini kuhle kwengwe ihlasela isitha, waqala waba umpetha kazwelonke esigabeni seFlyweight ngaphansi kobuholi bukaNcita.
Lo mlisa waseDuncan Village washona eseke waphatha isicoco seWorld Boxing Union (WBU) Junior Bantamweight neseWorld Boxing Assciation (WBA) Inter-Continental.
UMyekeni yena wafika ngeshodi njengoba waqala ngese-International Boxing Organisation (IBO) wanezezela ngeseWorld Boxing Council (WBC) International. UNcita ukholwa ukuthi kumele osomankomane ababavundulule emazingeni aphansi baqhubeke basebenze nabo uma sebelwa esigabeni esikhokhelayo.
Yize iSA Boxing Federation iwufuqa lowo mkhankaso kodwa i-International Amateur Boxing Association, engamele isibhakela sama-amesha emhlabeni jikelele, iyakuchitha lokho.
UNcita uthi okwenza wabuya nesicoco se-IBF phesheya kwezilwandle wukuthi wayethola ukugqugquzelwa ukubuka inkakha uNkosana “Happyboy” Mgxaji, obalwa nabanye ompetha bezinga eliphezulu abakhiqizwe eNingizimu Afrika.
Uthi nangesikhathi ethole ithuba eliyingqayizivele lokuqeqeshwa uLuther Burgess ejimini yodumo iKronk Gym e-USA, lokho kwamsiza kakhulu uma esengene eriningi.
Leli bhande le-IBF laba umtshelekwane kwazise baningi osonkomane bakuleli abaliphatha.
Ngemuva kokuthi uNcita ephucwe uKennedy McKinney ngowe-1992, kwaqhamuka uVuyani “The Beast” Bungu, ehlwitha leli bhokisa lase-USA ngowe1997.
UBungu walivikela amahlandla ali13 ngaphambi kokulilaxaza ngenhloso yokuzama ukunqoba elinye. Ngebhadi wamiswa uNaseem “Prince” Hamed empini yeWorld Boxing Organisation (WBO) Featherweight ngowezi-2000.
Ngemuva kukaBungu kwaqhamuka uLehlohonolo “Hands of Stone” Ledwaba waseMeadowlands eGoli ngowe-1999, owahlula uJohn Michael Johnson waseBritain empini eyayiseCarousel Casino eHammanskraal, eGauteng.
ULedwaba, owalivikela amahlandla ayisihlanu, wephucwa uManny “Pacman” Pacquiao eLas Vegas e-USA ngowezi-2001.
Ngemuva kukaLedwaba kwavumbuka umkhaya wakhe uTakalani “Panther” Ndlovu okusenguye owokugcina ukuligqoka leli bhande. Nokho wayelithole eselizama okwesibili kuSteve Molitor waseCanada. Empini yangowezi-2010 uNdlovu wahlulwa ngamaphuzu eCasino Rama kwase kuthi ngonyaka olandelayo umfokaGatsheni wabuya ngamandla eNasrec Indoor Arena eGoli.