Uginqigonqo ngekhemikhali ethandwa yizakhamuzi
Ukuqubuka kokhuvethe emhlabeni kwamisa wonke amazwe omhlaba, kwabeka engcupheni izimpilo zabantu kwaphinde kwaqala umjaho wokuthi amazwe athole ikhambi lokhuvethe lokhu kujaha okungagcina kuba wukuxhamazela okuholela izakhamuzi eweni.
Izakhamuzi zaseBolovia ezifuna ukugwema noma ukwelapha ukhuvethe zidla okanye zisebenzisa ichlorine dioxide. ISishayamthetho sikwamukelile lokhu kusetshenziswa kwechlorine dioxide ukuzelapha ngisho uMnyango Wezempilo wakuleliya lizwe uthe ayingasetshenziswa. Ichlorine dioxide ifana nebleach okuthe i-US Food and Administration yaxwayisa abathengi ukuthi bangabeka impilo yabo engozini futhi akufanele ithengwe noma iphuzwe njengekhambi.
Kodwa edolobheni laseBolovia iCochabamba lapho uHulumeni wesifundazwe ukuvumile ukusetshenziswa kwayo abanye abathengi bathi leli khambi lingabasiza.
“Ngizwe ezindabeni ukuthi ekhemesi bayayidayisa le chlorine dioxide. Abangani bami bathathe ezimbili eyodwa eyokuzivikela eyesibili eyokuzelapha futhi iyabasebenzela,” kusho isakhamuzi.
Ezinye izakhamuzi zithe zona zididekile ngezeluleko ezinikwe zona. “Njengenjwayelo iziphathimandla zithe abantu mabaxhumane nodokotela babo, baphi odokotela ngoba phela abantu abangenamali abanabo odokotela bona?” kubuza esinye isakhamuzi saleliya lizwe. Ngokwezibalo kuyavela ukuthi iBolovia inabantu abangaphezu kwezi-60 991 asebetholakele benokhuvethe okuthe abayizi-2 218 bashona ngenxa yalolu bhubhane.
UDkt uRene Sahonero, onguMeluleki woMnyango Wezempilo uthe uMnyango uxwayise kaningana ngokuthi abantu bangayisebenzisi ichlorine dioxide ukuzama ukulwa nokhuvethe. “Sesivele sisidwebile isisombululo esisho ukuthi le nto ayivunyelwe futhi ayifanele ukusetshenziswa ngabantu nokuthi ingaba nemiphumela emibi,” kusho uSahonero ophinde wabika ukuthi amacala obuthi bechlorine dioxide ayesebikiwe.
Naphezu kokuthi uMnyango Wezempilo uxwayisile ngokusetshenziswa kwechlorone dioxide isigungu sezwe emasontweni adlule sisayine umthethosivivinywa obuvuma ukusetshenziswa kwayo ukuvimba nokwelapha ukhuvethe.
Kodwa futhi lo mthethosivivinywa kufanele uqale udlule esigabeni sendlu ephansi ubuye uphinde ungangeni enselelweni yokuvotelwa ngaphambi kokuba ube umthetho.