Isenzo sikaHulumeni singaholela emibhikishweni
Izakhamuzi zaseNingizimu Afrika zidiniwe ngoba zinomuzwa wokuthi uHulumeni awukho ngasohlangothini lwazo.
Sisho kanje iSikhulu Esiphezulu seBusiness Leadership South Africa (BLSA), uNks uBusi Mavuso, oshicilelweni lwaso lwamasonto onke lapho siveze khona ukwesaba ukuthi isimo esidalwe ukhuvethe singaholela odlameni olubi kwazise abantu baxakekile.
Sithi ngenxa yomonakalo odalwa yilolu bhubhane abantu sebediniwe futhi babona sengathi uHulumeni uzwelana kakhulu nezinhlangathi ezithile kunabo.
Senze isibonelo salokhu ngesinqumo sikaHulumeni sokuvumela enye ingxenye yamatekisi ukuba ilayishe ngokugcwele kanjalo nokuthobela ingcindezi yezinyunyana zothisha ukuba kuvalwe izikole.
UNks uMavuso ugxeke izigameko zangeledlule lapho amaphoyisa ehlakaze esebenzisa amanzi izisebenzi zezindawo zokudlela ebezibhikisha ngokuthula eCape Town wathi: “Abantu banelungelo lokubhikisha. UHulumeni useyibulele impilo yamakhulu ezinkulungwane zezisebenzi zomkhakha wamahhotela nezindawo zokudlela ngemigomo eyenza kube nzima ukusebenza kulo mkhakha. Khona lapho, ukuthambela kwawo imboni yamatekisi nezinyunyana zezemfundo kukhomba ukuthi ukubhikisha yilona lwimi aluzwayo. Ngikugxeka kakhulu ukunqanda umbhikisho onokuthula ngodlame.”
Uthe umuzwa wokukhishwa inyumbazana uHulumeni wakhiwe inkulumo kaRamaphosa ayethulele izwe ngelanga lo mbhikisho wezisebenzi zasezindaweni zokudlela kuyo angazange aluphathe usizi lwazo kunalokho wamemezela ukuvalwa kwezikole amasonto amane okusalimaza ikusasa lezingane futhi kunqinda abazali ukuba baye emsebenzini.
“Nakuba uMengameli ecele ukuba sikuqonde lokhu, kube nzima ukukwenza lokho ekubeni engazange asho lutho ngokuhlupheka kwalabo impilo yabo ibukelwe phansi.
Izizathu zokumiswa kokuthengiswa kotshwala zenziwe esithe kungaxhunyanwanga nabakhiqizi noma abadayisi botshwala okanye izindawo zokudlela noma amathaveni,” kusho yena.
Uqhube wathi: “Zimbili izinto manje esezicacela umphakathi. Izinqumo zithathwa ngaphandle kokulalelwa kwezikhalo zabo okuthi uma sebengena emgwaqeni bebhikisha befuna izwi labo lizwakale, bahlangabezana nodlame olwesekwa uHulumeni. Kufanele kungawethusi uHulumeni ukuthi uma wenza izinqumo esithe ezinemiphumela emibi empilweni yabantu, umphumela kuzoba imibhikisho.”
Ubuze ukuthi yini uHulumeni acabanga ukuthi izokwenzeka uma uphendula imibhikisho ngodlame, awuboni yini okwenzeka kwezinye izindawo emhlabeni njengase-USA?
Uthe ngeke bakuvumele ukukhishwa inyumbazana komphakathi uHulumeni futhi kumele uMengameli wezwe akhombise ubuholi abutshengisa kuqala ukhuvethe okuwukulalela, ukuba nozwelo nokuqhamuka namasu amasha uma imiphumela ingabi mihle.
UNks wakwaMavuso uthe njengoba izibalo zabantu abangasebenzi nabalambile zenyuka, kuzobaluleka kakhulu ukuthi uHulumeni abonakale njengokwazi ukuvumela ezomnotho zisebenze. Uveze ukuthi umkhakha wamahhotela nezindawo zokudlela, kusukela emabhizinisini amancane asemalokishini ayizi-350 000 nabhakhiqizi botshwala abakhulu, uqashe izigidi zabantu.
“Lapha ngikhuluma ngalo mkhakha kuphela, kukhona amashumi ezinkulungwane emkhakheni wezempilo, embonini yokuzivocavoca, ekagwayi, inqwaba esebenza emahhotela nakwamanye amabhizinisi ezokuvakasha nalabo abasebenza ukuhlinzeka lezi zimboni. Kulaba bantu uHulumeni usenze ukuziphilisa kwaba yicala,” kusho uNks Mavuso.
Lesi sikhulu sithi iningi labashayekile ngabahlwempu nabesifazane imisebenzi yabo edingeke kakhulu ukuzondla bona nemindeni yabo.
Sithe laba ngabantu uMengameli okufanele abalalele futhi akhulume nabo.
“Kubiza ukuthi sivuse umoya wokuba sohlangothini olulodwa ekulweni nalolu bhubhane kungenjalo sisengcupheni yokubona ukungqubuzana phakathi kwabantu noHulumeni lapho kuzokwanda imibhikisho nodlame.”
Uthe lesi yisikhathi esinzima lapho ukuzethemba kwabamabhizinisi nabathengi kuphansi kakhulu futhi kwanda ukuxakeka. Ngokusho kwakhe, amazwe aseqala ukwahlukana lawo ahlaselwe ukhuvethe kuqala aseyavuka ekubeni kwamanye igciwane lisadla lubi.
Uthi kuzovela imicabango yokuthi lokhu kwahlukana kukhombisa uhlobo lokuphathwa kwezwe hhayi kuphela isikhathi okwenzeka ngaso lokhu nezimo zemvelo.
UNks wakwaMavuso uthe sekuyisikhathi sokuthi abaholi bezepolitiki bakhombise ukuthi bayanakekela, balalele abantu futhi baqinisekise ukuthi bayakhombisa ukuba benza okuzosiza abantu. Uthi kufanele bakhombise ukuthi imigomo yabo ivikela izimpilo nenhlalo yabantu.
“Kodwa okwamanje kubukeka sengathi uHulumeni wenza izinto ngaphandle kokucubungula uqhutshwa ukuzithwala esikhundleni sozwelo.”
Uphethe ngokuthi uma ukweseka abesifazane ukuba bazimele ngokwezimali kuseqhulwini kuHulumeni, ukunqabela abesifazane nentsha ithuba lokuziphilisa ngenxa yokuvalwa kokusebenza kwezimboni ezifana neyokuvakasha kuwukuziphikisa.
“Lezi zimboni ziqashe kakhulu abesifazane ngakho-ke njengoba sibheke kuNcwaba iNyanga Yabesifazane kudinga sisebenzise bona ukuqinisa ukuzibandakanya kwabesifazane kwezomnotho,” kuphetha uNks wakwaMavuso.