Singavinjwa isizwe singangeni esinindolweni sehlathi
Sekuyisikhathi kuleli lizwe sibona abaqhamuka kwamanye amazwe aseAfrika begcwele imigwaqo, benza imisebenzi eyehlukahlukene, eminye yayo ebeyishalazelwa yiningi elizalelwe kuleli. Bewubabona sebegxumeke amatende amancane adwetshwe kahle amakhanda abantu okukhombisa ukuthi kugundwa amakhanda kuleyo ndawo, kwezinye izindawo kulungiswa izinto ezinhlobonhlobo njengezicathulo, kuyathungwa nokunye okuningi. Yimisebenzi lena aboHlanga abangayikhuthalele kangako futhi abangayenzi ngokuzinikela okugcwele uma bethuke beyenza.
Kungifikele kulezi zinsuku ukuthi sikhula sisezingane kwakunomnumzane wakwaKweyama owayehambela imizi egunda abantu abafuna ukugunda bamkhokhele. Wayewenza ngokwethembeka lo msebenzi wakhe engazenyezi ngawo. Kwakunabanye ababelungisa amabhodwe okupheka, uma evuza bawashisele, uma kuguge isicathulo basilungise. Miningi imisebenzi yezandla eyayenziwa ngaboHlanga, bengahlali nje bangenzi lutho.
Eminye yale misebenzi yayifundwa esikoleni, umuntu aphume enolwazi oluncane okuthi ngokusebenza enza le misebenzi lukhule ulwazi. Namuhla leyo misebenzi seyenziwa ngabaqhamuka kwamanye amazwe ase-Afrika. Ngisho nokwakha izindlu imbala, sekuyivela kancane ukubona owoHlanga wakuleli lizwe eveza lelo khono.
Kuyakhombisa ukuthi aboHlanga bayisizwe esiphiwe wuMdali ngokwemvelo ukwenza izinto, kuthi-ke ngokufunda amakhono acijwe kuphume ubuchwepheshe. Kodwa ngenxa yokubona ukuthi sisezweni elihle elinakho konke lokho kugcine kulimaza ingqondo kwaba sengathi sizokuba nakho konke esikufisayo ngaphandle kokukusebenzela, nokucabanga kanye nokuzikhandla. Njengoba izwe libhekene nenkinga yokhuvethe, kuvalwa amabhizinisi, kuphela imisebenzi, isizwe siyadinga ukubuyekeza izindlela zokuphila. Kuthiwa impandla ikhwela ngamanhlonhlo. Kuleli lizwe ziningi izinkomba zokuthi abantu babhekene nosizi, badla imbuya ngothi. Lokhu ukubona ngokusabela uma bebizwa kuthiwa mabeze kokwamukela ukudla okuncane nje kwangalelo langa. Abantu abaphelelwa yimisebenzi babalwa ngezinkulungwane.
Njengoba liqhubeka lingena shi ezikweletini leli lizwe kushiya imibuzo eminingi, njengokuthi kuzobasiza kanjani lokhu abantu kuleli lizwe, futhi, yikuphi abangase bakwenze ukuzisiza bangezweli uma umnotho sewuphansi? Kulezi zinsuku udaba olusematheni ngolokuthi izwe iNingizimu Afrika liboleke imali enhlanganweni i-International Monetory Fund. Ngaphezu kwale mali etholakala kuIMF, vele iNingizimu Afrika inesikweletu kuWorld Bank kanti futhi inezibopho namanye amazwe. Lokhu kukhomba ukuthi noma seludlulile ukhuvethe aboHlanga kuzomele bazifundise izindlela zokuzimela.
Ngokusho kwezingqapheli uma kuqhubeka njengoba kwenzeka manje, eminyakeni emithathu ezayo iNingizimu Afrika izokube seyifinyelele kuma-100% emali yemikhiqizo yezwe ehlangene. Ngamanye amazwi kunengozi yokuthi leli lizwe lizokube selisebenzela ukukhokha izikweletu ingasekho imali yokubhekela izidingo zaleli lizwe eminyakeni emithathu ezayo. Kumele isizwe sibhukule silikhiphe izwe kulolu taku elikulo.
Ngenkathi kuqala umvalelwakhaya kubikwe ngezimali eziyizigidigidi ebezizokwabiwa zingene kumabhizinisi ehlukahlukene, zikhokhele nabantu abangasebenzi, kwenziwe nezinhlelo zokupha abantu ukudla, kuliwe nendlala. Okugqame kakhulu wukuthi zintshontshwe ngezigidi lezimali zangena emaphaketheni ezikhulu, okumanje kubatshazwa akuqedwa. Isimo elikuso leli lizwe kusengathi alinamholi ngoba sengathi yilowo nalowo uzixebulela lapho enokufinyelela khona, kukhulunywe kodwa bangenziwa lutho ababalwa kulo mkhonyovu. Ukuboleka izimali akubonakali kuyinto engase ilethe izinguquko kuleli lizwe, kunalokho ilifaka ehlathini elimnyama okungeyuphumeka kalula kulo.
Ngesivininini esikhulu sibheke esimweni lapho abantu bezofisa ukulibalekela leli lizwe lethu njengoba benzile abakwamanye amazwe aseAfrika babalekela eNingizimu Afrika nasemazweni aphesheya. Thina boHlanga siyobalekela kuliphi izwe ngoba iNingizimu Afrika ingeyokugcina ukuthola inkululeko. Abamhlophe sebebukeka behlezi sakunethezeka ngoba sebebonile ukuthi aboHlanga baqhubukushana bodwa, abangeni kangako ezindabeni zezinye izinhlanga. Kuze kube manje iNingizimu Afrika ithathwa ngabaningi, njengezwe ongabalekela kulo, ngoba zikhona izindlela ongaziphilisa ngazo ngaphandle kokukhathazwa ngomunye umuntu. Nokho-ke leso sikhathi siyaphela njengoba izwe liqhubeka lingena shi ezikweletini, elingase ligcine lehluleka wukuzikhokha.
Uma uhamba enxanxatheleni yezitolo udlula izindawo ezidayisa ukudla okuphekiwe kukhala ibhungane, abantu bathe gqwa gqwa laphaya nalaphaya. Sibi isimo. Abe Restaurant Association of South Africa babika ukuthi izitolo eziyizindawo zokudla kuhleziwe eziyizi-16 000 sezehlulekile zavala ngenxa yomvalelwakhaya nokuthi abusadayiswa utshwala kulezi zindawo. Lesi simo siveza ngokusobala ukuthi leli lizwe lizoqala phansi emuva kokhuvethe.
Ngenkathi sikhula bekunomdlalo onzima obewudlalwa ngamabhoklolo wokukhokhisa abathile ababehlulayo imali ethile ababeyibiza ngemali yokubavikela. Kwesinye isikhathi le mali beyibizwa ngo”zukwa ongapheli”. Kwakuthi njalo uma umfana ehlangana naleli bhoklolo likhangeze, yena bese ekhipha leyo mali alinike kwehlukanwe. Ngikubiza ngomdlalo lokhu noma kwakungesiwo ngoba kunabantu abayeka ukufunda ngoba besaba lawo mabhoklolo, futhi bengenayo leyo mali. Abanye babeye baze bayintshontshe imali ukuze bakwazi ukuphila isikhashana ngaphandle kokuhlushwa.
Iningi belisizwa wukuzilwela lenze imizamo liphume kulowo mshikashika wokondla enye indoda. Kumele kufike isikhathi lapho kunokuzimisela ukuthi noma sekuthiwani ungayithola indlela yokuphuma kulobo bunzima.