Seyivumile i-IMF ukuboleka iNingizimu Afrika izigidigidi zamarandi
Njengoba lucindezele ukhuvethe iNingizimu Afrika ifake isicelo ku-International Monetory Fund sokubolekwa imali ezosiza ukubhekana nezinkinga zokhuvethe. I-IMF isivumile isicelo semali eyizigidigidi ezingama-R70, ezokhokhwa nentela ephansi eyiphesenti elilodwa. Le mali ilandela eduze enye imali ebolekwe iNingizimu Afrika yiAfrican Development Bank eyizigidigidi ezi-R5, nayo okwathiwa ngeyokusiza ezinhlelweni zokhuvethe. Le mali ilandela enye obekukhulunywa ngayo ebolekwe leli lizwe yiNew Development Bank, eyayibizwa ngeBRICS Bank kuqala, okuthe ngenyanga kaNhlangulana yanika leli lizwe imali eyizigidigidi ezili-R17 wamarandi. Kunovalo olukhulu lokuthi ukuboleka ngalolu hlobo kulimaza ikusasa lezwe ngoba izizukulwane yizo ezizothwala lesi sikweletu zibe zingenzanga zikweletu. Mhla zingama-24 kuNhlangulana kuwo lo nyaka bekumele iNingizimu Afrika iqale ikhokhe inzalo engamasenti angama-21 kulelo nalelo randi. Ukukhokha inzalo akusho ukuthi siyehla isikweletu. Kusazoba nzima.
NgoMsombuluko zingama 27 kuNtulikazi 2020
Kuvule izimakethe ngoMsombuluko intengo yegolide ilokhu igengqeza phambili yenyuka selifinyelele kumadola ase-USA ayi-1 900.
Irandi likhombise ukuba namandla ngoMsombuluko ekuseni. Sivuke idola lase-USA lilingana namarandi ali-16, 60.
Sivuke ngoMsombuluko irandi lisalokhu lizimelele lapho belikhona kuvalwa ngoLwesiHlanu. Zivule izimakethe uPondo wase Britain ulingana namarandi angama-21, 30.
Likhombise ukuthamba irandi uma libhekene neYuro ekuseni ngoMsombuluko. Kuvule izimakethe iYuro lilingana namarandi ali-19,42, okusho ukuthi ngempelasonto lilahlekelwe ngamasenti amathathu.
Intengo kawoyela ithe ukwehla kulokho eyayiyikho kuvalwa ngoLwesihlanu. Izimakethe zivule intengo kawoyela imi kumadola ase-USA angama-43,19.
NgoLwesibili zingama-28 kuNtulikazi 2020
Liyaqhubeka nokuphakama irandi ngoba likwazile ukubuyisa amasenti asondele emashumini amabili kudola lase-USA. Kuvule izimakethe ngoLwesibili idola lase-USA lilingana namarandi ali-16,43, okuyinto esishiya sinethemba ngekusasa.
Izimakethe zivule irandi libuyise amandla lasuka lapho belimi khona kulezi zinsuku ezimbalwa ezedlule. Kuvukwe ngoLwesibili uPondo waseBritain ulingana namarandi angama-21,13.
Uma sibheka irandi libhekene neYuro kubonakale likwazile ukusimama lawabuyisa amasenti ebese liwalahlile ngempelasonto edlule. Kuvule izimakethe iYuro lilingana namarandi ali 19,28.
NgoLwesithathu zingama-29 kuNtulikazi 2020
Kuvukwe ngoLwesithathu irandi lilahlekelwe ngamasenti ayisikhombisa uma siliqhathanisa nedola lase-USA. Idola lase-USA sivuke lilingana namarandi ali-16,50 ekuseni ngoLwesithathu. Nokho kuthande ukudida lokhu ngoba kulesi sikhathi i-US Federal Reserve Bank ikhiphe isitatimende esithi i-USA iphelelwe ngamasu aphusile okusimamisa umnotho emva kokuba ushaywe wukhuvethe.
Kuvule izimakethe ngoLwesine uPondo waseBritain ulingana namarandi angama-21,31. Lokhu kukhombisa ukuthi irandi lilahlekelwe ngamasenti angaphezulu kwamashumi amabili.
Umgqigqo phakathi kwerandi neYuro uveza isithombe sokuthi kunoginqigonqo owenzekayo kulesi sikhathi. Liyazama ukusimama irandi kodwa ngosuku olulandelayo iYuro libuye ngamandla. Kuvukwe ngoLwesithathu iYuro lisimeme lalingana namarandi ali-19,35.
NgoLwesine zingama-30 kuNtulikazi 2020
Irandi libukeke lidangele ekuseni ngoLwesine uma liqhathaniswa nezimali ezehlukene ezimakethe. Lilahlekelwe ngamasenti athile kuzo zontathu izimali zamazwe esisebenza kakhulu nazo.
Uma liqhathaniswa nedola laseUSA irandi lilahlekelwe ngamasenti ayishumi nesikhombisa okuchaza ukuthi bekudingeka kuhlangane amarandi ali16,67 ukuze lilingane nedola lase-USA.
UPondo waseBritain kuvule izimakethe ulingana namarandi angama-21,63 okuchaza ukuthi irandi lilahlekelwe ngamasenti asondele kumashumi amathathu.
Amarandi kuvule izimakethe kudingeka aqoqane abe li-19,62 ukuze amelane neYuro. Lokhu kukhomba ukuthi irandi lilahlekelwe ngamasenti asondele emashumini amathathu.
Abahwebi abamamathekayo kulezi zinsuku yilabo abahweba ngegolide njengoba intengo iqhubeka nokwenyuka. NgoLwesine i-awunsi legolide belibiza amadola ase-USA ayi-1 952 okuletha ithemba lokuthi lingase ligcine lifinyelele kumadola ayizi-2 000 kungekudala. Abanikazi bezimoto nemishini esebenzisa udizili kusamele baphinde babhukule ngoba intengo kawoyela ayivumi ukwehla. NgoLwesine ikhuphuke yafinyelela ema43,75 wamadola. Enyangeni uNcwaba kumele sikulindele ukwenyuka kwentengo kaphethroli nodizili.