Uhlaka olulekelela ukucija amakhono kwezokwakha
Ubhubhane olukhungethe umhlaba wonke luphoqa ukuthi kube nezinguquko endleleni oHulumeni nezinhlangothi zabo abasebenza ngayo. Lolu bhubhane alugcinanga ngokugulisa izinkumbi zabantu okuyibona abangabasebenzi, kepha luchaphazele naseminothweni yamazwe. Ngokwe-International Labour Organisation (ILO) izisebenzi ezingamaphesenti angama-20 zihlala emazweni okuye kwadingeka ukuthi kuvalwe thaqa kungasebenzi muntu ngaphandle kwalabo abenza imisebenzi enqala. Ngaphezu kwalokho abanye abangamaphesenti angama-69 bahlala emazweni lapho kwadingeka ukuthi kuvalwe izingxenye ezithile zomnotho.
INingizimu Afrika ayisindanga kulezi zinguquko. Babalelwa kumaphesenti angama-40 kuphela abantu abebesebenza ngesikhathi semvalelwakhaya yesigaba-5, ngaphansi kwesigaba-4, kwakusebenza abantu abangamaphesenti angama-55 kuphela. Ngaphansi kwesigaba sesithathu izwe elikuso njengamanje kubalelwa ukuthi kusebenza abangamaphesenti angama-71.
Imboni yokwakha ishayeke kakhulu ngokubheduka kwalolu bhubhane. Ngenyanga uNhlangulana balinganiselwa ezinkulungwaneni eziyisi-7 abantu abese belahlekelwe umsebenzi kule mboni. Lokhu kuyinto enzima ngoba le mboni ibaluleke kakhulu njengoba ingenye yezimboni eziqashe abantu abangaphezu kwesigidi. Ukuze lesi simo singabi nemiphumela emibi kakhulu kuphoqe ukuthi kwenziwe izinguquko eziningi zokubuyisa le mboni esimweni esiyiso.
Enye yezinguquko elethiwe ibe sekuphathweni kwazo izimboni zokwakha kube ukuphathwa kohlaka lukaHulumeni [Construction Sector Education and Training Authority (CETA)] olubhekelele ukuphathwa kwe mboni yezokwakha. Ngomhla zi-3 kuNhlolanja wezi-2020 iCETA yaba ngaphansi koMlawuli. Umsebenzi kaMlawuli kwaba ukuthi alethe izindlela ezintsha zokuphatha kanye nokusetshenziswa kwemali. Konke lokhu wanikwa ukuthi akwenze esikhathini esiwunyaka owodwa.
Ukuthuthukiswa kwamakhono enye yezindlela ezinqala zokuthuthukiswa komnotho. Lokhu kwenza ukuthi isizinda esithuthukisa amakhono kwezokwakha sibe ngesibaluleke kakhulu. Ibalazwe elingenhla liyatshengisa ukuthi baningi abantu abangasebenzi eNingizimu Afrika, okungaba abantu abangenawo amakhono adingekayo. Le nkinga yamakhono enye yezinto esezithebeni kuMlawuli weCETA. Lo msebenzi uzowenza ngokunika abantu izimali zokufundela amakhono. UMlawuli uqinisekisile ukuthi umsebenzi wokukhulisa amakhono uzoqhubeka kulabo abesezikoleni nalabo abasemisebenzini ehlukene.
Enye yezinto ezenze ukusebenza kweCETA kungahambi kahle esikhathini esedlule kube ubudlelwano obungebuhle phakathi kweCETA nalabo esebenzisana nabo. Kube khona ukukhononda okuningi kwabasebenzisana neCETA bethi abanakwa kanti futhi nemibono yabo ayamukeleki futhi baya deleleka. Abafundi abathola imifundaze kuCETA bakhala ngokuthi abayitholi imali okufanele bayithole kuCETA. Zonke lezi zinto zigcina ziye enkantolo, into engaluniki isithombe esihle uhlaka lweCETA. UMlawuli uzibophezele ukuthi uzosebenzisa izindlela ezahlukeni ukuthi abenzengcono ubudlelwane phakathi kweCETA nalabo esebenzisana nabo. Okusemqoka kakhulu kuMlawuli ukuthi izinto zisheshe zilungiswe zingafiki enkantolo ngaphandle uma kunesidingo esingagwemeki. Kwazise phela ukuthi kuyiCETA abasebenzisana nayo babaluleke kakhulu. UMlawuli uthi impumelelo iyobonakala kuCETA uma kunobumbano phakathi kwayo nalabo esebenzisana nabo. Kuyi manje uMlawuli weCETA umatasatasa uhlanganisa izindlela nemigomo yokwakha ubudlelwano obuhle nobunenqubekela phambili phakathi kweCETA nalabo esebenzisana nabo. Kubaluleke kakhulu ukuthi uCETA ashintshe ukungahlonipheki kwalabo esebenzisana nabo.
Esikhathini esedlule iCETA ibingasebenzi kahle mayelana nokulawulwa kwezimali zalolu hlaka. Lokhu kwaletha izinsolo eziningi ezenza ukusebenza kweCETA kungabi okuhlelekile nokuhle. Umsebenzi obhekene noMlawuli ukuthi konke lokhu kungaphindeki. Enye yezindlela zokugwema lokhu ukusebenzisa izindlela ze-ICT eziqinile kuzo zonke izinto eziphathelene nokusebenzisa imali. Esikhathini esedlule imali ibisetshenzwa ngezindlela zakudala ezinobungozi. Ukuze iCETA ilungise ukusebenzisa kwayo imali kufanele indlela yokukhokhela umsebenzi eyenzelwe wona ngabantu bangaphandle iguqulwe ngokushesha. Lona ngomunye yemisebenzi esezandleni zikaMlawuli. Kubukeka sengathi kulesi sikhathi sonyaka uMlawuli anikwe sona kumele asebenze ngokushesha nangokuzimisela ukuze kujike izinto.
Zonke lezi zinto ezikhombisa ukuthi iCETA ibhekephi ngaphansi koMlawuli zivele esithangamini esiqoqe abantu okuthe abeve emakhulwini amathathu. Abasembonini yokwakha nabasebenzisana nayo basijabulele isithangami ebesihlelwe yiCETA ngokulekelelwa yiBayede News ebekungesohlobo lomhlanganobuchwepheshe. Ngenxa yokhuvethe olwenza kube lukhuni ukuhlangana, iCETA iqome ukusebenzisa lolu hlobo ukuxoxisana nalabo abasembonini mayelana nendlela yokufukula umnotho ochaphazelwe wukhuvethe. UMnu uSabelo Wasa, onguMlawuli owaqokwa nguNgqongqoshe Wezemfundo Ephakeme, Isayensi Nobuchwepheshe, uthathe leli thuba ukuchaza ngeqhinga lakhe lokulungisa lesi sikhungo esidume kabi ngokungaphathwa kahle kwezimali kanye nokungenzi kahle umsebenzi wemboni esiphathiswe wona.