Inzuzo kuPSL ibukeka izofadabaliswa wukhuvethe
Ukutsheka kwesimo somnotho ezweni kuzodala ukuthi iPremier Soccer League (PSL) ingakwazi ukwenza inzuzo yesigidigidi samarandi eyasenza ngonyaka wezimali owedlule.
Ngasekupheleni konyaka odlule le ligi ebalwa namanye ahamba phambili emhlabeni yaba undabuzekwayo ngesikhathi imemezela ukuthi ikwaze ukwenza le ngqophamlando yenzuzo.
Kodwa ukugadla kokhuvethe sekushaye ngisho umnotho wamazwe ngamazwe nosekwenze nekusasa lebhola lakuleli lidunguze ebumnyameni.
Ukuphuma kwabaxhasi abakhulu beligi ibhange i-Absa, okuthiwa kungenzeka indawo yabo ithathwe iBidvest Group noma iBetway, kubukeka kuzozwela kakhulu.
Onyakeni wezimali wezi-2018/19 i-Absa yakhokhela iPSL imali engaphezulu kwezigidi ezili-R138.
Kodwa akubukeki kusazohamba kanjalo njengoba sekudonsa ezinyangeni ezintathu selokhu imidlalo yamiswa ngoNdasa.
Inkulu futhi nemali esilahlekele iligi ngenxa yokuthi imidlalo ayisakazwa. AbakwaSuperSport International okuyibona abanegunya lokusakaza imidlalo banika iligi isigaxa sezigidi ezingama-R600.
Njengoba isimo sibheda kanje akubonakali laba baxhasi bezophinde bahlukane nemali eningi kangaka njengoba imidlalo ingabonwa nangokhalo.
Kukhulunywa nje akwaziwa ukuthi isizini izoqedwa yini. Nesikhathi kubukeka sidliwa ingcanga ohlangothini lweligi njengoba ingakwazi ukuhlanganisa amaqembu ajime ekhempini ukuze kuqedwe imidlalo engama-54 ngaphambi kokuthi kushaye umhla zingama-31 kuNtulikazi.
Kunemibiko elokhu iqubuke njalo ethi ukungaboni ngaso linye phakathi kukaSihlalo wePSL uDkt u-Irvin Khoza noMengameli weSA Football Association (Safa), uDkt uDanny Jordaan, yikho okudala ukuthi kungaziwa ukuthi lizobuyela yini ensimini.
Kuthiwa iPSL ithi ngokwayo konke sekumi ngomumo kodwa iSafa isakhala ngezinto ethi azilandelwanga kahle.
Uma kugcinwa ngokuthi isizini ayiqhubeki, mkhulu umonakalo ozokwenzeka.
INedbank inelungelo lokufuna ngo dli imali yayo uma umqhudelwano ewuxhasile ungaqedelwa. Njengamanje kusele imidlalo emithathu; emibili eyandulela amanqamu nowamanqamu.
Isiyonke inzuzo eyenziwa iPSL yesizini yezi2018/19 imi kanje; iSuperSport izigidi ezingama-R600, i-Absa ezili-R138, iMTN ezingama-R43, iTelkom ezingama-R57, iNedbank ezingama-R80 kwathi iMultiChoice: ezingama-R41m. Khonamanjalo, kuthiwa kungenzeka amaqembu abeli-18 ngesizini ezayo. Ngenxa yokhuvethe kuthiwa iligi icabanga ukuyeka ukugenca amaqembu amabili ngezembe bese kuthi amabili akhushulwe. Kodwa ngesizini ezayo kuzobuyelwa emaqenjini ali-16 bese kuthi amaqembu amane agencwe yizembe.