Abamabhizinisi neqhingasu lokuvuselela umnotho wakuleli
Luselude ukhalo olusazohanjwa ukubuyisela esimweni esihle umnotho waseNingizimu Afrika oshovelwe phansi ukhuvethe oluhlasele umhlaba wonke.
NgokweBusiness for South Africa (B4SA) ithi ilindele ukuthi kuthathe iminyaka emibili ukuthi umnotho wakuleli ubuyele esimweni owawukuso ngaphambi kokuqala kokhuvethe.
UMnu uMartin Kingston wale nhlangano eluleka uHulumeni ngezindlela zokubhekana nokhuvethe ngeso lwabamabhizinisi azimele, uthe umnotho wakuleli wawusuvele usuntenga ekuqaleni kowezi-2020. Le nhlangano iqagule ukuthi izinga lokutheleleka lizokwehla kancane kancane kanti igciwane lingahlala likhona empilweni yansuku zonke eminye iminyaka emibili.
Ngokuphela konyaka kulinganiselwa ukuthi kuzolahleka imisebenzi eyisigidi nengxenye (1.5m) kanti kulindeleke ukuthi ukutheleleka kwabantu ngokhuvethe kwenyuke ngoNcwaba kuthi isibalo sabashonayo senyuke ngasekupheleni kukaNcwaba noma ekuqaleni kukaMandulo.
Kodwa ngokusho kukaKingston, lokhu kungaguquka kuye ngokuthi isibalo sabathelelekayo siguquka kanjani eGauteng eyisizinda sokhuvethe, e-Eastern Cape naKwaZulu-Natal lapho obekunokukhathazeka ngokwenyuka kwezibalo.
UKingston uthi nakuba izinselelo zokulwa nokhuvethe zizodlula, ukuvuselela umnotho nokwakha kabusha umphakathi kuzodinga ukuba wonke umuntu abheke ingomuso ukuphuthumisa ukukhula komnotho nemisebenzi.
IB4SA, iBlack Business Council (BBC), iBusiness Unity South Africa (BUSA), iBusiness Leadership South Africa (BLSA), i-Association for Savings and Investment South Africa (ASISA), iBanking Association South Africa (BASA) neMinerals Council sebeqhamuke neqhingasu lokuvuselela umnotho.
IB4SA ithi leli qhingasu lizokwenza amathuba okusimama kwezwe asheshe ngokuthi kusetshenziswe zonke izinsiza zikaHulumeni, amabhizinisi nezinhlangano zomphakathi ukubhekana nezinselelo zomnotho nenhlalo.
Akuseyiyo inkulumo entsha eyomonakalo odalwe ukhuvethe emnothweni nakubantu uqobo njengoba inkampani yomshwalense iMomentum ithi ngendlela isimo esiyiso isilindele ukuthi zingene zilakanyana izicelo zokukhokhelwa ngezigulo ezithintene nengqondo.
IMomentum ithi amaphesenti angama-60 amaklayenti ayo ngoNhlaba abe nezisebenzi ezithathe ikhefu elingakhokhelwa kanti ezingamaphesenti angama-20 kuya kwangama-25 zifake izicelo zokukhokhelwa yisikhwama sezimpesheni.
Le nkampani ithi imvalelwakhaya nokusebenzela emakhaya kwezisebenzi kube yisikhathi esidale ingcindezi ezisebenzini nakubaphathi.
Ithe zandile izigameko lapho izisebenzi bezingafisi ukudalula isimo sazo sokhuvethe ngoba zesaba ukuthi zizobekwa amacala ngokulahlekelwa ngakwezezimali komqashi ngenxa yokungakwazi ukusebenza kanye nomthelela wazo ekwenzeni ezinye izisebenzi zingakwazi ukusebenza.
Izinkampani eziningi sezikumisile ukuthi izisebenzi zazo zithathe ikhefu lokuyophumula ekhaya kanti isibalo esikhulu sabaqashi sesiguqula imigomo yekhefu ngoba besabela ukuthi bazokhipha imali eningi yezinsuku zekhefu ezisele uma kwenzeka isisebenzi sesula emsebenzini noma sidilizwa.
Enye yezindlela yokwelekelela amabhizinisi ukuthi ahlale emile ngalesi sikhathi kube ngeyeReturn2Work enike amabhizinisi umhlahlandlela ekubuyeleni emsebenzini nokuthi ahlale evulile. Lo mhlahlandlela uhlanganisa ezomthetho namathuluzi okunciphisa ukuthelelana ngokhuvethe okuhlanganisa nemiyalelo yamabhazinisi asafufusa. Kwenziwe nezindlela zokuthutha izisebenzi uma ziya emsebenzini ukuze ziphephe.