Baphawula ngokuvalwa kwezikole okwesikhashana
Mhleli
Nangaye uNcwaba sizolokhu sibhekile izibalo zabathelelekayo nabashonayo ziyehla noma ziyenyuka yini? Ngoba ngalekwalokho siyaqhubeka nokuzivala izikole imfundo ayibalulekile kunempilo yethu neyezingane kungakhathalekile ukuthi kutheleleka obani phakathi kothisha, izingane noma abazali okanye abahlala, abakhulisa nabaqapha izingane zabanye noma ezabo abahlala nazo njengababheki nabakhulisi bazo. Sisazolinda sibheke isimo ukuthi senzenjani ngaphambi kokuthatha isinqumo esiphelele ngezingane zethu nezikole kulo nyaka wezi2020 okwamanje kusesekuseni ngokuzokwenzeka, sisazothula nje sibheke isimo sezwe somkhuhlane. - nguCondry Mkhize
Mhleli
Lovula vala owenziwa uMengameli uyosizaphi ngoba igciwane lona lizolokhu likhona? Ngicabanga ukuthi kumele kuqiniswe kakhulu kushayelelwe isipikili ezingqondweni zezingane ngalolu khuvethe ngoba zona azazi nokuthi lidumephi. Ziyazihambela nje ngaphandle kwezimfonyo. Kuhlula ngisho udlula zisekhefini, izimfonyo azibonwa. Esezikhulile zidinga ukuhamba iqhaza ekuvikeleni impilo yazo bese kuthi laba abancane bona kube sezandleni zomzali nomzali ukuthi ashumayele ivangeli ekhaya, sibadonse ngezindlebe. - nguThoks Fuze
Mhleli Asiphumanga isikole kodwake sithathe ikhefu. Into edala lokho ngokwami ukubuka yikho phela ukungagculisi ngezinsiza zokuvikela abafundi nabafundisi kulolu khuvethe. Lokho kuqinisekiswe ukwenyuka kwezinombolo zabathelelekile ezikoleni. Okwami-ke nengikubonayo lapha nokuyingozi enkulu yilokhu okuthi ezinganeni akulula ukushobocisa leli gciwane nokuyinkoleloze engathi shu ngoba ukufa kubizwa ngokufa ngoba kubulala futhi akunamnyaka. Akunganqakiswana ngempilo yomuntu ngoba iyodwa. Abaholi abasihole ngeqiniso bayeke ukusisikaza ngejozi.
- nguSpha Swazy Gule Gule
Mhleli
Kodwa uMengameli ugidiswa ihlombe lingekho. Abeluleki bakhe bamhlekanisa nesizwe. Isonto elilodwa umatikuletsheni uvalile kusho ukuthini lokhu? Noma lapha kuzanywa ukwenilisa zonke izinhlangothi. Cha izwe alibuswa ngokuthi uzame ukunelisa imizwa yabantu. Abavale nje uma kuvalwa amasonto amane bonke hhayi lo macashelana odlalwa lana. - nguMandla Khanyile